大雄的話

最新的大雄的話

刊出日期:20021231

背景係富士山黎架![圖片製作:大雄]2002年又到了最後一天, 大家有無點算下今年去左幾多次日本旅行?總共幾多日?買左幾多野?出年又plan左幾時出發呢?據我所知,不少朋友都會在明天出發,初詣之日到日本,記得去下神社趁下熱鬧,之後拿拿林去百貨公司掃返多少福袋,包你全年精神爽利!

回顧過去一年,大雄的日本世界增多了不少網友們的網站連結。今年,有不少網友都排除萬難,成立了自己的網站,認真百花齊放。而大家除了在年內的三次網站聚會出來碰面外,還多了不少各式活動呢,很熱鬧、很愉快啊!

而我自己呢?今年工作頗忙,再加上公司有d不濟人物,做到....~~ 好在放工上網有大家,真係心身舒暢左唔少。網站方面,發展平平穩穩,還剛好在年末達成19萬瀏覽人次,期望20萬人次的來臨,到時要賀一賀佢呢!

最後,預祝來年年中富士山登山隊各成員攀登富士山成功,祝各位有旅行無辛苦,大家搵多d錢!

刊出日期:20021224

近日返工真係忙到飛起,因為大家清大假,經常四野無人,加上我個位自成一角,做到要生要死都無人會知。仲要加上有時一些工作、客人、突發事件好日人齊又唔黎,無人無物時就排山倒海而來,激死!今日仲到出現無頭公案,正宗口講口回,死無對證,換來我臨收工前一段時間所有要箍file的橡筋都專挑紅色,另再整多兩條係手,實行邪到佢盡先得!(話說我呢行從前箍file是用絲帶,一般都會用到紅絲帶,但而家橡筋方便,都無人咁笨用絲帶綁,但而家遇有黑仔或者邪file,都會挑紅色橡筋邪一邪佢!)

講左d悶親人公司野,講返句聖誕快樂比各位先,由於一直公事忙,亦預計黎緊幾日私事都會有點忙(哈哈),無暇逐一發出聖誕e-card或者回覆已收到的e-card,所以在網頁向各位祝願聖誕節快樂!特別係有送我聖誕e-card的靚媽咪Venus和佢個細菌小子打扮的屎撈BIrene(松隆子)同佢隻貓、一打師姐、牛文,仲有特別係加拿大的安仔聖誕及生日快樂。

至於今個聖誕假期未能到札幌、小樽、神戶、仙台、新宿等地睇燈飾的網友,希望香港的燈飾一樣令大家開開心心渡過佳節!

刊出日期:20021213

一連三個星期日,都係早起,分別係為了行山、考日文試和行山,但過去幾個星期一都剛好拿了大假,所以當大家行到腳仔軟,我第二朝都可以攤返夠本先去街玩,唔使返工做野。

但剛過去的星期日在冷風寒雨中行足幾個鐘,第二天就要返工,因為2002年的大假已經放哂,於是一邊返工一邊腳痛,再加上阿女麻家的裝修工程剛完工,夜晚收工仲要返去置傢俬,又拖地又砌櫃,手都痛埋,真係人都癲呀!

又到年尾聖誕,大家又開始組織大大小小的聚會,想到網站的第七次聚會,我想安排二月中後舉行好唔好呢?等各位聖誕新年和農曆年去完旅行返黎,執下相先出來嘛!

上圖係剛過去的星期日行山時帶埋我的新寵1/8比例的mini haroo既!佢係昂平營地影的相,幾型!衰在當日落雨,唔係仲影多d呀!(佢另有相係某以狗狗命名的網站搶先出場喇,係同豆花和豆漿的合照呢!哈哈...)

刊出日期:2002122

剛過去的星期日,我諗香港有幾千人拎住呢張野出街,咩黎?唔係行街紙,係日本語能力試驗的准考證(大家千萬唔好考完就丟左佢,出年三月拎成績都要佢架)

今年我挑戰二級,正宗二仔底死跟,自問去年三級都肥佬(前年四級就合格),但一直有流言三四級會合併同埋三四級的程度差不多,所以三級考過就算,都係繼續上考下二級好d。呢次事先收到料兼有事先張揚,前港姐李x欣都考二級仲要同場考試,所以今次考試基本上未夠班去考,都滿有精神,事關有靚女睇嘛!入場一直見唔到,好在休息時間一出試場就見到,仲有據聞係佢家姐的靚女出現添!賺囉!前後望了四眼,考試唔合格就預左,但有靚女睇,抵返呀!抵返呀!

考試前後,我自己和同行的網友都分別撞到唔少前度同學仔或朋友,雖則好多都係打個招呼,但有緣定會再見到!

至於考試場地,國際展貿中心(俗稱九展)的交通和位置認真唔多得,但勝在地方大,聽解部份用的耳筒和接收都幾好咁喇!

好!來年再來二級,邊位老朋友又考,到時見喇!

刊出日期:20021124

嶂上許林士多馳名香滑豆花,盛惠五蚊雞!大家唔好誤會,呢幅相唔係為久未更新的飲食篇作最新報導,呢碗係西貢嶂上山中一士多聞名的嫩滑豆腐花,一碗5(另有冰凍豆漿,盛惠10)

呢碗豆花除左好食,亦令我覺得人其實都可以好簡單,5蚊雞的一碗豆花,可以令唔少唔多願郁的人星期日大清早走去行麥里浩徑最難的第三段;令行到倦的人沿途由呢一碗食過知好味或未食過好想試的豆花,連拖帶拉都要到達盡早去到試一下,為的只係怕佢賣哂無得食;令人向沿途迎面而來的陌生行山人開口問知唔知士多d豆花賣哂未...原來,豆花都可以咁有魅力!

今日行山都未開始,在巴士上因為一份日本東北某溫泉的單張,引發原來某人鄰座的原來都是去行山的日本人,雖則語言隔膜,但要溝通總有辦法,簡單日語、簡單廣東話加流利英文對答,於是又可以說一大輪關於旅行的事。同時,亦發現除了西人,亦有唔少日本人都愛行香港的山,但對於香港對於生態旅遊的推動和規劃,只得一個失禮人家的評價!

有無人記得我買左架BitChar-G的遙控巴士?話說全套四架我已買了兩架(一架自己,一架送人),而家終於另有朋友買埋另兩架,哈,遲下可以砌車囉!

仲有,大雄的時光機特別篇得到不少網友的共鳴和興趣,待我有空找點還保存的玩具、事物介給大家。

刊出日期:20021118

上回那個遙控巴士的確玩得很開心,尤其返工呢期都好忙,得閒有d野玩下真係幾好,relax

黎緊的星期日,又是一眾網友趁秋高氣爽準備行山的日子,今次是挑戰麥里浩徑第三段嶂上、企嶺下,即是最難的兩段(第三和第四段)的其中一段。照形勢,麥里浩徑將在不久將來給我們一班網友征服,因為只要過了緊接的兩段,餘下的六段都比較容易的。

現在距離日本語能力試驗只剩兩星期,報了名的你,又溫習了多少?今次很特別,應該所有級別都在九龍灣展覽中心進行考試,和過往分別在四個不同地方進行有所不同。跟據在網上的留言消息,已知道有很多位網上常見的網友當日會考不同的級別,所以已在籌備緊考完試後去威呢!你又有咩好提議呢?

剛收到關西兼祭典王TONY的新網頁連結,加上今天是對他的網頁特別的日子,所以趕急於今天推出,大家也去捧捧場呀!

同時,我亦在大雄的閒人世界推出了「大雄的時光機特別篇」,想知道大雄的童年居住地和玩具,快去看呀!

刊出日期:2002118

新歡遙控都營巴士和前陣子買的93號巴士今個星期頭放了三天大假,為的是阿女麻的家需要裝修,工作天即只是兩天半,但不知何解,一返工的工作量,點解係多到好似做埋放假果三日咁多o既?咁放假黎做咩呀?雖然工作上忙得過份,還 加上某同事"差不多是凡事只做一半,出糧除外"一事而令人生厭,但今天出外工作時一個驚喜,差不多令工作的不快一筆out"一日咁多"

事緣因工事在外,行經樂富的某玩具店櫥窗發現一輛TOXY的小遙控車,還要是都營巴士款式的新出品,於是將店內僅有的兩款都買了,一架送禮,一架自用。在那店買是兩架500蚊找返兩蚊雞,但後來在灣仔的玩具街看到,第一間店賣399,第二間299,最後一間是279。原來我用249蚊買一架,是暫時最平的了,賺喇!

話說回來,四款是包括都營巴士、東急巴士、京濱巴士和京成巴士,簡直是一見鍾情!想睇下相,去TOMY的網頁看看吧!

有遙控巴士玩之餘,仲有"今晚madam請食飯"wow,萬歲!

刊出日期:2002116

上面係剛過去星期日(4/11)一行十六人去左日本人都喜歡的香港生態旅行時,在咸田灣過木橋時影的。圖中阿邊個同阿邊個一個拉住一個過條橋,正如各位呢期一個跟一個去日本玩,但就無我份,事關我在影相嘛!

今次已經係第二次行山了,但對於一眾熱愛日本旅行,都算幾係嘆慣的網友們,對幾辛苦,一日行差不多七個鐘,又無得shopping、又無壽司刺身食、又無遊樂場玩,但由於部份網友已經轉向去日本時多去戶外景點,而家趁香港秋高氣爽,行山的確又係幾好的運動來呢!

日本最北端之地碑刊出日期:20021031

唔覺唔覺又過左十日,仲要係十月就快過,計落仲一年都就快過,唉...歲月催人。

近日身邊友人出出入入日本,東京、東北、大阪、北海道,聽得我很無癮之餘又很過癮。無癮者,人地去旅行我無得去;過癮者,唔使我花錢去都有最新料送上,隨時仲有新鮮手信送上添!

聽得人多去旅行,不期然拎d以前去旅行的相來看,加上這兩星期電視又有北海道特輯,於是找了上面那張我獨個兒在稚內宗谷岬的日本最北端之地碑拍的照片(拍攝者志村大輔,京都人北海道大學學生,但已失聯絡了!)。那次到北海道是失驚無神地去,全無預先安掛,當日在香港上飛機,只有機票和14天的JR Pass,除第一目的地崎玉大宮的友人家外,真係訓醒先諗。話說旅程的第三天從榻榻米起床,對著未起身的友人夫婦說,我要去北海道,然後就提起行李出發了,友人夫婦睡惺忪地送了我出門,如是者當晚已人在北海道札幌了。這是一人旅行的過癮之處呢!過癮、回味......哈哈!

目前沒遠的旅行去,但總算組織了一班網友去下香港的生態旅行。很高檔吧!說實在,咪係行山囉!係今日又行左未呀?

你見過佢地未?刊出日期:20021021

上次趁重陽假回舊居執拾放下了十多年的玩具,其中找到四架沒有在當年搬家時拿走的遊戲機(何解沒有拿走,真是個謎)

圖左紅色的神奇小子的遊戲機,十多年後今日真的很神奇,用力按著開關就能玩兩下,但一鬆手就...所以玩不得!右前方橙色的是漢堡包遊戲機,玩的是客人叫出五種食物中的其中幾種,然後控制一個角色去準確集齊客人所需食物。後方是任天堂殿堂級高空擲物,可惜壞了!最後的是一個電腦型高達遊戲機,操作勁正常,但手感勁差。

除此之外,還順手拿出搬家時有拿走的放返兩粒電池來玩玩。卡西歐的賽艇機、超唔好玩的超時空要塞遊戲機、已爆畫面但仲有聲的高達機(記得佢勁好玩架!)、神神地的太空侵略者遊戲機、任天堂blackjack雙面機、oil panic雙面機、壞左一半的三畫面模型神童三四郎遊戲機、對戰的伊賀對甲賀遊戲機、原來仲有電池攪到壞左的田徑比賽遊戲機等等....講左咁多唔知邊部,搵日有心情再從櫃的深深處拿出來時拍個照給大家看!但下次,可能係十幾年後囉!

過兩星期或會再去行山,有緣人又有興趣者,請與我聯絡。

刊出日期:20021013

釣魚翁遠足徑黃昏景40多人聚會後的第二個土曜日,其中十個網友成功出發去行左位於清水灣半島的釣魚翁遠足徑。行左四個幾鐘,由下午三時從清水灣道11咪半出發行到布袋澳那邊的終點,難度由權威行山人士SAM評定為2粒半星(五星最難)。行山雖有人會覺得搵黎辛苦,但行下傾下又影下相,係幾好o既活動黎架!下次又睇下攪去邊呢?小妹又會唔會去呢?wahwa又會唔會去呢?仲有Tony呢?地下車?唔通1975年時,新幹線係地鐵嗎?

行完山,今日就因為阿"女麻"間屋比政府要拆違例建築而要返去睇睇和執下十六年前搬走時剩下的玩具、公仔書(我由出世至十五歲時都在那裡住)。事隔十幾年,好多玩具都不知幾珍貴,不過好多都D左,唯有影個相留念後就忍痛丟左佢喇!當中仲有小學和中學時讀過的書,其中在一本「香港教育司署新六年制課程 新編模範社會 四年班下學期 (197510月修訂版)」搵到以上一張相。內容係講交通的發展,原來我四年級已有緣睇過新幹線列車,不過點解圖的註文係「地下車」()好在我大過仔時去坐過,仲知係地面行的,唔係話比人知果架係叫地下車,比人笑到面都黃呀!(p.s. 究竟仲有幾多教科書"老點"左我地架?書又賣得貴,野又亂教o既?)

西貢海下刊出日期:2002105

第六次網聚後,網友們很快又在提議下一次聚會的地點。露營?年紀大,不好了吧!宿營?日以繼夜,正呀!但邊個會帶咁多相簿去呢?

討論還在進行中的時候,新的聲音又來了:關西/祭典王Tony說:「在聚會時說了,相約去日本吧...」、Vicky就定了「富士登山看日出之旅」,估不到反應熱烈。不過富士山要夏天才能上到山頂,於是「熱身之行」就出來了,先行一下香港的山。

說到行山,問到我這個「中環會社員」,答案梗係「少行、少行...」說到在香港,近年只去過西灣和海下,當然行的,都是簡單、輕鬆的行程!

在日本,應該是99年在登別一人行了地獄谷一遍,行到了大湯沼再回程,路程約個零鐘。這趟行山,發現日本人將那條登山步道鋪得很好,很容易行,不少路段都有用木圍著中間有點碎石的梯階,有點就鋪有香港的遊樂場都用的膠墊,沿路又有一問一答的關於地獄谷的資料,從第一個牌看了題目,行不遠的第二個牌就有答案和下一題問題,如是者邊看邊行,又行得幾開心喎!而且人家的郊外很清潔。山多的香港,日本人都愛來行一下,可惜,我們就有大量的山頭垃圾,認真失禮人家呢!

刊出日期:2002930

講明要攪鬼樣的聚會大合照記得在書店見過一本書,書名好像叫做「旅行是一種生理需要」。的確,旅行是一個可令人,特別是生活一向緊張的香港人一個短暫的整個人鬆弛機會。雖則香港人在旅行時還是那一批走路都快過人,總是脫離不了"緊張"的一群旅人,但能夠讓"身心"放幾天的假,那是一種截然不同的"緊張",多"緊張"也沒打緊。

旅行的好處,其實不只輕鬆了一生中那短短的一刻,如果好好的將它延續,旅行是一種一生受用的需要。

929日剛完成了第六次網聚,與會者不論剛去完旅行,還是很久很久以前才有機會去過一次,只要聽聽人家說說旅行的經驗,又或者看著網友們精彩的旅行相片,旅行再次發揮了它的作用,娛人樂己,八小時長的聚會很容易又結束了 。我想,旅行的確是一種生理需要,咁~你今日又去左旅行未呀? (p.s. 我諗都好少網聚會一日八小時咁長,下次我想要去宿營先得喇!)

數數看,剪綵嘉賓11人中,四人是穿警服,還有中間穿西裝的是某某警官和夫人,即是警察都佔了6人!!刊出日期:2002922

如果今天的我已過了一生人,那我有半生人是在銅鑼灣大坑渡過的。每年中秋節農曆十四、十五和十六都會有傳統的舞火龍習俗。搬離了大坑已十多年,最近兩年都有回到大坑看看舞火龍,順道用數碼相機拍點照片作個記錄,留個紀念。

香港大力推動旅遊業,這個大坑舞火龍一連三天,是3/365天能好好用作推介給外國的好節目,可惜觀乎這兩年所看,習俗已變成警民關係的一個活動。正式開始舞火龍前的約半小時悶人剪綵、致送紀念品、為龍頭掛上意頭的裝飾(但裝飾好拍了照後,工作人員已需一湧而上十數秒內將所以花了十多分鐘的飾物除下,方便插上香枝,真無聊),警察高層多於主禮坊眾,維持秩序的警員團團圍得拍友都甚難影得好照片。在身後圍觀的老街坊都自歎習俗走了樣,無奈的等候無聊的攪關係儀式完結,唉~~~香港傳統和香港旅業,邊有得救?

刊出日期:2002919

風雨終於過去,呢兩日天氣非常熱,又晒,外出工作真辛苦。不過有苦亦有樂,先兩日去到大埔布心排村收樓,未夠鐘時去了村口的士多食個鮮油多早餐,一邊食一邊同士多阿嬸養的好大隻公雞玩,都幾身心舒泰。話說隻公雞好似d狗仔咁有性,見我食野就圍住我轉來轉去,又伸長條頸睇住我食麵包,於是比左少少比佢食,食完又圍住我轉,好過癮!當日仲藍天白雲,後面又青山,前面又有綠水(唔係賓妹果隻),可惜正想同""影相時就要做野,大家有時間不妨去探下"",村口士多就係佢屋企喇!

呢輪四圍去收樓,有空就拿部數碼相機出來拍一下物業窗外風景,大家有時間不妨睇睇「大雄的香港世界」最近幾張相。一個在九龍塘半山上大宅,係廳就可以望到正面的獅子山,一個係火炭某屋苑最高層,主人房落地大玻璃望住沙田馬場,雖則風景都不錯,但點都唔及某日行過竹園時影的那個獅子山背影來得親切。當日豪宅的業主,而家身家隨時係你和我的負N倍,真的不知是悲是喜!

第六次聚會地點已定,下星期日29號就係,如果你已經報了名,請儘快作最終確認啦!

刊出日期:2002911

本來只話最多掛三號風球,點知未到正午十二點又話改口"可能"掛八號,卒之政府部門雞風狗走,好在今日我都做完主要的工作,於是安排好明早的工作都可以返屋企。

今日剛好係美國911事件一週年,香港就遇上突然掛八號風球,由1155分我在收音機知道即將掛八號起,手提電話已經好難打得通(我已經係用最貴果間,仲係長期客仔添!),之後連固網電話都係咁(都係用全港佔有率最高果間),連send短訊都要兩次先出到(又係果間貴野),真係今時今日咁o既服務質素點得架?真削!錢就識收得貴過!

如果連這個號稱國際大都會o既通訊系統都咁削,有起事上黎,真係仲亂過去年911的紐約都似...唔通,今次颱風係恐怖襲擊?

好喇,大家今日多了半天假,好好休息一下吧!

刊出日期:200297

三個星期的地獄式工作暫算結束,下星期一頂替的同事就會返工,他是認識十年的老友,應該好合拍卦?哈!辛苦左咁耐,難得最後一天,竟然坐爛左公司張椅,好在個位置地方淺窄,坐落去時又輕力,一手按住臺面,所以無整親八月十五,但會唔會係位置不保的兆頭呢?不過係又唔錯,家陣都幾想換下環境喎!哈哈~~

這兩天在會展有日本秋祭,明早就約了幾個網友去睇。聽聞今日去左的幾位都話拎左唔少紀念品。

到左呢個月尾,就係第六次聚會喇,希望呢排工作量少返d o既時候,可以出多d力攪好佢喇!

 

刊出日期:2002825

這是一張由愛國站通往幸福站的車票,但很對不起,不是坐前面的D-51 SL型列車、KOMACHI500系列車就能到達。咁究竟佢地係咩東東?哈哈,先按一下這裡[開估]

其實它們分別是有幸從住在北海道的北野媽媽寄來的幸福車票postcard,而前三面三架車就係扭蛋玩具,一架是拉尺、一架是擦膠、一架是磁石貼呢!(其實還有山手線和700系的原子筆和L特急的電筒仔,共十款)

雖則幸福已在我手,亦已經有火車準備好比我坐去幸福車站,可惜近日勁忙,過去六日的工作時間是14+12+12+12+14+8=72,即平均一日工作12小時,和看更的工時差不多。所以而家就算有幸福比我,我還是選抽點時間去訓一覺勁好d卦!(鳴謝:北野媽媽給我的幸福車票)

刊出日期:2002815

講真的!同前幾日果張唔同架!今日係拍檔了幾年的同事最後一天在公司捱世界,祝佢由明天開始搵多多錢,從此生活"無捱"

由於交接時刻,^上的files陣短時間內極速膨漲。工作間變成了由files造成的洞穴,而我這個現代洞穴人困在由files堆成的洞穴內,要看看有光線照出來的monitor,請先將身體向右側移動25度,頸向前伸3吋,然後將雙手伸到被file差點蓋實的keyboard,再用心眼去睇睇要打字的雙手手指有無放錯位,要用mouse嗎?請先移去上層的files,相信小老鼠應該躲了在files製老鼠洞內了......

晚上九點九終於逃出洞穴,1059分坐在太子別府餐廳找尋我的午飯。看著剛送上^來的29號菜色"燒牛肉飯定食"和一罐要12(未計加一)的玉泉忌廉,啊!原來做左12個鐘有多,就係為左呢口飯喎!咁究竟幾時先到我有"無捱"的生活呢?

網頁聚會的報名大大超標,都係時候去解決邊日開聚會,再確實人數喇!o拿,唔係唔提你地呀,要報名就趁手喇![詳情]

刊出日期:2002811

上圖係先兩日公司^面上壯觀的files陣,仲要係臨收工執一下先有咁整齊,至於工作中的實況,真的無謂拍喇!做起野上黎亂到連無線mouse都可以無位放呀!

忙、忙、忙....就係過去幾星期我的生活,預計未來一段日子亦如是,所以日日有追「大雄的話」的各位仁兄仁姐,真對不起,上一篇要你們連看了廿多日,唔知大家識背了嗎?

原來的投票環節,因那個投票的網站給收購了,唔睇一排,幾個投票區的寶貴結果通通人間蒸發,而家唯有取消投票的環節喇!

第六次聚會已經有40多人報名,係咁多次以來最多的人數,你今日又報左未?[詳情]

刊出日期:2002721

不經不覺距上一次寫大雄的話已經有21日,中間的日子公私兩忙,工作一直在忙,為的都係個個月都係咁多果份糧。所以最近返工企住火車出九龍塘再企到返中環的途中,又再度一下如何改變忙碌的生活....

多謝Grace報料,等我在忙碌過後,買到想買的大雄和靜宜的食玩糖,這是一對的,以前的食玩糖都未出過,正呀!

暑假已經開始,很多網友都趁暑假或這個夏日的好日子紛紛出發去渡假,祝大家有個愉快的假期。而我呢,暫時都無咩時機放假,唯有書中日遊。剛好在書展買了蔡瀾最新的「六談日本」、胡金翔的「放浪日本」、石森章太郎pro的「新日本經濟入門」和北川悅吏子的「長假」小說,這個暑假各自各精彩吧!

上次聚會已經三個多月,大家係咪又有意思攪攪佢呢?如有提議,不妨講出黎喇!

返回大雄的日本世界首頁