09.10.2003(木) / 晴

第五天

08:15起身，當然落lobby食返個酒店無料早餐先喇。09:30出發，6分鐘後已身處地下鐵四條站的車上(乘車料@200yen)，前往二條城城前(途經烏丸御池)，再7分鐘後已經身在二條城城前站了。出車站轉個彎，就是二條城的入口，剛巧是築城400年祭，而剛好呢個時間好多旅遊巴士載左唔少本地團黎，門外人頭湧湧。

付過入場料(@600yen)，入口在東大手門，因為400年祭而開放，不過無參觀，轉而入內行，參觀了二之丸庭園、二之丸御殿和清流園那邊的特設舞台表演等地方，再逛一下賣店，四圍影下相，差不多行左2小時再離開。

離開二條城，轉移是日目標往嵯峨野嵐山。先步行15分鐘往JR二條站，去到剛好有快速的車(乘車料@190yen)，12:09開車，12:16就到達JR嵯峨野站了。呢頭出JR站，果頭入嵯峨野小火車車站，咦，又剛好有車，於是飛快到售票處買票，付過每程每人600yen的乘車料，雖則眼見有印仔蓋，但都唔等得，要出月台上車了。12:28乘上小火車的7號車，約半小時的車站，就到達龜岡。途中，車上除了車掌外，還有一些好似是觀光協會之類的年青人，拿著即影即有相機，幫人影相，不過唔係免費架，盛惠1,000yen，不過可以先睇左張相得唔得，唔得可以唔收貨，而張相會放入一個都幾靚的硬紙咭入面，有封面，有地圖，仲有果張1,000yen的相，都算值得的。除此以外，雖則不在紅葉遍山的季節，又或是漫天飛雪的特別景致，但一片綠山綠水，感覺都不錯。而沿途在右方的保津川，則有早前已經到達上游的遊客，改成用船從龜岡而下，這種船每日約7班(冬季每日約4班，但有暖房船坐)，而一程船要2個小時，仲盛惠位位3,900yen，好貴呢！不過，從水而望的風景的確不同，下次無咁趕再試坐下喇！

小火車到達龜岡站只等留幾分鐘又開車回程，這時車掌會逐卡車去攪小小氣氛，正好前一卡是一班台灣遊客，於是車掌唱左幾句國語歌，行到我那卡，就邀請阿車掌先生黎個合照先。穿幾個山洞、過鐵橋，快樂的時光又好快過左，又係時間落下車。趁下一班車未開，不少剛才同車的乘客都車頭前方的位置企定定影多幾張小火車的特式車頭相片留個念，仲唔少得互相拜託幫幫手拿相機拍張車前留影。

玩左成個鐘小火車，入返大堂先蓋返d印仔先，因為玩得開心，在賣店買左唔少紀念品，有電話繩、溫度計、原子筆等。離開車站，行左去瀨戶川方向，接著係保津川的下游位置。

在未到渡月橋前，有一些賣店，在一間雪榚店，先食返個秋栗和豆腐雪榚先(每個350yen)。食落豆腐雪榚不錯呢！稍事休息，再前行就是嵐山的音樂盒館和美空雲雀館。早聞音樂盒館有自組音樂盒，於是入去參觀之餘，就去玩一玩。

到達音樂盒館的地庫，有幾張工作卓，又有不少的材料，於是選了一輪，而家都記不起當時選了甚麼音樂，但目的係為快將結婚的貓骨同學姬絲汀娜做個小手信作結婚禮物。選購好材料，店員就會教如何組合音樂盒底座，如何用熱熔膠槍去黏上買來的裝飾。原則上約15分鐘就可以完成，但邊做邊加料，如是者花了4,000幾yen才完成大作，還花了相信是破記錄的1小時才收工。整好拎去櫃檯，店員會細心包好個"大作"，再放入紙盒，等你可以安裝帶佢返屋企。

玩完都4點幾，於是行左去渡月橋方面，在橋的另一邊都有間音樂盒館，賣的都是差不多的東西，於是望多兩望就閃人。

再睇睇手上的京都rurubu，見到有個廣告，有個好靚的原氏物語御守，以為有得賣，地點野口神社，咦，幾近下喎，快步去睇睇先，途經竹林，由於目的不在此，好在見幾有特色拍過相留影o者，因為事後再睇返先知經過一個景點咋。

去到野口神社，唔係嘛，好細間，無野睇無野賣，仲見到個箱寫住台灣一樂園飯店阿咩咩捐助，再睇返本京都rurubu，咩話，要訂，唔係嘛！

途中經過賣栗子的檔口，老闆快開工，於是500yen買了大大包的嵐山燒栗子，幾好食。走到大街，搵到有巴士返京都車站，於是在嵯峨野小學前等巴士，約10分鐘後有車，但這程車坐了差不多55分鐘(乘車@280yen)，途中仲係起勢塞車果隻，真係坐車坐到訓幾覺。落車後選了京都站前地下街Porta的卵與私，這是一間賣蛋包飯的專門店。坐定食左個B同C餐，食完行伊勢丹順便消光下，跟住先坐地鐵返四條的東橫Inn。

早餐：於酒店內

小吃：秋栗、豆腐雪榚(各350yen)，嵐山燒栗子(500yen一大包)

晚餐：京都站前地下街Porta 卵與私 B及C餐(埋單2,688yen)

京都四條烏丸東橫Inn 427室
(第二夜)(宿泊料@8,925yen)

二條城

嵯峨野觀光 鐵道

嵯峨野嵐山散策

保津川

嵐山商店街

京都站前地下街Porta