12.10.2003(日) / 晴．陰．陣雨

第八天

10:05乘市營巴士53號到大阪站，寄存行李後，乘10:50阪急電車至池田。參觀即食麵發明紀念館。13:26乘快速急行回梅田，轉地下鐵御堂筋線到心齋橋。14:15於心齋橋Plaza Building門外等候御堂筋Parade隊列經過。16:00移動至近鐵難波站，再前往湊町River Place參觀第7回Fureai Heisei樂市。約17:20回程道頓堀，繼續看Parade。回大阪站取行李後，轉乘JR神戶線快速到三之宮，21:24乘夜行列車Akatsuki往長崎。

噚晚10點幾先checkin，一覺醒來都係08:30。打開窗一望，咦，又唔錯喎！同噚晚打的入黎，四圍黑漆漆個look，簡直係兩回事喎！原來酒店係河邊，河邊又好多樹，進入秋天，d樹黃黃綠綠，都幾靚喎！

雖則一晚萬幾yen，但唔包早餐，於是食買定的冬甩做早餐。食完又係執行李時間喇，因為今晚夜車，d野要執好d先得。攪到10:00，checkout喇！行出酒店，死喇，噚晚就的士黎，走又點呢？係酒店門前花園繞了個小圈，咦，會議中心、中之島，嘩，原來呢度唔削架喎，仲酒店旁有巴士站，巴士去到大阪站，very good啦！

於是坐上市營巴士53號(乘車料@200yen)，10幾分鐘就到大阪站(已經好兜路下)。落車先搵個locker放下身上d行李先。今日行程安排妥善架，從大阪站起，先行去隔離阪急梅田站先，途經窩夫店，一人食返個窩夫頂一頂肚先(食冬甩唔飽嘛！)，卒之選左榛子味同creamy & cocoa味兩款。邊食邊行去車站，乘上10:50開出的快速急行(乘車料@260yen)，18分鐘後又到達曾到此一遊的池田站。

經過上次戇居居休館日光顧後， 今次睇清睇楚無休館先黎，無走雞喇！由於熟左路，10零分鐘就去到即食麵發明記念館喇！入口側有個好似係餐廳見到果d意粉模型，凌空有隻叉圈起一執意粉那款，不過這裡就一杯意粉變成一杯即食麵和圈起的係即食麵o者。附近仲有發明人安藤百福先生個人像(即係日清食品o既老細)，仲有佢d金句，例如「食足世平」、「食創為世」咁。

入去第一個感覺係從味覺而來，好香的即食麵味喎！望多兩望，原來要入去受付處先登記一下先，跟住就拎到記念館的小冊子。出左受付處，對面就係展示場了。入面有好幾個模型，有當年安藤先生研究即食麵的廚房、不同年代即食麵的擺設，而左面的牆上就用文字同圖片交待即食麵同日清的演進，仲配合埋當年的世界大事在旁。而右面的牆上就掛上了所有日清出品的即食麵的包裝，有膠袋包裝、有碗麵包裝，一牆都係，一日食一款都恐怕要食佢幾個月。而展示場的後半部有播出歷年日清的廣告，仲有個電腦問題遊戲，話係10問中答中8問咁就會有獎品。問題係圍繞場內的東西，於是邊睇問題邊一個走去搵個答案，一個係度頂住個位。幸運地，有一次中左獎，至於獎品係咩，要拎住張機印單轉頭去受付處領取。本來想"賺"多份獎品先走人，點知人越黎越多，唯有讓位比其他人玩。

離開展示場，原來樓上有手作體驗，可以自己整即食麵，仲有個個人化的包裝添。可惜時間不合，唔係就過癮喇！不經不覺已經12:35，都差不多要吃個午飯喇，於是拎住張獎品換領券去受付處領獎先，獎品係日清chicken拉麵的雞仔樣的膠folder。換完禮物係受付處旁仲有印仔"吸"，梗係唔放過喇！

最後，正盤算去邊食晏仔，這時再回想好香麵味喎！係喇，就係呢度，受付處旁的食即食麵區，這裡有新製品的展示，正有得即買即食。那裡有電熱水壺、筷子等供應，仲有3分鐘的漏斗添！於是選了個新發賣的日清上湯麵的鹽味雞麵和叉燒醬油味黎食(各300yen)。

好喇，食飽飽都成13:00，係時候走人喇！回車站乘上快速急行(咁好彩o既)，好快又回到梅田。再轉地鐵御堂筋線去心齋橋(乘車料@230yen)。出站後正好在心齋橋Plaza Building地下，一出心齋橋筋，剛剛好，係今次錯有錯著的特備節目，御堂筋Parade 2003遊行的路線喎！先拎左本Official Guide睇睇先，詳細介紹左有咩隊伍參加，出場次序，仲有由出發地梅田、大阪方面，到終點難波間各區間的預計巡遊隊伍經過的時間咁，好詳盡喎！

這是風和日麗，就在路旁邊晒邊等巡行隊伍經過，由14:15一直在固定地點睇到16:00，影左唔少相，攪到電池開始要就住黎用。一諗起企左咁耐，轉個地方先，難波那邊有湊町River Place的第7回Fureai Heisei樂市喎，就去睇睇先，由於唔太遠，於是邊行邊睇巡遊，半小時後就到達目的地。睇左差不多一個鐘，那裡有唔少攤檔，有食有買，仲有bingo係觀眾台那邊玩，又有d小朋友表演，都幾熱鬧架。不過卒之都無買野，反正食左Ice，一個蜜瓜味，另一個係似木瓜色的叫Nekutarin，但店員話係一種由桃和林檎混出來的一種生果製成的(都幾難想像個生果原來個樣)。

又係時候將場地轉返去巡遊，因為難波方面會預計19:30-20:00巡遊隊伍才到達，於是經道頓堀走回到御堂筋。

在道頓堀這邊有唔少人，於是亦步亦趨，搵返個好位置先，由於天已黑，要搵個地方可以企定定，唔係拎住部數碼相機，有果粒閃燈仔都唔掂，想影得清楚d都幾難。卒之係個都算開揚的位置睇左一直好想睇到的JR西日本的隊伍經過，仲有一連數個各地方的祭典代表隊伍，正呀！

當大會的隊伍經過，亦即是御堂筋巡遊的最後一個隊伍經過，於是隨人潮散水去也！行到大丸，買定個麵包今晚夜車當宵夜或當聽朝早餐先，之後諗諗食咩，於是就地係大丸的地庫天一天丼食左個好滿意好味道的天丼(料金@800+稅別)。話咁快19:05就食飽，都係時間起程由大阪站的locker取行李，再轉車到三之宮等今晚的夜車Akatsuki(從大阪到神戶，乘JR神戶線快速；另外，Akatsuki本由京都開出，再經大阪，但因為車票係早幾日訂下，當時無預計噚日會要閃到返大阪先有得訓，仲有今日係大阪睇巡遊，為存忠厚，所以無另外再book車票，反正大阪早幾日都已經玩過了，無甚地方想去)。20:47到達三之宮的月台，坐到21:24，登上Akatsuki的14號車(即係最尾一卡)。影左幾張相做記錄，再玩下身邊的設備，咦，熄燈，時為21:30，上車都唔夠幾分鐘，唯有快快執好野訓個早覺喇！

選左d御堂筋Parade 2003的精彩相片，大家亦可以睇睇右下方的公式網頁。

巡遊隊伍未到，工作人員行行企企中大阪府警察本部的交通機動隊白電單車隊國土交通省的廣報車

天空上有直昇機做直播大會的隊伍(夜晚再次出場時亮了燈)哈，呢個唔記得咩隊伍的東東

03年阪神老虎勝出聯賽，應援團興奮出場泰國的隊伍嘩，靚女，泰國小姐Miss Thailand

史力加和公主似嘔泡多過噴蜘蛛絲的"蛛蛛俠"呀！(USJ隊伍)奄美群島的一班歐巴桑(但跳舞跳得好睇)

Kanda山笠隊伍法蘭西隊伍(2002年的法國小姐)唔少得的森巴女郎

薩摩川內武者行列(到夜晚了)某大學的應援團JR西日本隊伍

姬島地車保存會隊伍伊勢蝦祭隊伍(先黎一條船)伊勢龍蝦黎喇！

萬燈祭隊伍(呢個係其中之一，宮本武藏與佐佐木)萬燈祭的另一組能代Nebunagashi祭隊伍

早餐：酒店房內自備便利台冬甩

小吃：榛子味及Creamy & Cocoa窩夫

午餐：即食麵發明記念館食日清上湯麵(塩味雞及叉燒醬油味)(各300yen)

小吃：蜜瓜味+Nekutarin味 Ice (各250yen)

晚餐：心齋橋大丸天一天丼(@800yen+稅)

零食：Family Mart零食數款(幾百yen)

夜行列車Akatsuki

(左上)椅旁把手內藏照明燈
(右上)椅前有腳踏和拖鞋提供
(左下)熄燈後的車箱
(右下)免費電台服務，但請自備耳筒

夜行列車Akatsuki (夜行列車)

御堂筋Parade 2003 (御堂筋Parade 2004)

湊町River Place (Fureai Heisei樂市)

天一天丼