大雄的話

最新的大雄的話

已經是2006年的聖誕節了!日子過的真快,一年將盡,大家又要不要趕在大晦子之前來個年結?今年共去了多少次旅行?多少次是去日本?拍了多少張數碼相?又有多少段數碼片段?吃過多次款日本手信?又看過多少少齣日劇,又或是日本電影?

今年我趁四月去了一趟櫻花之旅,前後11年日遊遊歷中的初次櫻花之旅,還要是分別和中學同學何sir和兩家族的網友,包括食家萊和密語嫂,還有cityphone家族,又豪花一晚入住淺間溫泉,還入去過JR海拔最高的野邊山,還有住上一晚看了那漫天的星光(雖然溫度只得幾度凍到入心)和親身體驗了漫天的雪花,絕對成了八次日遊之中最愉快的一次。

那除了愉快的11天櫻之旅,餘下的日子在香港又做了甚麼呢?閒時弄點新款式食物吃,從書店買來和日本有關連的書看,偶而看看食譜(又未必會跟著煮,因為有時介紹的材料要特別去買,所以都係買成的食較化算),此外四處走走,時而拿著買了3年快門掣壞壞地的相機snaphot,最後就拿著入手約2個月的PPC用那200萬CMOS鏡頭拍拍照。

這年頭香港的特色隨著發展漸漸消失,街道文化早已煙沒在新社區,舊有的又在一片重建和發展中漸次陷落。對於愛逛街市和愛在街上四處邊行邊望的我,唯有閒來拍個相留念,希望在未來的日子還能夠再去逛逛吧!

祝各位聖誕快樂!

P.S. 今次的三張相片都是PPC拍下的,還做了點後期執相。
頂圖:放工時間後的花園街,查實當時很想拍到生果檔的紅色燈罩,可惜CMOS鏡頭已盡了最大的努力也只能如此。
中圖:外出工作後回公司途中,突然很想去拍個照,不知是有幸還是不幸,拍後的當晚已給人拆去了。所以特別在後期用上sepia以示紀念。對於新聞說在它還在的最後幾天,一班誓保鐘樓的人行為激動,我反而覺得不算喇,幾十年前,人們為它加價斗零都攪到暴動,今天的行動已經很理智很溫和了。
下圖:12月23日在人頭湧湧的尖東海傍拍下的港島海岸panorama照,利用PPC內置的拍照模式併合,算是不過不失,只是中環廣場位置有些少穿崩了!

大雄
2006.12.24

又過了一個月,有幾個網友都已經去完日本做"楓人"回來,而我呢,這一個月邊忙屋苑業委會的東西,邊應付公司的工作,我想黎緊的聖誕,應該可以略為輕鬆一下。但過去一個月雖忙,但都有唔少野做過,大家不妨看圖識字睇睇...

11月15日,見魚缸唔多掂,卒之買了包小精靈返來食藻,從此魚缸乾淨了一排11月26日,得閒無野做,拎左幾年前送給貓骨的RN公仔與新買的大雄合照11月18日,係反斗城買了個按了會發聲又搖的玩具給銘希仲買左份音樂八爪魚給阡晞
11月19日,雙希/晞到訪(後為阡晞媽咪),點知影張相出黎變成咁...
11月18日,黃昏的荔枝角公園一角,係咪幾正咁呢!11月26日,得閒無事買左棵菜芯,黎把菜花出黎玩沙龍...
11月25日,沙田新城市廣場的聖誕佈置,仲有捐錢影數碼相活動,承惠20蚊11月25日,新城市廣場3期嘆tea,好耐都未試過喇!12月3日,諗唔到煮咩餸,隨手整了生平第一舊烤豬腩肉,都ok喎!12月5日,優先訂購的Keroro軍曹地鐵精品到手,伍長最正!12月9日,去太古新開的Uniqlo趁墟,都買左4位數字出來...12月9日,除左睇Uniqlo,商場入面有百老匯式歌舞表演12月9日,沙田禾輋商場的聖誕裝飾,幾正,仲要玩日本feel12月10日,約左去西貢BBQ,未夠鐘先隊左幾蚊腸粉加魚蛋,好令人懷念呢!12月10日,西貢BBQ,雖然唔算平,但各方面都算ok,而且家下西貢都幾悠閒feel,輕鬆!12月10日,11月初獲救的小魚,已長大了些少和添上了紅色,快d長大可以換佢入大缸就好了!

還有2星期就聖誕節了,大家又有何節目?又要飛?...

大雄
2006.12.11

好快又過左一星期,本來諗住近日公司應該唔係太多野做,點知竟然相反。加上今個月屋苑業委會的小組會議又撞正同月舉行(共5個小組),所以黎緊都會幾忙下。

剛過去的星期六,去左上圖遊玩了兩個零鐘。那裡環境不錯,樹木又多,感覺幾好,如你有興趣,不妨入去小住幾日喇!

前幾日因為一隻魚仔無厘頭纏到d過濾綿而受傷,仲唔知點解條尾爛左,為左買維他命同埋藥比佢治療一下,再次去到金魚街。剛好撞到有種叫黑劍仔,樣子矇矇地,又細細條,於是買了1包5條回來($30蚊)。可惜,第二日有一條瓜左,而另一條大小小的,因為目擊佢成日追其他較細的魚,於是放左佢入另一個飼養兜內,點知佢一連兩日半夜逃脫跳出到大缸去。卒之到第三日再逃,點知跳左方向夾左係飼養缸同大缸之間的隙上自殺身亡要回大海去了。

先兩日午飯完畢,因為有時間剩,於是去了IFC的Citysuper逛一下,買了兩盒在日遊旅途中常備的零食小枝的甚麼限定版款式。今次一盒係睇落好吸引的深抹茶期間限定,另一盒係夏之Cocoa(各$19蚊)。食過再話比大家知邊盒正d。

大雄
2006.11.13

介紹大家去的好地方查實係邊?咪就係青山醫院囉!剛在11日舉行了開放日,當日收工趕去荃灣坐免費接駁巴士入去,因為只開放到4點,於是只得個多鐘頭速速看。

 

個幾月前,在貓骨住院期間,晚晚行旺角,對於每日有咩新貨到兆萬或信和的玩具店差點變成暸如指掌的境界。自貓骨出院後的,至今也快三星期了,每日除了返工,就是放工回家煮飯,所以出面係咩世界,都唔清楚了!

剛過去的星期六下午,申請了行街紙(因為當我中午收工的一刻,貓骨已在家吃了飯,而我反正都要自己吃,不如去逛一下吧!),於是再次回到旺角這地方,第一站是掃了四間書店,共買了六本書,包括新井一二三的新書《東京生活意見》、在覃san的blog介紹到的《整形日本》(湯禎兆著),還買了《無料呻吟》和只在正價書台才找到的《溫柔的日式生活》(好在剛巧商務做八五折),仲有買了兩本關於坐月的問答書和食譜。第二站逛玩具店,新事物不算多,但就買了一隻呎幾高的大雄毛公仔,價錢仲貴得黎算超值添!他已經成為家中最大型的大雄收藏了!大的買了,仲有細到手掌心大小的高達玩具名為「Gunpla Collection」盒面包裝到元祖級的高達模型封面,內裡就有共10款的其他元祖級模型的玩具。打開一看,原來內裡還有一個包裝,而今次有幸抽到的是繼高達之後,最正的MS-06渣古。睇完玩具仲去左信和睇中古日本CD,可惜搵唔到正o野。就咁不經不覺行到4點幾連午飯都未食,之後急急腳咁去食左d野,去金魚街買埋d魚魚用品就回家結束一個愉快得來有點重(揹住六本書係身,返學都無咁重!)的心情回家去。

估不到星期日又再出街,今次貓骨同行,去了大角咀港灣豪庭的千色店逛。這店的佈局和商品都不錯,可能人比較少,所以仲幾好行添。行完這邊,就乘東涌線去了青衣城,睇下只開放到今日的勁大大富翁及展覽,可惜時間不合,看不到真人對奕的環節,只好看一下來自各地的大富翁展覽,好像日本的,就放了Pokemon和六本木山的兩個版本,最衰佢唔早搵我呀,我可以借我盒今年4月時係買回來的日本正常版過佢展覽下架嘛!同場仲有d衫賣,可惜唔多o岩睇。不過就玩下相,例如好似版頭那張(迪士尼版大富翁),幾滿意架!但就發現陪了我3年,影過過萬張相的相機的快門掣越來越壞,唔通要換機,唔係嘛!?

回家攪攪魚缸,因早前發現的細魚仔恐怕比d大魚食返,於是嘗試整佢地入個小樽內。期間曾過過有3條在魚缸底,又有2條竟然在水泵內,但缸底的太少撈極都撈唔到,而水泵內的幾經辛苦才能弄到水樽內,但太細條,成日搵佢唔到,但好好似只得一條仍生存。細魚攪唔掂,就攪下d大魚,呢張就係撈左佢地出個盆仔時影架喇!共有9條呢!

大雄
2006.11.06

呢期屋企個魚缸認真生機蓬勃,早在10月初買入的蘋果螺,已經開枝散葉,速度亦如網上找來的資料,正快速增長,隨時造成災難性的影響 。買回來的4隻蘋果螺,1隻早前衰貪玩爬到水泵抽水處給吸著,已回歸大自然。 餘下3隻又非常之熱衷於交配,魚缸中很多地方都找到它們的卵胞,現在已找到5隻成型的小蘋果螺,今日再在多處找到一些更初生的蘋果螺,好說也有6-7隻,而觀察發現了的卵胞而言,應該有很多隻會緊接到來這個世界。

 

 

 

 

 

下左圖:買回來的其中一隻大蘋果螺和第一批發現的蘋果螺BB。下右圖:在養育箱內的小蘋果和附在壁上的卵胞。再下圖:卵胞的放大相片,已經有個形係度架!

講完蘋果螺,係咪發現頂頭的相未講呢!這就是今晚發現的懷疑小魚仔,暫時約數到4-5條。睇真D,有眼仔架!目前養緊的是藍班馬(有說紫班馬),我想應該是它們的魚仔吧!數落都有4-5條的。

講完魚缸,講下花花,上次影左怕羞草的2和4分枝,今次出張"露毛"寫真來,是將會變成分枝的地方;另外,貓骨同事送來的蘭花,開得不錯呢!

大雄
2006.11.03

來到2006年的最後兩個月倒數了,現在除了期待聖誕的幾天假期外,還是返工再返工的日子。

我的日子呢,暫時還在當兼職的家庭煮夫,放假的日子比返工的更忙。從早飯煮到晚飯,工序是準備、煮、食、洗、準備、煮、食、洗、買餸、準備、煮、食和洗。好在平日請了人回來幫忙,工序只需做第三循環便是了。不過看完報紙再上網,都差不多11點幾12點。

娛樂方面呢,行超市和街市比商場暫且多一點點,應該過幾個星期後可以回復到往昔一樣的了。或許找一找網友們去郊外走走吧,邊位睇到請安排下喇唔該!

前幾天落平台花園,看到某處種了點植物,像在試種的模樣,但併合起來又幾好看,於是拍了個鴛鴦樣黎睇睇。雖不及剛巧去了花田一趟的網友們精彩,但正是各自各精彩嘛!哈!

晚上看到雪櫃原有的和新買的維他老檸分別是新和舊的包裝,以示紀念,於是拿了它們來拍一拍。雖然內裡的檸茶相信是無分別的,但包裝飲完就丟,就數碼化地留個念。

另外,過去幾天再得多位好友前來探望貓骨,現在家中的葡萄適和利賓納已經變成一個嬲字,真係有排先飲得完。總之一切安好,謝謝各位。

此外,近日在網上發現友好人士的blog越來越多(多得yahoo blog方面設定了想要在blog留言回應,就要自己都申請個blog先得得綑綁式blog推動方式),如各位想加個連結在這個仍固執地守著的網頁空間,請告訴我。

最後,種在廚房的一棵怕羞草,經過4個月來的生長,最新一束葉已由2分枝變成有4分枝的了,希望它粗壯些,能夠熬過快將到來的冬天(怕羞草唔多凍得)。

 

大雄
2006.11.01

這十天以來,慰問的說話由經電話、電郵、留言和親身到訪的友人以不同形式帶來,在此感謝各位的關愛。放心吧!如果告訴你我們是連主診的顧問醫生和專科醫生都會安慰返轉頭的人,你自然會放心得下!當然,心情不佳的情況的確會有,但換個角度看,那是舒發的過程;否則,啞忍只會令他日患抑鬱症也有可能。

回到現實,好在只4月時放了幾天假進行櫻之旅,剩下了5天年假作了今次應急之用。貓骨回到家後,我暫時充當了伙頭的角色,最高峰是一天煮3餐飯,再加上丁點家務和買餸,一天十多小時很充實地由洗菜煮飯洗碗的循環中很快地過去。慶幸在上星期五請了人幫忙煮飯買餸,最辛苦的日子已經過去了。

早前買的PPC Dopod 838pro,原來照相有panorama功能,可能使用上技巧應未能掌握,卒之影了如上幾幅相出來。第一幅是一直在醫院守衛了數星期的Keroro小隊,亦是第一張不知就裡用了panorama功能影出來的相,但變成了特效相一張也很有趣。第二張是昨日在家中影的,在沒甚光線之中用PPC效果真的麻麻,還是DC較好,而相中間亦有接駁上的穿崩位。

到第三張,契仔銘希和爸媽今天再次來訪,繼上次"彈腳爸爸"買了枝葡萄適來,今次買了一枝利賓納。很有趣,早前曾和貓骨講起過探病孖寶葡萄適和利寶納,誰不知過了幾天就有齊它們出現在我家中。裝潢雖然唔同左,但幾十年黎它們給了多少人營養呢,真係數也數不清。這張"當葡萄適遇上利賓納"也是當特效來攝,在晚上在家黃光之中拍出來的效果非常一般呢!

話末,加送4個月大的銘希仔第二次自行轉身後的相片以作紀念!(他的第一次轉身是早上給"彈腳爸爸"在家中發現;第二次呢,估不到就在我家呢,真榮幸!)

大雄
2006.10.22

按我一次吧!

日子與顏色不知在何時扯上了關係,今天是傳統的13號星期五,於是黑色成了它的代名。

天空與顏色亦不知在何時扯上了關係,今天煙霞漫天,於是灰朦朦成了它的代名。

命運與顏色都在不知何時亦變成可以用顏色來形容,你今天好黑、你今天好灰...諸如此類...但凡事只要都不輸信心和意志,就像上面一樣,只有待命和重新啟動,而沒有關機的選擇,你試試按下上面的"重新啟動"一次看看吧!(放心,不是病毒或整人程式來的)
>
>
>
>
>
>
>
>
>
你看,再按多一次,你還是會回到這裡來,明天還是會繼續的。

多謝各位友好多月來的關懷和問候,貓骨和我的心情,相信比不少獲知消息的親朋更加積極,而貓骨的身體亦沒大問題,套同祖國征空宇航員的那句充滿信心的話語:「感覺良好」,請大家放心!

如你仍然覺得心情不佳的話,你不妨試聽一下平井堅的「gaining through losing」吧...

大雄
2006.10.13

以上 就是近月生活的片段:(由左上起)
替老闆搜集了九月京都駕車一天之旅的資料,令老闆一家有一天愉快的旅程,遊過嵐山和享用過貴船川床流水冷麵,這就是老闆送的手信,大阪GOKAN出品的旬窯(木之實的pie)燒果子,有蛋、牛油、砂糖、杏仁、花生、腰果等等材料, 少吃多滋味,不過拿時要平放,頗為頭痕 / 新入手的support CSL HSPDA的PPC Dopod 838pro,從此隨街上網也可以,但下個月要先找左條咭數先得 / 和味無窮終回,李san口中說出的話,從字幕上的演譯為「蒲燒好的鰻魚很好吃」 與 Ricky san口中說出的話,從字幕上的演譯為「天然的當然是純天然 」,第一時間就令人想起很多東西都不吃的食家萊的金句「好味的巨峰提子真係好好味」 / Keroro小隊五人眾,正被派遣到醫院守護著貓骨 / 這個中秋夜,到樂富吉之島買了兩個日本制的膠儲物箱,商場大堂的中秋大燈籠裝飾很好看,但不及sales姐姐一句原來你買的膠箱今天起做九折,你十一來都無做 折頭呢!就此省了一筆當的士車費,賺了! / 新入手的大雄公仔,暫時最cutie就係佢!同時亦派遣到貓骨處作應援隊 / 早前入手的大雄公仔和因為cute所以買黎送比鍾意海迪的同事太太的一個合照 / 在六月時平播種的羅勒,誰知一棵也種不出來,反而再早時候曾播過種但沒見成功的怕羞草卻突然發起芽來,3個多月後已長大不少了 / 上星期日,趁中午人少,第一次品嘗旺角的築地銀鱆魚丸,很貴啊!25蚊得六粒,味道亦不算太突出,而同時購買的抹茶牛奶,試一次就夠了 即使它連鱆魚丸買只需5蚊 / 買給貓骨的中秋兔仔燈籠,用電池的很是安全,在旁的是Keroro小隊 / 今晚剛去了舊同學兼近年做了街坊的Kathy與威哥結束15年愛情長跑的婚禮,同時和幾年前一同走堂食遍又一城與九龍城大小食肆的同學仔再聚首,雖則酒樓的餸菜以至侍應生的招呼都唔掂,但仍 可傾過不停,不竟是曾經邊食邊讀書的同學仔們 / 養了3個月的一批魚,最後一條終於在前天都返回大海了。於是耐心地洗乾淨個魚缸,check好哂d PH值,再拆埋那個壞壞地的濾水器和燈,然後到了金魚街買了一枝外加的新燈、新濾水器、新的氣泵膠喉,再配上早前買的石仔,仲有幾條新入手的魚仔和蘋果螺,暫時好似幾好咁喎 / 如果睇到呢度又仲記得我寫過咩的你,真夠朋友啊!哈哈~~~

大雄
2006.10.09

打從上一篇大雄的話後,好忙、好忙、好鬼死忙....各位追住電話/email叫我出黎去擦野又或開山的友好們,請耐心多幾個月,反正都見你地都「一生懸命」地食食食同準備紅葉之旅(記得手信呀!),唔會悶得去邊o既!哈哈!

轉眼就到06年我最後三個月,每逢年尾又係結婚旺季,黎緊10月9號係同學仔兼現在街坊的威哥同拍拖十幾年的Kathy結婚的日子,11月25號輪係中學同學芹少和女友Avex,仲有12月14號到阿輝和Suki,12月29號到網友飛碟姐姐,仲有個2007年12月15號appointment係中學同學Joanne和阿華的好日子,謹祝幾對準新人百年好合,永結同心,而我就搵多d錢,唔係點比人情呀!

下一篇大雄的話,又有無人估到係幾時寫呢?真係我都唔知呢!只要大家有心的話,隨想隨寫都可能架!正如噚晚八點半食食下飯想起,就起程行左去西九影國慶煙花,毫無準備,無腳架只有用手拎住部相機再用煙花模式加連拍,卒之都有多少係收得貨o既。你睇,大家有心喇!

大雄
2006.10.02

好在、好在,好在趕得切!只差一日又成為月記了!幾星期,轉下眼就過左,我都唔係無蒲頭呀,係少蒲頭o者,不過最近引起網友們的關注,飛email、打電話,甚至留言,我係度架!不過好忙o者!

究竟呢個月攪咩呢?七月中起的兩星期,主要忙在屋苑的工作,和管理處一同進行屋苑視察,第一次走到住所的56層高天台,唔使走火都可以入到避火層,發覺原來全屋苑最好景又風涼水冷就係呢度,亦鑽過入唔少入到去都唔知果部係咩o既機房,清楚了解全屋苑邊忽打邊忽,咁以後做野都好做d。之後就係一連兩星期的一三五一三的五個小組會議,總開會時間超過19小時,最夜果個仲係3號風球下開到凌晨1點10,真係幸苦哂管理公司喇,我地住戶拍拍pat pat就返上樓訓,難為佢地仲要坐車先返到閨呢!

我叫銘希,唔係招財貓呀!忙完開會,又係另一個忙的開始。開了3個會,趁星期日的假期,去了屯門探了朋友一個剛滿月的BB,睇完BB順道去左屯門市廣場行左個圈。就係晚飯的時候,個人突然謝哂,坐係酒樓度好攰,無胃口,之後坐車返出九龍仲訓到不知蹤。返到屋企,突然發燒,仲燒左兩日添!真係好耐都無試過咁,經醫生睇過,話係感冒,最慘係感冒菌入埋腸,攪到要成日同廁所傾計,最終病到三日返唔到工。最病的幾日過左,磅一磅,瘦左幾磅,胃腩都唔見埋。而家成兩個星期,都係無咩胃口,慢慢康復中。講返最病果一個星期,真係連上網都無心機,一般黎講,從我上網的指數就知我有幾病,通常好病,先會攪到唔上網架咋!而總結案情,應該係屯門市中心不幸和兇猛的病毒偶然相遇,所以......

不過呢,病病期間係上少左網,但有一樣無少做的就係每日睇放學ICU入面播的KERORO軍曹。由於佢入面玩好多元祖高達又或70-80年代的動漫特攝的元素,對於我呢個年代o既麻甩,真係好好睇!其中果個爆炸頭軍曹更加成為我近期的至愛添!所以好多年都無買過模型,近日見佢出左款呢個樣的模型,即買!雖然未砌,但都拎佢黎同新入手的大雄公仔合個照先!

剛過去的星期六,在沙田抬頭望天,忽見天上有幾片雲像羽毛掛在天上,於是拿出數碼相機拍照,突然引來7、8個途人駐足圍觀,那個位置在道風山附近,唔通天使翼黎o既?

大雄
2006.08.15

本想是無所事事的一星期,點知最終係忙到不得了。公事上因那位心不在公司的老闆原來學漏左一科叫做"case management",攪到一連兩日間,前後3個cases加埋抬左十幾個box files去我枱面,要拿拿聲趕製上庭審訊用的bundle(即係上法庭時用的文件匣)。好在我對於整bundle已經成精,先分個緩急輕重,在星期六中午收工已經攪好2個cases,明日返去再戰bundle。

公完到私,繼續係返工睇file,收工睇管理處的通告。今個禮拜已不算多,但因為快要舉行新一屆的工作小組會議,所以要跟進的東西亦不少。

由於當上了業主委員會的成員,更加多屋苑內發生的事會看在眼內,那裡草皮有問題,那裡漏水,那裡地下有條裂縫都會知,而巧合地常見如外來訪客(有時係業主黎添)趁有人出門時急腳衝入電梯大堂,今個星期已經有兩單係我眼前出現。其中,今日下畫仲係遇到個阿姐係度鬧我"白痴,關你咩事"。事源剛好我出門時有位小姐,後生的,斷估佢都有起碼讀過9年免費教育,能夠閱讀"請出示住戶證"的告示牌,能夠視力正常睇到個保安員企係度,但佢竟然係保安員身後想衝我門而入。當時保安員已經好禮貌請佢拍咭(好多屋苑而家都係用有IC的住戶證拍咭出入)同埋問佢去邊座,咁我見到咁o既情況係正我眼前,仲衰到果位小姐回答保安員話係我住那座的,我更加唔抵得佢o既作為,我幫埋口叫佢"係度住o既,請妳拍咭喇",點知就比佢講左個事實出黎....我今日先知道,原來有人睇得出我係xxo既!枉我平日已經好好咁隱藏架嘛!到最後,那位小姐最抵死o既係佢退左出大門以外,邊怒睥我邊打電話。真唔明白,係係度住o既,做咩無住戶證,做咩無大門密碼呀,白撞咁款仲惡人先告狀,都唔知家下咩世界。無品vs白痴,我都係做後者好d喇!

今個星期無咩特別,唯有搵張舊相出黎先。這是早前在我家魚缸小住了一晚的寄居蟹和蘋果螺,點解係一晚,唔好問喇,第二日已經返左去舊時果度,仲問咩呀!

大雄
2006.07.16

轉眼就已經7月,趕在變成月記前,略為寫寫近月的事先。

7月1日(上圖攝於7月1日),幾萬人去了遊行,不過我留在家中,因為好熱、因為遊行主題不清晰、因為遊行人有不少是有政治目的,所以我沒有去;當然,我也沒去巡遊活動,因為不是在中資公司工作,去了參加也沒獎金,也沒更多升職的前途,而我更一向對那些免費海鮮餐和短線遊無興趣。

但我當日也沒只顧望天打卦,因正好那天是青藏鐵路開通,無論是香港還是國內的新聞都追著報導。青藏鐵路的開通,令旅人可以多了途徑進入西藏。不過換了不在旅人的角度看,有人說是鐵路的目的是政治化的,還有會把西藏漢化,亦會把生態改變等等,但我最多只有機會作個旅人,我最關心的,還是國內同胞忍不忍受到在車內長時間不吸煙的問題,要香煙還是要氧氣,好哲學啊~~~

(左)拮取自CCTV4的畫面,架青藏鐵路列車車頭都幾靚喎!/(右)4千幾米高我未有能力去,日本JR全國最高的1,345.67米的JR小海線野邊山我就去過了。

時間倒數回6月,我參加了屋苑的業主委員會,更在上月底的第1次會議中獲推舉成主席,從此過著每日都要抽時間看管理處的通告和每天飛email給其他委員和管理處的生活。有當管業經理的中學同學說「都唔知d人有咩好參加呢d會」,但作為業主,而且更加唔打算拎層樓黎炒,即係會有排住的我,我還是樂意去參加呢d會。

近日大家去睇世界盃(今晚意大利對法國,唔知最後賽果如何),我反而花了最多時間在屋苑業委會事務上。其實,我現在等於參加了場總不會嬴的球賽,所花的努力,只在於在球證吹雞時輸少幾球。在香港做業主,家財萬貫的不計算,月月返工搵錢為供樓的小業主,永遠是最蝕底的。公契是發展商給你定的,就算是名牌律師行草擬的,也會寫得鬼五馬六,不知所謂;管理公司是發展商自己友的,連當中某些屋苑合約承辦商亦是自己友,小業了主能做的就是比錢比錢再比錢。到住到十年八載,管理公司搵到差不多,有政府幫一把鼓吹成立法團自己管理,這是易事嗎?有權力必有義務,有錢在手管理必有金錢轇轕,到時你係業主我又係業主,嘈都無謂。我現在能做的,只望盡可能減少將來出現的爛灘子,到任期滿時,只需像香港小姐冠軍出來說說任內如何親善,而唔使好似選香港先生般企在台上任台下V嘩鬼叫。

至於原定想攪的聚會,邊個出黎接下力呀,我好忙呀!

大雄
2006.07.09