今天早上10點左右，就去到香港機場，其實o黎o左咁多次都見唔到廣告上面講o既好o野食，所以索性入閘前買少少o野食算數… 仲有，如果大家要買菲林或者DV帶就真係一早買定，入到o黎買貴 2-3 倍，搶錢！不過在機場 starbucks 食o野就反而見到劉青雲兩公婆，又似係去旅行o個隻… 仲有人走去搵佢o地影相，阿劉生就好客氣即刻彈起準備，反而郭藹明就有少少唔多自在。

上o左日航架機，發覺同幾年前變化唔係好大，空姐質素繼續地一般… 餐午飯都係勉強「食得落」o個隻…

下午卒之3 點左右去到東京成田機場，咁就等轉機… 上次1999年o黎日本，一路都趕，無乜點睇成田，剩係記得有檔賣關西風壽司 (板押/壓壽司) 幾香，但係無時間食，成為一大憾事。因為原來日航係無 check-through 國內機o既，所以我們無啦啦又要在成田拎返晒o的行李又check in 一次國內線… 好在有充足時間，不然真的趕到飛起！不過我們似乎過早入閘了。國內線的閘內真的沒有甚麼商店，卒之我們兩個人傻更更咁在候機室睇o左半小時 NHK！

到o左6 點左右，係時候返番同一terminal 轉機上北海道…倒發現國內線的空姐比國際線的漂亮，不知是否公司有意安排了。 第一次去，唔知11月的北海道會有幾凍… 結果…

在新千歲下機時無乜點，因為直接去坐火車 (未開火車證住，因為我們只買了3天火車證，留來坐特急去函館及回小樽用)。但是到了札幌後，天突然下起雨來，仲慌死唔夠濕咁落到鬼咁密，加上只有4-5度，我即時加上外衣大褸，但雙手已經開始僵硬。女友好少少，著了羽絨衣；不過拖著行李走來走去的我們，卻在偌大的札幌站內迷路了… 走去一間小商店買本Hokkaido Walker (深田恭子做封面)，順便問問點去酒店 (Sapporo Grand Hotel)，個店主女士好好人，即刻唔知邊度搵一張黑白簡單版札幌市街道圖出來，不過始終不能告訴我應該在哪個出口出札幌站，而我們在是但一個出口問人時，又問著一位好好心，不過對佢自己身在哪個出口都不大清楚的學生；兩個人在站口食了好一會風，竟然就有一位有點胖的大學生姐姐 (佢自己講的)問我們想去哪兒 (o的英文都唔錯)，仲帶o左我們去酒店，仲入到門口添！！ 好人到震。不過就淋了十分鐘雨 (無手打傘也)。酒店一見到兩隻落湯雞入來，便有幾個門僮飛撲而至 (絕無誇張)，替我們拿行李 (抹埋乾淨)兼搞check in。

安頓好後，因已是晚上十時，我們也未吃飯，便乘地鐵 (我們近大通站多於札幌站)去薄野 (Susukino)，找拉麵橫丁吃去也。

始終唔熟路，都要問人先找得到，我們由街尾行去街頭，最後決定去一間叫 Higuma 的，似乎入面最多人，而且以其「麵豉青蔥拉麵」最為出名。不過為免口臭口乾，最後我們都係要了叉燒及「雲吞」麵。

見到一個個日本人食到"雪雪"聲，自己都好想，不過硬係覺得就算連湯連麵食都無理由食到咁聲，阿媽話咁好無食德喎…

但話得說回來，碗麵的質素真係唔錯 (佢仲有生麵可以買走回家煮)，非常彈牙而且唔會覺得佢係因為煮得生而彈 (因為無鹼水味)，叉燒就絕不「鞋」口，但係有點凍；不過個湯就點都覺得佢有味精，但係探頭去櫃後一看… 原來個湯係成大煲咁整，見佢在湯中撈出了大量的油和骨頭渣不要 (似係骨頭煲出來那種油)，而且仲有很多很多的紅/白蘿蔔 - 唔怪得咁鮮味啦! 見o的日本人個個都飲晒，自己都飲返幾大啖，一於無蝕底。

吃完麵，已是晚上近十一時，雨繼續下，但薄野街上還有不少人，原來呢一帶就係傳說中的不夜城，不過老實講，我o地個人對於夜生活呀，卡拉OK 呀咁興趣不大，加上整天舟車勞頓，倦得很，四圍兜個圈便回酒店了。

回到酒店，才見到原來酒店房間內有一大堆優惠卡之類，包括上札幌電視塔，藻岩山纜車，連山頭火拉麵都有，倒夠體貼。