大雄的話

最新的大雄的話

刊出日期:2002630

2002630日,世界盃終於踢完,捧盃的是巴西,嬴兩球都係朗拿度,總入球數仲平左上世紀的球王比利添!不過講到今晚場波,以觀眾身份去睇就麻麻喇!

世界盃曲終人散,商界的五窮六絕日子亦理論上過去,特區亦在董伯伯的管治下剛過去了五年的光陰,咁香港人,由明日71日起,我地又有咩好做呢?

過幾日就係高考放榜,亦即是失業率又要標升;美金唔多掂,美國企業又一個一個咁爆煲;青蟹再度出籠都係蟹,只係變左花蟹,唔通香港人只能做下蟹民,平日最多綁手綁腳,有起事來就一鑊熟,見哂紅?

最近看過多個非常好的廣告,就是那個「香港再造」,可惜廣告還是廣告,話左比你知又如何?真係唔知可以做d咩野黎攪攪個漏左氣咁o既香港,未來五年仲係董伯伯照住我地,將來如何,唯有共勉之!

刊出日期:2002629

今晚已經踢到世界盃的季軍戰,我係屋企睇有線,就有一個好奇怪現象。事緣我家樓下就係沙田某屋村的有名大排檔,呢個月佢地梗唔少得裝部電視仲要開到大大聲吸引人客黎食飯睇波喇!唔知點解,今晚d食客反應,好似果d"~~~~"都係比我家睇到的影象遲左起碼五秒,差不多我係電視睇完入球重播完埋,先聽到樓下傳來"~~~~",點解呢?

土耳其最後嬴左波,仲有世界盃歷史最快的入球紀錄添!我自己就覺得場波麻麻地,腳軟波,不過場內場外氣氛勁好,運動員精神亦一流,踢得斯文之餘,完場都有風度過人,真少見!明晚就係世界盃決賽,大家又去邊度睇呢?

近日一口氣多了幾個遊記的連結,很多個網友都係新嘗試寫網頁的。其實寫網頁真的不太難,平日返工或者做功課都會用到word processor的網友,做網頁查實和打文件無咩分別,多的,就只係連結的形式、圖片的處理,最後係點申請個網頁寄存空間。希望大家繼續整遊記網頁,多些連結多些分享,網頁世界自然大...(抄左商台句slogan添!哈~~ 不過要繼續慚愧,tommycoco,你們的遊記係未整呢!

另外,而家美金唔多掂,攪到日圓日日升,七月好多人去日本旅行呢,大家要學下睇匯市喇!

刊出日期:2002621

日本隊已經收左工,而家我諗好多亞洲朋友都會支持南韓隊喇!對於我呢類唔熟足球的人見解,南韓隊都踢得幾好呀!

不過有樣幾可惜,就係八強都仲有下午賽事,返工又點睇呢?好在決賽的,都在晚上呢!

噚日因事要去一下旺角行玩具店做個小小research,點知比我睇到有set叮噹的食玩糖,好正!可惜果間舖剛關門。今日收工第一時間再去(就係兆萬1樓某專售叮噹產品),櫥窗成套show出黎,好霹靂,有好正的大雄,仲有出木杉、靜宜、叮噹、叮鈴、技蘭、牙擦仔同細佬、技安唱歌look同幻想靚仔look,仲有勁少出現的"女麻女麻",標價是15蚊一盒共16款,有全套及散賣。可惜入去一問,全套的話要賣300(M笨!),散的只有16(五隻係不同樣的叮噹和一個訓晏覺的大雄)。好在我最想要的訓晏覺大雄有得散買,唔係我一定數埋散銀都要買全套。最後,當然只買了兩隻6號仔訓晏覺look的大雄,塗裝幾正呀!點解買兩隻?一隻即拆出黎擺,一隻係儲囉!

噚日係信和賣貴野唱片店買左宇多田光的新大碟,目的同儲大雄一樣,因為大碟入面絕大部份都係上幾隻細碟的歌,於是又係儲。而離貴店不遠的細間店平20蚊,但少了兩張海報,所以今次又唔算貴喎!(聽聞日本方面呢隻碟唔係咁好賣)

刊出日期:2002615

今天係端午節,祝大家人人有\食,日日有工開!恭喜~~恭喜~~

中間低少少彩色長條果d就係龍舟喇!難得放假,今日先黎左個大昏迷十二小時黎賀賀佢。其實本來想早上去影下龍舟,不過訓醒都扒完囉!後來見到城門河上排左幾隻,於是拎部相機用埋數碼變焦zoom到最遠,總算影到龍舟應下節,哈哈~~

今日剛好係世界盃16強的賽事開始,卒之今日睇足兩場波,可惜我捧的日本隊踢時係返工時間,希望踢到8強,咁就可以夜晚睇喇!新聞報導大阪有日本人為慶祝日本隊出線,有幾百人跳落道頓堀慶祝,但第二場日本入了世界盃第一球之日,從台灣作家李道道(北野媽媽)得知,她住的北海道廣野町就有個68歲廣瀨先生在入球後不久因開心得滯而心臟病發去左遠行。而家日本入16強,我諗廣瀨先生都去得好開心囉!而且日本將對土耳其,嬴埋都唔定呢!

刊出日期:200269

日本隊今晚嬴左波,出線16強都有機會呢!不過日本隊都幾個人化標奇立異,紅毛、金毛,仲連眼罩都出埋添!今日球賽仲睇到樣野就係日本人的特性,球場中球員的堅毅同埋球迷的合群性。

世界盃踢左咁多日,今日先算第一場睇得最多的球賽,事關星期日兼食晚飯時間。再者,日本隊係我識得最多球員的一隊,我一向都唔多睇波,但日本隊球員我聽名都比較多,相對於國家隊,唔到世界盃開波,我都唔識一個,而家都係記得個范志毅,可惜,剛聽新聞,國家隊呢次係咁意睇多場就要返鄉下,因為已唔夠分出局囉!

因屋企樓下就係大排檔,所以晚晚睇波時段都"~~""~~~""wow~~~"聲四起,睇新聞d人一有波睇就企哂係d大電視前又係嘩唉wow咁,仲唔睇車企哂出馬路添!但係平日做事都唔見d人咁齊心,如果換轉係大家咁齊心用係香港咁經濟唔好o既時候,大家可以一齊努力齊心叫"發達囉~~~""加人工囉~~~""好景囉~~~",咁就好囉!

雖然呢排個個都係掛住睇世界盃,不過都有唔少人安排下去旅行。今個月下旬就聽到唔少網友會去一下日本旅行,至於暑期想去的,很多亦在安排中。另外,一d想下半年淡季買到平價機票的,亦在籌備之中。唔知你又籌備緊未呢?

刊出日期:200262

五月真係唔係咁順,月頭壞了電腦,整好都月尾,又到日遊經驗募集所用的那個留言板""了幾日,原來係製作人病左,又同時出了問題,好在月底前好返。

近日公私兩忙,真係無咩時間睇日本野。於是網頁更新就梗係少喇!好在仲有唔少人在我呢便留下言、在新聞組又有另一堆網友出下聲,仲有大家係sandy那邊日日夜夜蒲頭,所以仲叫做keepd料喇!

世界盃開鑼喇,不過我本身就唔係咁"好波",有得睇就睇,無得睇就無所謂。記得去屆都係捧左日本隊咁多場同埋半夜起身睇埋個決賽。今屆有唔少網友去左韓國同日本睇波,唔少仲順便遊埋日本添,佢地就好喇!

剛過去的旅遊展,睇到好多網友都"媽媽聲",唉~~香港真係點攪旅遊業架?近日有網友email我提到不如攪個私人fans club或者同好會,大家分享日遊資源同爭取福利,差不多等同民間的振興會,呢個諗法我先幾年都有諗,不過事事需財,多人參與就更加要計算責任問題添!邊個網友發左達,不妨諗下攪返個呢d組織呀,好多網友都有興趣同需要架!

刊出日期:2002520

55日屋企部電腦唔知做咩瓜鬼左,一攪就兩星期先可以整到似返d""形,因為同時幫佢加左多少補品,今次一攪無厘頭使左千幾蚊,都幾傷呀!

呢兩星期,除左要整機,公司亦好忙,所以一攪就兩星期,而家都係剛起返部機,好多software都要重新裝過呀!其間都聽到有d朋友部機又係死左,唔知係咪病毒問題呢?我部機o既問題係咩就真係唔知,激鬼死!

六月就係世界盃,好多網友會去日本睇波,但亦有好多網友以睇熱鬧而去,又或者唔知點解係正六月最多人時間去日本旅行。不過無論係因咩事而去,大家都最好預先book好住宿,唔係好易搵唔到住o既地方架!仲有,唔係為睇波而去的,最好係行程的交通安排下,唔係無厘頭逼一餐車就無謂喇!

本來想五月初黎個「和風商店」大清貨,不過因為壞左機,好喇,大家留意喇,黎緊兩個星期左右喇,「和風商店」大清貨即將出爐!

刊出日期:200252

為左慶祝勞動節,終於訓返一日賀一賀佢,訓醒卒之提起萬二分精神,完成左舉世震驚的第五次聚會花絮。因為某些原因,部份人士的外貌係要求下經過特別效果處理,但travelpooh的外貌除外,因為一影出來就係咁!

噚日買左港產的「麥兜故事」電影VCD和已經在戲院睇左的韓產「我的野蠻女友」。睇左港產那齣,個人觀感麻麻好睇,但後者在戲院睇後都值得再買VCD,大家不妨一睇!

仲有一個月就係世界盃,究竟有幾多網友會去逼下,去趁熱鬧睇下波呢?

「乾柴烈火」的電影仍在上映中,票房不錯,大家要記得捧下場之餘,買返本電影小說睇下呀!何故寫架!

刊出日期:2002426

好不幸地,聚會後我病左,係感冒菌入腸,肚痛左我幾日,好在無肚瀉,唔係就好唔得閒。不過手軟腳軟左幾日,所以網頁都無咩更新,尤其係聚會花絮更加無力去整。點解?因為某些原因,相片部份要加上特技處理,包括打格仔、打黑條,不過大家唔好心邪,我地個聚會唔係因為有色情成份而要打格仔!哈哈~~

雖然仲未捧何故場去睇電影「乾柴烈火」,但睇報紙話幾收得下,另外,發售中的「乾柴烈火」電影小說都好似幾好賣呢!未睇戲未睇書快d去捧下場喇!

刊出日期:2002417

「乾柴烈火」電影小說4月19日出版!由復活節開始有少少病痛感覺,一直齊齊整整平平安安,點知呢兩日就出事喇!頭暈身慶,發燒兼腳仔軟,仲有兩日就係第五次聚會,呢兩日真係要多d休息先得(不過公司好多野做),唔係聚會當日點抵擋得住另外20多個高人呢!

聚會慶幸參與人數有幾多位就有幾多位參加,真係多謝大家比面。

最新加的連結「何故之部屋」,主人家其實就是從前哈囉日本的何故。不過哈囉日本果個自稱「特區第一」的網上電台,已經消失左咁囉!而家的何故之部屋,就係何故的灣岸製作公司的官方網站http://www.wanganet.com/和現在連結的新聞台空間。除左孕育已久的灣岸製作網站外,何故參與和全力製作的電影「乾柴烈火」將於今個星期五上映同埋發行。各位認識何故的網友,記得支持下呀!尤其係「乾柴烈火」小說版呀!

刊出日期:200247

2002最好使好用的假期就咁就過左喇!去旅行的網友都應該返黎,大家一齊再捱下日子囉!

第五次聚會日子、時間和地點已經落實,因為空間問題,場地只可坐30人,現在已有26位網友參加左,唔知仲有無網友想參加又仲諗緊呢?係就快d喇,先到先得架!另外,報左名的網友,呢兩個星期記得諗d好節目到時攪喇!

唔知點解,上星期只返三日半工,但就做到命都無,三日半計落就做左成40個鐘頭工作,唉~~ 所以呢,網友T君,你個遊記請等多陣,返工好忙架!所以你記住比心機讀書,讀書的日子點衰都比返工的日子好過好多架!(通常講都唔信,到出左黎做野就後侮莫及囉!)

刊出日期:200241

玩的日子真係過得怏過打針,無論北上尋歡又或者日遊度假都差不多要返來,唔係老細實打鑼咁搵你o者!我就訓兩日玩兩日,你地呢?

每年愚人節都正好係nobitaworld.com週年紀念的日子,唔係搵你笨架,係真架!唔覺唔覺,由網上痕用戶的網上空間到玩大佢用埋webhosting,有自己的domain name都已經兩年喇,都係時間檢討一下。

呢兩年真係認識左好多網友,有部份仲日日網上見,有部份又隔幾個月的聚會會見到,幾friend架!網頁內容由以往的幾mb,到今日一睇,嘩!60mb,仲有d遊記呀、資料呀未上網添!雖然開始要就住就住(因為電郵空間同網站空間共用),不過都唔可以停架!

今年目標就係成為個人日遊網站中的主流網站,吸引返多d香港網友從台灣網站返黎自己友的網站,開闊多d同日本旅遊有關連的資訊項目、拓闊大家的目光,攪多d聚會,多d吃喝玩樂、搵多d錢、大家去多d日本自助旅行、愚人節快樂.......哈哈,唔知講咩囉!

其實,大家有無諗過整d專題小組(唔只齋講,出力架喎),定時攪下聚會,又或者大家有興趣,成立個網上日遊小組或者正式成立個日遊會(不過要攪好多手續,要去政府登記註冊,又要使錢),為大家爭取多d日遊權益呢?

刊出日期:2002330

昨日是放假的第一天,一日中大部份時間都用上與周公閒談,或許休息充足,放假前來襲的感冒好似走左喇!

今日去了睇韓片「我的野蠻女友」,又幾好睇喎!睇完戲仲去信和買左宇多田光的新細碟「光」同係報攤買左椎名高志的漫畫「瀛男」。可惜後兩者都唔多掂,歌麻麻(上次隻細碟都係架喇!),漫畫仲無厘頭大結局埋添,唉~~ 早知係阿祥哥度買埋果架TOMICA巴士(銀色NOAH款綠盒)喇,我諗會開心d

轉眼假期過左一半,大家又玩左咩呢?日本旅行中的網友們又去左邊玩呢?快樂的時光總過得快........~~

呢幾日都加左多少野係網站上,大家睇下隔離咁多個"",今次都算係咁喇,希望無去旅行的網友會用得著,未用得著都可以當係消閒有d野睇下咁喇!多多比面呀!

而家新聞組都幾熱鬧架,未去的都快d去睇下喇!

刊出日期:2002329

感冒終於係28號晚現身,成個人散哂,又嘔又肚痛!不過我病之餘,個日遊經驗募集所就好返,個網主仲話下星期會換部主機,希望到時會load得更好!

終於捱到復活節喇,好多人都係呢兩日出發到日本,真令人羨慕,可憐我又係放假先病。唯有一句假期訓餐飽,袋袋平安喇!

版面先幾日無聲無色比我改左少少,有網友反映話比較花,唔知大家又有咩意見呢?今日先醒起,大雄的日本世界過幾日的41號就係兩週年喇,唔知大家會唔會同我的慶祝下呢?我就準備左呢個假期盡量整多少少網頁比大家睇,另外,和風商店亦會有少少攪作比大家,所以大家呢幾日去玩之餘,都記得上下黎呀!

在日本的travelpoohgrace,記得晚晚都上黎捧個場,兼報下料呀!andyritatravelpooh有無對你地....

刊出日期:2002322

今個星期又病病地,都係衰感冒,雖則唔嚴重,無咩流鼻水,但係成身倦哂,好慘!

近幾日公司工作唔多,所以度左個主頁新風格,雖則都係搬來搬去,話哂都有30%新的(大約),呢兩日整喇!

呢幾日好多人出發去日本玩喇,下星期將會更多,大家都玩得開心d喇!

唔知做咩鬼,個日遊經驗募集所呢兩日唔多掂,希望係系統的問題喇,唔係就要搵個新架喇!

剛係新鮮情報報導北海道最新名所,不過整完覺得北海道都越來越城市化,將來去日本邊度玩好呢?

櫻花開到東京喇,快d去睇喇! 櫻花情報

刊出日期:2002315

依然係個忙字,但忙得黎好似香港地的塞車情況,就係忙得黎忙完都唔知點解!

網頁瀏覽人次走勢勁,過去五日每日都有超過400人次,留言亦不少,不過,和風商店方面的生意就差少少,無咩郁動,不如遲下黎個"大處分"益下街坊,唔知有無人贊成呢?

停左幾個月的聚會又再開摧了,暫時先在日遊經驗募集所收集意見,過幾日決定後再在網上公開詳情。今次聚會已經係第五次,唔知各位網友有無興趣攪d新意思?例如攪下專題探討、地方介紹,當然,最緊要各位比面參與其中!

過幾日就係櫻花預計開花的日子,大家得閒又去睇睇 -- 櫻花情報

刊出日期:200236

近幾星期,好忙、好忙!做果d野又煩人,每日收工都好鬼倦,好在每晚都可以見到瀏覽的人次一直上昇,近日都保持在每日300人次,甚至400人次以上,過去30日累積人次仲超過9000人次以上添!簡直係生活勞累之中的一枝強心針。

最近覺得大家到日本的玩法已經比以前更加精,同時亦有更多網友會打算一個人或者幾個朋友自助旅行去,亦有不少網友打算做個遊記網頁,希望呢個趨勢一直保持,話哂我都有出左一分力架!

上次提過花粉情報,又介紹過梅花情報,轉眼再黎,連櫻花情報都出埋!時光飛逝,唔使幾耐又到薰衣草,唔知幾時到我唔使捱呢?.....

刊出日期:2002223

呢期有少少忙,忙在工作時多時少,黎親多數急,所以都幾倦!上星期忙於收利是,而家都係時候使下錢喇!今早得識貨人良哥幫襯係和風商店買左個1/4新幹線光號路線牌,呢個係我六年前第一次到日本已經一見鍾情想買的。六年後買個返黎賣,難得有知音人,happy正呀!我的新寵~~

下午去了巡視業務,行左灣仔區玩具店,係東方188一樓的Toys Zone一眼就比我睇到我認識左廿年有多,等佢出都等左兩個幾月的HARO(冬瓜)出左喇!(今日海鮮價HK$299,日元原價3980/2001.12.31的日娛篇已有介紹)真係好鬼過癮,可惜佢發聲部份好似無得調教大細聲,唔係帶返公司擺,一路玩一路做野就正喇!

新年檔期去旅行的網友回來了,即係就快到3low season的網友就出發喇!大家加油呀!(3月出發的網友請留意,呢期係日本的花粉期,條氣唔順的請留意下d 花粉情報先去喇!)

刊出日期:2002211

過了新曆年,一直在忙,轉眼又到了舊曆年了,今日老細少有的皇恩浩蕩地「今日做完d野,四點走得!」呢句說話已經好幾年的做冬、聖誕、除夕都未聽過呢!

今晚會去年宵逼下,但幾逼都比上兩年輕鬆,因為上兩年都幫朋友在年宵賣貨,今年朋友在澳洲,所以可以做返顧客囉!在此先祝各位年年有假放、歲歲去日本、次次買到平靚正野、玩個不亦樂乎!

此外,過兩天就是情人節,係度祝埋各位甜甜蜜蜜,多d拍拖遊日本~

刊出日期:200228

呢排公司又忙返,今晚都八點半先收到工。跟住去旺角,打算行下旺角電腦中心,點知一出奶路臣街,嘩~~~~~~,咁多人o既,又唔係變左行人專用區,仲有車行架喎,但成條街都係黑漆漆的人頭,兩邊都係小販。行到旺電門口,兩個平日勁多人圍住的報攤同埋旺電個lobby,人影都唔多,事關比班小販吸引左,仲有隔左班人出馬路,所以沿路的舖頭都生意淡薄,但肥左班小販!行完轉出花園街,不得了,又係成條街都係小販,但又有小販管理隊係街尾傾緊計架喎!

而家真係唔知咩世界,小販賣的貨,唔好理佢正版定老翻,十零廿蚊大把選擇,難為比貴租的舖頭,咁落去遲早執笠。而近幾日比萬幾蚊以上租個幾日年宵檔位的老細們,今次真係恭喜佢地發財囉!呢邊咁旺,仲有人行去花墟咁行花市?

講返少少同日本野有關連的,就係叮噹新電影係香港上畫,今次好大宣傳,旺角地鐵奶路臣街出口無論柱同通道都貼滿叮噹,有d好似去左日本地鐵咁,有d衝動埋去影下相呢!上星期六首映有戲飛,撞正去飲無得睇添!

刊出日期:2002131

左面就係勁平box set(仲送埋警車),右下就係果架貴野(激鬼死!),佢上面呢,就係迪士尼resort的巴士呢!近半年突然愛好TOMICA出品的巴士,而家已經有43(d都百幾兩百蚊一架!遲下會係日娛篇為大家詳細介紹下!) 話說先個星期係先達某玩具店買左架就咁有個透明盒包裝的2002年七福神的TOMICA巴士,因為未見過,所以即比99蚊買佢。點知,先兩日行過係旺角新世紀天橋一落黎那間由先達搬黎的玩具店,唔入由自可,一入...嘩!原來真身係box set,印住2002 edition仲加隻馬仔樣。咁都未止,仲有係除左架七福神巴士外,仲有路牌加紙做的board game,另加神秘的六架車其中一架的特別版TOMICA其他車,再望價錢,嘩..... 80蚊就有成盒,唉...之前買果架蝕左囉!陰公~~ 

第四次遊記仲執緊相,但執左三日半相就已經有近二百張(頭尾都係六日咋喎!),而家新遊記形式會以影像為主,大家再等等。另外,病毒電郵而家每日仲收緊百幾個,真慘!

刊出日期:2002126

被病毒電郵攻左15日,大約收左過1000個病毒電郵,台灣的雅虎奇摩終於係事發後第13日通知我果個電郵戶口已經被佢地停左,可惜呢幾日仲收到日日過百的病毒電郵,真係唔知佢地做過咩,同做埋佢地係唔係路?咁o既野都要攪十幾日,真係唔得佢死!

近日都幾忙下,遲下又到過農曆年,大家會去邊呢?經過連續兩年幫朋友係花市賣野,今年唔使,終於可以自己去玩返下。做年宵係睇落好玩,但臨尾一日通宵都幾辛苦,加上叫賣同講價,真係玩一晚要訓返幾日先補得返!今年就睇下抽唔抽到時間整好上年十一月的第四次日本遊記喇,最近日日拎住部notebook,係公司得閒就關黎執相,但因為今次用數碼相機影,實在太多相喇!

最近加左投票項目,現在先投一下書本,遲下加埋旅行社呀、旅行地點呀、旅館等等,大家有咩提議即管出聲喇!

刊出日期:2002121

上次講到同台灣yahoo.com.tw來的病毒電郵對抗左六日,點知去到第八日,比佢玩到網站個email癱左!當日收到155個病毒電郵,好彩web hosting公司的工程師幫忙delete左,唔係就大鑊,事關台灣雅虎奇摩簡直係廢o既,網站咁有規模,少少野都做唔到,簡直當d受害者係"臭四"!當晚我仲向台北縣的警察局報左警,之後係收少左病毒電郵一日咁多,但今日又有廿幾個,還幸我set了在伺服器就delete左佢。雖則暫時都唔會浪費我時間下載同處理,但佢咁黎,一樣會塞爆我個網站容量,唉~~真係唔得佢死!其實,而家日日都收到不少垃圾電郵,好多都係台灣來的,再加上有時在留言冊上遇到又係台灣來的無聊人,真係替台灣的先進電腦技術不能全用於正途而悲哀。如果多d好似馬市長咁一聲令下就整頓好,咁台灣的成就將不至於此!你地又認為如何?呢幾日好忙,過兩日有時間,updated內容比大家睇!

多謝杏子替我在台灣發email"那個"病虎奇魔和哈日杉對哈日杏子的解釋。杏子又快到日本了,順風!

刊出日期:2002117

真係激鬼死,由上星期六12號起,一連六日,收到超過200個,容量超過50mb的帶有how are you病毒的電郵。來源都是同一個台灣的雅虎奇摩的電郵(即係@yahoo.com.hk),於是第二日再有咁o既情況時,就寫左比台灣雅虎希望佢幫幫手斷絕左個為害人間的來源電郵帳戶,點知去到第四日,投訴信的內容由溫和到不客氣,內文文字由正常的黑色轉到36 font size (最大值)紅色文字,才收到一個小小的回覆,但這邊回覆讚佢多謝幫忙,轉頭又收到一個病毒電郵。

今天更破了紀錄,一日就有120(五日加埋都無咁多)20mb的容量。除左煩,仲好影響我上網架嘛!最衰佢就係無咩回應咁,我就黎要搵下阿扁投訴一下!

台灣yahoo,執左笠嗎?

刊出日期:2002115

咁又到月中,就快要交稅,不過知道唔少網友亦就快去日本旅行,真令人羨慕呢!錢呀~~錢呀~~

呢排公司話忙又唔係,得閒又唔係,總之無端端又好多野做,無端端又無咩野做咁。最大鑊係瘟神變左病君,據說瘟神目前所帶的病毒已經進化至第二代,還無堅不摧咁滯,真係行過都領野呀!今日佢就唔知做咩咁關照,比左一堆file我做,又一日行黎幾勻,攪到我而家又病病地!真陰公,人家剛病完兩日又黎喇!今日見勢色不對已經係勁補維他命C仔去頂住佢,點知而家都包起雲吞來,真係無陰公呀~~嗚嗚~~ 病就咪行黎行去喇,唔病時就曉事無大小都打inter召人入佢房,而家就起勢做人肉流動病毒散播機!天呀你睇!突然升到咁勁喎!平日係2-3百咋!~~~ 

今日好勁,網頁瀏覽人次由平日二三百突升至553人次!嘩~~ 攪到有少少慚愧,呢期無咩update內容見人添!各位留意喎,舊留言冊唔多掂,已經係首頁取消左,如果大家係其他版面見到而進入左,唔該轉到新留言冊!

刊出日期:2002110

籌備左差不多一個的聚會又完成了,今次仲有台灣來的哈日杏子,唔知有黎聚會的網友覺得今次聚會好玩嗎?係就下次又再攪喇!

年尾公司勁忙,年頭幾日都係,跟住就到公司我坐的那層小裝修,再加上比人欽點左返公司睇住裝修兼整完後裝電腦裝電話,攪到好鬼倦。裝修的同時,亦收到唔少公司辦公室政治的料子,再加上裝傢俬果個sales唔掂,攪到今次換傢俬變左老細有點好心做壞事。

本來的位置,比個熟客仔形容為十年前的裝修新的位置,雖然細左,但有左個人空間感

杏子來港,本要盡下香港好客之道,點知本來要同佢薦行的今日,一早起身就病鬼左添!好慘!醫生仲叫我聽日都咪返工添~~唉~~ 杏子,一路順風喇!

返回大雄的日本世界首頁