10.10.2003(金) / 晴

第六天

又到轉地方的日子了，今日將會轉到神戶。早上07:35起身，落樓下食完個飯團早餐，就拎行李出發了。先坐地下鐵到京都(乘車料@200yen)，之後用上JR Pass，乘新幹線Hikari 301號約30分鐘就到達新神戶了。

出站不遠，就係神戶夢風船的入口，行上些少，就係售票處，由此乘上吊車，往山上進發。前望係目的地布引草藥園，後望係神戶市和神戶港景色。10零分鐘就到達高處的布引草藥園站，剛才的吊車連入園料係@750yen，550yen係吊車的片道(單程)收費，200yen係入園料金。

園內有香水製造的展覽、各式花草園，不過季節不乎，基本上無咩花好睇。在廣場和賣店掃過手信，順便食埋個雪榚，有薰衣草味和甘菊味。廣場在高點，由此只是一直下斜就可以遊過整個布引草藥園，之前睇過d書介紹，坐夢風船上，行返落黎就very good喇！

如是者，背著行李，行呀行，走呀走，卒之到達布引草藥園的出口，由此進入布引之瀧的範圍。沿車路而下，兩邊林蔭，有時前望一片開闊，神戶市和神戶港依舊出現在前方。在途中，一路有告示牌，布引之瀧，有雄瀧和雌瀧的瀑布，還有夫婦瀧、鼓瀧和布引水壩。

行、行、行，跟著告示牌行呀行，終於到達雄瀧。有幾個著校服又唔知點解唔係學校出現的學生係度玩水，阻住影風景。休息一陣，又再起行。

離開布引之瀧，就回到新神戶。由上草藥園到回到新神戶，前後共3小時，背著行李而行，點知一個轉回來又是原點，早知條路唔係睇地圖咁近、早知背著行李走不如先放下行李在locker、早知比人"醒"就唔好低估左一切，早知如此.....

雖則"早知"難料，但路仍是要行，因為在布引夢風船不遠，就是北野異人町。於是負磅而行，邊"醒"邊行，於是既略地算到過異人町，在風見雞館和萌黃之館外面拍過照，沒打算買個套票入其中幾間參觀，純粹逛個圈就"行人"。

從斜坡而下，好快就到達三之宮，今晚已經係出發前所預訂的酒店中，係最後一晚已預訂了的一間。話說出發前，package包左三晚大阪第一酒店，於是頭幾日好容易就攪掂。又，出發前上網睇東橫Inn個網，大致訂左京都四條兩晚，咁打算玩完大阪、京都，下一站神戶，於是第六晚，神戶三之宮東橫。這三晚東橫都是在香港上網攪，有阿鄭小姐來電落實，再拎個email print out，行埋酒店front desk就有房，做埋登記同比錢就萬無一失。

但點知，三之宮呢一間，離車站都幾遠下，再加上當時"被醒指數"已到達五個"醒"(一個醒為小醒，五個醒係大醒)的情況下，好不容易到達酒店放下貼身了幾個鐘的行李係酒店，登記比埋錢，再通知埋今晚夜d先checkin，又再離開酒店。(東橫要16:00後才可checkin)

回到三之宮站，搵一搵第二晚的住宿先。行入車站的JTB，請問附近有無房(剛才問左三之宮話明晚無房)，「咩話？」、「無房」、「咁大阪方面呢？」、「姬路呢？」、「京都有掛？」、「o下？廣島先有，single room？」、「 再睇睇呀唔該！」、「係、係，大阪方面有，但兩個single room...」、「ok、ok，大阪Hotel NCB，兩間single room，連我地o既service，15,645yen...」，成千銀港紙，但無計，呢d就係自由行到連房都唔訂定的偶有出現的問題。

付過錢，拎左張酒店coupon、收條同埋地圖，「taxi，幾分鐘到」，「係、係，多磨」。做完大爺(幫襯成萬幾yen，幾豪呀！)，拎個JR Pass出黎晒一下，轉上月台坐車去神戶。出站先去醫肚，就近麥當當攪掂就算。

食飽查實已經4點幾5點，拿拿聲向MOSAIC方向走去，咁好快就到達神戶港。可惜當日天色暗，無日落餘暉睇，於是在埠頭邊坐下，就繞住港口行個圈，從MOSAIC方向影向神戶塔、酒店、水族館，中間影下碼頭，行到另一邊，已經天都黑埋，呢個時候就影左轉頭MOSAIC方面的摩天輪。最後睇埋神戶塔的賣店，門外的當年神戶大地震相片就經天橋，前往元町。

由於都夜喇，去到元町都無咩野睇，行過間生果店，雖素知日本生果貴，但幾日都無咩菜蔬落肚，都係時候買d生果清一清腸胃喇。於是行埋去睇，好靚喎d生果，價錢，蜜柑480yen一袋，但無咩興趣；蔗200yen一條約4節，要o趙，唔好攪；香蕉400yen約3-4條，嘩7蚊隻；芒果280yen一個，1,000yen五個，唔多想食，最後選了個木瓜，580yen，但size就，大家睇相算，返香港都唔敢話比阿媽知買呢個木瓜幾多錢，但斷估係香港夠買幾個體積每個大一倍以上木瓜喇！

行到元町車站，今日行左咁多路，都係鳴金收兵算喇，坐JR返三之宮，先行去SOGO睇下有無好食，點知無心水，唯有行返酒店，卒之係酒店前見到有間食堂未收工，算喇，入去食左算喇，今日腳仔軟喇！食完諗起個木瓜咁大個，都係順路係酒店對面間便利店整多包大橙汁先。

早餐：於酒店內

小吃：布引草藥園內薰衣草及甘菊味雪榚(@250yen)

午餐：神戶港麥當奴(1,092yen)

小吃：三之宮站朱古力及抹茶窩夫(273yen)

晚餐：酒店附近一力食堂(豬扒飯定食+鰻魚飯定食/1,550yen)

飯後果：超小型木瓜(580yen)+便利店橙汁(207yen)

　

神戶三之宮東橫Inn 511室

神戶夢風船

布引草藥園

布引之瀧

北野異人町