16.10.2003(木) / 晴

第十二天

終於到行程的最後一日，08:45落去lobby食埋個東橫早餐，食完返上房煲多陣電視先，10:00正才落去checkout。 

去到新大阪站，再買左d食物類的手信，就搵個locker放下行李先。諗過仲有咩大阪的地方未去，於是坐上左JR神戶線去大阪，再轉上環狀線去到新今宮。差不多11:00終於去到新今宮，花左半小時，逛過festival gate同埋通天閣。今年阪神Tiger隊嬴出聯賽，真係去到邊都係果首阪神Tiger隊的音樂播不停，頂唔多順，都係閃。 

離開新今宮，選了坐另一線路，於是坐了JR難波線去JR難波。去到難波漫無目的，四圍walk一walk，行過難波Walk、惠比壽橋通、南海通、千日前道貝筋，最後係淳久堂書店買左d 2004年的月曆，最後回到道頓崛，再次黎到「大阪廚房」的道頓崛，不過都諗唔到食咩好。行到最後，入左去元祖元祿回轉壽司，半個鐘就已經食飽出來(共食左14碟120yen的壽司)，不過味道就麻麻喇。 

回到心齋橋，前面突然有好多人圍住一間商店，行近d，原來係Disney Store開張大吉，入面人頭湧湧，估唔到係大阪有個環球片場，東京有個迪士尼樂園，係一向關東同關西文化對立的情況下，迪士尼在關西的大阪，都勁受歡迎喎！

睇睇時間，又係時候回程喇，黎到呢區，JR不中用，反而地下鐵最方便。10零分鐘就從心齋橋站去到新大阪。由於一早訂左關空特急Haruka，取完行李再回到月台乖乖等車就得喇，方便都不得了。 

14:16乘上關空特急Haruka 33號，約45分鐘就到達關西空港。 而家先3點，在偌大的關西空港推住行李車，行左好耐先去到4階的入閘口，不過閘口要4點先開，於是走返去3階shopping下先，不過賣店唔多，食店多都無用，事關都食飽左囉。行到就黎4點，回到4階等開閘checkin，寄存左d行李，兩手吉吉，行左去英國屋tea一tea，一人一個軟雪榚再加多杯可樂，再買多幾盒手信hand carry上機，之後才入閘。

原來一個咁大工程的浮島機場，都無咩幾多班飛機升降，今晚所乘的CX航班，仲係同JAL合併左成一班機，於是班機就坐得滿滿。18:42航機正式起飛，卒之係香港時間21:10在香港國際機場降落，12天的行程就此完滿結束。

早餐：於酒店內

午餐：道頓堀元祖元祿回轉壽司

小吃：關西空港4階英國屋可樂加軟雪榚

晚餐：於飛機上

香港

Festival Gate

通天閣

難波Walk

特急Haruka