11.10.2003(土) / 晴

第七天

今日的行程比較迂迴，07:30就起左身，先落樓下食左個早餐先。執下野，再plan下點行，09:45就checkout。第一個目的地，係先去三之宮車站lock左d行李先。

Locker Room的所在地，近門口就有部記憶咭燒碟的機器，隔離就有間「痴漢等被害相談所」(即係遇有咸濕佬等情況，受害人可以黎呢度舉報同傾一傾。咦！大石會唔會係入面呢？) 選了個中型locker，投入400yen lock好行李，返出黎見到有個列車時間表，嘩，原來好多特別的列車經過三之宮的，如Super Hakuto、Hamakaze、Naha、彗星、Akatsuki、富士、Sunrise瀨戶同Sunrise出雲。嘩，好在都唔失禮，聽晚將會坐下Akatsuki，影返低個時刻表睇睇先！

好，攪掂！揚下張JR Pass入閘，坐上往姬路的新快速，41分鐘後到達姬路。離開車站，姬路之前已到過一次，要去姬路城極之簡單，從車站一出，沿大手前通，遠望就已經係姬路城了。途中見到有間姬路武藏館，宮本武藏，勁喎，去睇睇先。內裡地方唔大，不過就有關於宮本武藏的資料、2003年大河劇、仲有d宮本武藏的真跡複製本展出，此外，仲有d紀念品發售。(姬路武藏館只開放到2003年12月28日，而家已經無得睇喇)。

睇完返出黎，再直行不遠就到達姬路城前的大手門，進入姬路城公園範圍。例牌影d姬路城正面相先，再從左面前行，就會到達姬路城。上一次到姬路，是10月底，當時片片紅葉，亦打算入城參觀，可惜當日緣慳一面，去到剛好下午4點鐘關門了，所以今次一定要入去一窺究竟，因為姬路城在第一次見識時已認定她是見過的最美的城。入場料@600yen一位，入城後沿指示前行，好大喎！由西之丸方面行，經過Ha之門、Ni之門和Ho之門，才能到達內庭，由內庭再登上天守閣。在天守閣內層層以上，經過很多陳設了展品的飾櫃，再爬上(因為樓梯很直)每層連接的樓梯，見識過天守閣的佈置，例如忍者藏身的暗格，仲有在3階特別公開的一個有武藏在此渡過3年的「開kazuno間」，位置正好在樓梯底。行到6階，終於到達6階的天守閣，好特別，千辛萬苦到達的天守閣，竟然設了個供奉神明的神壇。不過，從天守閣外望姬路城的風景的確不錯呢！而由入城一刻到達天守閣，計下時，都要50分鐘。

影飽相，係時間"落樓"喇，嘩，上已經覺得好直，落仲辛苦。眼見有d上左年紀的洋人gentleman同lady，佢地身型大份，係d姬路城的導遊人員帶領下，逐步拾級而下，都幾費力。回到內庭，沿指示就出到去城樓前的本丸，本來諗住坐一下，點知呢度沙塵滾滾，唯一繼續行。離開本丸會經過腹切丸，閃落去睇睇，又幾陰風陣陣咁喎，都係閃喇！(腹切丸，即以一個切腹的地方)去到Nu之門，到達二之丸，出了Ru之門就回到入口前了。睇睇錶，足足行左接近2個鐘，不過，終於償左上次無得參觀姬路城的遺憾，今次算是大滿足呢！

離開姬路城，取道隔鄰的Miyuki通回車站方向，這邊是商店街，比大手前通多點舖頭看。回到車站前還未搵到邊間餐廳好，決定唔到食d咩，卒之回到車站喇，就上了車站旁的山陽百貨6階的餐廳搵野食。巡過一round各間食店的櫥窗，最後選了在烏冬亭麵坊食。食完都差不多15:30，要走人喇。

今次換上坐快速列車從姬路到西明石，再轉架普通車去舞子。係喇，下一站就係明石大橋。睇住個大大個路牌，不遠處就係舞子公園，仲有橋之科學館，行遠少少在草地的另一邊，就有間綠色的屋，叫做移情閣，原來係紀念孫中山的，可惜到達時已經夠鐘收工，無得睇。眼見就黎黃昏日落，又有片大草地，於是停低休息下先。

坐坐下，在西邊的太陽漸漸下山，一片橙紅色的天空，於是離開草地到了橋之科學館前的海邊，不停影呀影，又相片又影片，好耐都未見過咁靚的日落喇。天色終於轉黑，放棄了要300yen(假日收費)一位的舞子海上散步道，即係行上明石大橋一段離水面47米的散步道去行下，特色係通透的地板，可以在高處望下個海，都幾考膽色架！由於燈光唔多，一面沿沙灘步行去垂水，在明石大橋的另一端的淡路島的燈光逐漸亮起，又幾靚喎！

18:10到達垂水的Porto Bazar Outlet。這裡分了東西兩翼，仲有中間的Seaport Restarurants，而內裡的牌子大致有香港都有的New Balance、Franc Franc、Seiko、Guess、Fila、Lego、Muji、Adidas、Columbia、Levi's、Timberland、Nike、Mont Bell、Bobson、Chevignon、Edwin、Kappa、Casio等等，仲有d香港無咩見過的牌子。

由於黎到都6點幾，而East同West兩邊的outlet shops都係收20:00，所以邊研究張floor plan，邊選d合心水的舖頭黎行。其實好多款式都唔係平過正價好多，而且大多係上季貨式，唔熟隻牌子，都幾難買到好野。卒之都係係無印良品買左幾件抵買的衫(@1,000yen到一件)。趕住行街之餘，仲要抽幾分鐘打電話去今晚入住的酒店，表明今晚好夜先checkin，保住個房緊要過shopping嘛！。

行到20:00，賣店休息，亦買了幾袋野，係時候轉去搵野食攪攪個晚飯佢。行去Seaport，選了食迴轉壽司萬ban，100yen起、150、200、250同埋300yen，仲有軟雪榚食，係一間幾大下的迴轉壽司店。可惜編了坐在唔近出新鮮壽司的迴轉軌道的位置，於是轉到面前都無咩好野，食左十零碟走人，埋單2,152yen。

飲飽食醉，要回程去三之宮取行李喇，趕到JR垂水站，坐上普通車，18分鐘後到站，晒下個JR Pass又出左閘，飛快去locker取完行李，再次回到月台，乘上21:39的新快速，話咁快，21分鐘後就到達大阪。

由於JTB的小姐一早教路，步出大丸那邊的出口，就係的士站，睇清睇楚，近路程的士條龍(另有遠距離的士的一條龍)，放好行李係的士尾箱，就同負責控制的士乘客上落的大叔仲有的士司機那位大叔帶點雞同鴨講的日文溝通下我要去Hotel NCB，再揚下張地圖比司機大叔睇睇。好，佢地算係明白我要去邊喇，開車！兜兜轉轉，終於抵達酒店，的士料金1,140yen，又唔算去得遠喎。22:30入去checkin，表明係剛才打過電話黎講明夜d checkin的果個，咩話？為左方便我地，而家有twin room比我？咁為左方便，無理由堅持唔要架，不過事後睇返個價目表，我噚日比左兩間single room的錢，貴左一間twin room一截喎，蝕左添！再研究下酒店地圖，四圍都無咩野睇，便利店都唔覺有間，lobby上網房又比人book左黎用，有錢都無得用，於是係自販機買罐nachan橙汁，上房邊食冬甩邊睇電視算數吧！

早餐：於酒店內

午餐：山陽百貨西館6/F 烏冬亭麵坊(mini豬扒飯定食+mini天丼定食，1,995yen)

晚餐：Porto Bazar迴轉壽司萬ban (2,152yen)

宵夜：nachan橙汁+冬甩(大雄)

大阪Hotel NCB 5018室

姬路城

舞子公園

橋之科學館

孫中山紀念館(移情閣)

垂水Porto Bazar Outlet