13.10.2003(月)
/ 陰 - 夜有微雨
第九天
只記得昨夜列車曾經到過姬路、岡山、倉敷，又在有些地方係停左好耐先再行，由於噚日都行左成日，半
夜真係訓到唔知蹤。06:30，列車的燈又再亮成，於是都醒埋，一番梳清，車掌這刻才來檢查車票。
由於當初只打算乘車到九州就算，而又曾經諗過去唔去一轉豪斯登堡，於是車票的終站只到達九州的諫早，但最後的決定係去長崎，目的地第二個原爆過的城市。於是趁查飛就問問車掌先生，可唔可以補個票(因為都拎住JR Pass係手，理應無料)直坐到長崎。點知係我未訓醒定係車掌同我溝通不靈，竟換來車掌的十字死光。ok、ok，fine！有Pass在手，咪轉個車囉！
08:12到達諫早，
下車第一時間先影一影架車先。呢頭影完再睇睇車站的時刻表，咦，08:18有班特急Kamome1號到達諫早，終站長崎，good
fit喇！拿拿聲搵定個自由席
排隊位先，無耐呢架白色配以黃同黑色好sharp的列車就到達。由於時間尚早，自由席仲有唔少吉位。呢架2000年才登場的列車呢，黑色皮椅，設備先進又夠cyber，登車的入口又有燈箱、又有木紋的牆壁仲加埋壁燈，型得佢呀！仲有就係22分鐘就到達長崎，正呀！
到達長崎，出站先搵locker放行李先，因為今日會打算玩大半日。途經車站出口旁的觀光案內所，拎d單張睇睇，09:00會有觀光巴士團開出，不過巴士團一向都幾匆忙，都係自由行喇！放完行李回觀光案內所，再拎d合用的單張睇睇今日應該點行先，因為直到腳踏長崎呢一刻，`只知道1945年有原子彈係度爆過，所以同廣島一樣會有d紀念設施之類，而仲有咩睇，真係唔多知。見佢有路面電車坐，而觀光案內所又有張電車一日乘車券，每張500yen。於是付過1000yen，拎住兩張又係乘車券又係觀光案內的地圖往長崎站前的電車站進發。
好快就有車，呢度d路面電車都係自由上車，落車先睇價比錢。不夠15分鐘，就到睇住地圖坐車去到松山町落車。松山町係去平和公園比較近的車站，但查實經過一日乘車經驗，站與站之間行兩步就到架喇！下站就在斜對面就係平和公園的入口，見到唔少學生去參觀，原來有唔少由老師帶隊的學生到來上戶外授課。步上幾層的梯級，就到達長形的公園的一端，有噴水池，又有唔少各國送來的紀念和平的雕塑，仲有當年受災嚴重的刑務所遺址。盡頭處就有個倘大的平和祈念像，旁邊不遠就有賣店，叫做「原爆者之店」。逛過賣店，再走回頭路，平和公園旁有一片草地，就係原爆落下中心地和
浦上天主堂遺跡，這裡亦有一些雕像以作紀念。再前行就到達長崎原爆資料館。付過入場料(@200yen)，就入內參觀，如同廣島的原爆資料館，館內有詳細說明當年如何如何長崎會成為當日美軍最終選定為投下原子彈的城市之一，原爆後的所收集得來的物品，生還的受害者的照片和錄像記錄等等，唔覺唔覺都行左接近兩個鐘。
再次研究下跟住參觀的地方，最近的係山王神社，最近的電車站就係大學病院前，而離開資料館時已身處濱口町站，即係松山町與大學病院前站之間的車站，咩d車站距離咁近架！如是者，就決定行前一個站，反正站的位置都已在眼前。依著路牌的指示，真係行到去病院喎！但唔多對路o既，好在剛有兩位太太從病院離開，見到兩個觀光客，就指點返條正路，於是安然到達山王神社。原來呢個景點係參觀神社前的一餉因原爆而斷了一半的鳥居。睇完行返轉頭，查實就係濱田町的商店街，而當時都成13:00，係時候食個晏先。
食完飯再出發，今次要電車了，因為要去長崎市的另一邊，而且仲要去到築町就要轉另一線路的電車。約半小時後到達其中一條線路的終站石橋。由於有好心的當地人指點，兩個遊客look的人好快就可以到達景點孔子廟。不過一睇佢門內受付處的牌子，參觀料金@500yen仲要加稅，525yen，咪攪喇，睇中國來的東東，留個照就閃喇！
下一站，荷蘭坂，o車，一截斜路黎架咋！再前行，咦，呢度得意喎，Glover
Sky Road，咁多人排隊搭lift
o既！咁多人等，無走雞，排埋一份先。但點解部lift係斜上斜落o既！排多左一部lift，終於入到，原來一路上斜，登上高點，眼前係一堆依山而建的屋，密麻麻的。
出lift後，係一條天橋，跟住仲有一段仔斜路，轉個彎就去到一個叫Glover Garden的地方。開頭唔知咩料子，又見600yen入場料，都諗左一諗，不過一場黎到，睇下喇！比完入場料，拎住張單張，咦，又有d料到喎，而入面亦唔差。原來呢度係當時長崎市內一班外國人和有錢的日本人的居留地，時間大約係倒數超過100年的江戶時代。入面約有9幢建築物，逐間行下，睇下當年d富貴人家的室內裝置係點，順道又可以睇下歷史，當中有個係今日的Kirin啤酒的創始人，又有當年投入大量金錢支援倒幕志士坂本龍馬的有錢日本人等。
行完都差不多成兩個鐘，加上一入黎就係個魚池度邊餵鯉魚邊休息都坐左好耐，而由於從第二Gate進入(後來知道，第一Gate在下面，在大浦天主堂那邊)，一直只係下坡路，邊行又可以邊睇遠處的長崎港景色，又行得幾過癮。(園內為左方便傷殘人士遊覽，設置左好多方便傷殘人士的斜路和電動樓梯架)
約16:51，係時候離開Glover Garden了，去到出口，咦，又接左入另一幢建築物o既，原來出口就經過長崎傳統藝能館的，又幾特別喎！入到去，有一排排的椅，館內燈光都幾暗下，原來係方便大家坐定定，去睇館內那部大的投影屏幕。屏幕播出長崎市的祭典儀式之類的東西，睇左陣走人，兩旁原來就陳設左剛才睇片所出現的祭典用的物件，而臨近出口係賣店。
剛才係傳統藝能館買左d手信，原來出左黎之後的一後下坡路都滿是賣店，行到底就會見到大浦天主堂，對出就係電車的大浦天主堂下站。由於時間都不早，都係要坐車返JR長崎站，而就在大 浦天主堂下站附近原來仲有成100年歷史的中華料理店四海樓，同埋舊香港上海銨行記念館添。由於呢條路線係唔可以直接返到長崎站，一係要到來時的築町站轉車，又或者到諏訪神社前轉車。貪新鮮的關係，選了在諏訪神社前站才轉車，呢次果然係新鮮有著數，那邊的一個公園前正有一班人係度排練埋即將舉行的祭典，好多神輿放左係度添！回到長崎站已經17:40，立即去綠色窗口訂車票，目的地係博多，黎緊呢兩日的住宿點。
由於到博多的特急Kamome
38號要18:30才開出，於是在站前逛逛，逛過站前的百貨店Amu Plaza，又係綠色窗口外，八卦下對面正在直播節目的電台Komome
Studio。節目完畢時走出一個男明星樣的物體，可惜到口唇邊唔記得佢叫阿水。再睇睇到達博多的時間係20:35，於是在月台上買下便當上車就晚餐，亦係貓骨第一次單獨去買便當，考考佢o既應變能力(佢唔識日文嘛！)
20:35準時到博多，行左10分鐘就到達東橫Inn博多口checkin。
午餐：濱田町商店街水車餐廳 (拉麵set + 芽菜炒肉set，共計1,380yen)
晚餐：Kamome 38號車上食站便當 (便當：長崎街道 + 味趣膳)
博多口東橫Inn
713室(第一夜)
今天是行程緊密的一天，雖然我們沒有事前計劃去邊，去到長崎見乜行乜，但，我都覺得很值得一去，特別係睇到被原子彈爆過的地方及原爆紀念館，在此不說誰對誰錯，但，我們實在可以睇到原子彈對當時既日本人既禍害。此外，我覺得那〔原爆者之店〕微微發出悲傷及滄涼的感覺呢！Glover Garden是一處很舒服的地方，我們很輕鬆的行那些有特色的舊屋宇，真估不到可以行兩小時啦！