14.10.2003(火)
/ 陰天有雨
第十天
起身食過東橫無料早餐，09:17離開酒店，去坐09:30的新幹線Rail Star 354號列車，今日的目的地係廣島。Rail Star d座位好舒服，一坐上又訓過，大約1小時15分鐘後就到達廣島。
步出JR廣島車站，外面細雨紛飛，不過咁遠路黎到，無理由唔繼續行架！坐上JR站前的廣島市電，出發囉！目的地「原爆Dome前」站(乘車料@150yen)。10幾分鐘的車程，外面依樣咁不斷落雨，下車後唯有打著傘前行，過條馬路就到達地標的原爆Dome。拍過幾張相，就移動去有瓦遮頭的平和記念館。
雖然係落雨，好多架旅遊巴載住遊客到來，所以遊客一樣係咁多。付過最抵價的入埸料金(@50yen)，進入平和記念館。剛剛係噚日才見識過長崎那邊的平和記念館，已是一連兩天參觀促成二次大戰結束的兩個原爆下點。雖然我已經係第二次參觀這個記念館，但貓骨係第一次，卒之一行又2小時。
參觀完畢，雨仲係起勢落，唯有繼續打傘上路，經沿路回到市電車站，乘車到宮島口。差不多用了成50分鐘，市電才到達宮島口，由於見好多人落車，於是落埋一份，點知，早左一個站喎！剛落車的地方好似係一個賽船的場所，但因為要去坐JR船去宮島口，所以找了個大叔問路，原來無遠就係市電的總站，隔離就係JR連絡船的碼頭。
14:40乘上JR連絡船，上層係客艙，下層係載車，呢類相似的船，香港無左好耐囉！因手持JR Pass，呢程船無料(乘船料單程@170yen)，10分鐘的船程，船上唔少係洋人。而全程係船的右方，可以望到正在水中的鳥居和嚴島神社。
去到宮島，雨總算落細左，係碼頭蓋過印仔，拎左d遊覽指南，好快就行到去表參道商店街，而時間已經係15:10，要搵野食醫下肚先。一踏入商店街，就有一班街坊係度樁年榚，我諗係撞o岩有咩祭典喇，最得意就係一班大人係一邊用力的樁，隔離又有堆小朋友係度學大人樁年榚。睇左陣，就選左一間係附近的御好燒店「Kurawanka御好燒」開餐，點左一個Kurawanka廣島風御好燒(係宮島又食返廣島風味o既！)，同埋一個蠔御好燒。坐係吧枱睇住阿肥姐係度整御好燒，上枱喇，廣島風的御好燒無甚特別，但果個蠔呢，果然係蠔的季節，d蠔好好味。
食飽飽補充完體力，係微雨冷風之下，個身暖返行路都精神d。睇住觀光地圖，行左表參道商店街，睇左全世界最大的宮島飯杓，又有好大個的哈囉吉締地藏王，接著係嚴島神社，但見到要比拜觀料同埋18:00就收工，於是只沿外圍走，看過好多建築物，登山纜車站等等，約17:00才回到神社前。此時剛好有d工作人員係度餵鹿，於是成班鹿見有野食就走埋一堆，但原來拎轉身睇睇仲正，因為水退，神社和水中鳥居已經不再係水中，三幾個日本遊人已經"下海"去了。於是不甘後人，都走落去影下相，而初時水未退得好後，鳥居仍然比人薄薄的水包圍住，差不多行到埋去，水已經退盡，可以近距離影個相。
睇返個JR連絡船時間表，歡樂o既時間又過左，係時間返去碼頭坐船回宮島口。回到宮島口已經天都黑哂(不過都係18:05咋喎！)，步行到JR宮島口站坐車返廣島，乘上山陽本線往岡山方向的快速列車，20分鐘左右又回到原點廣島了。
係JR廣島站的綠色窗口訂左車票，坐19:25的Rail
Star 375號回博多，係車上先食左係宮島買的Momiji饅頭，再小睡片刻，20:35就身處JR博多站。呢頭落車，就轉到地下鐵，目的地天神，不夠15分鐘，已經踏足天神地下街(地下鐵乘車料@200yen)。睇過車站的地圖，搵o岩出口，好快就行到那珂川，過埋橋就係中洲屋台，即係大排檔。這時已經9點有多，仲有好多人係度食野，但自己又無咩興趣係度食，於是巡了一圈，睇左陣有個釣鰻魚的地攤(500/1000yen釣，200yen幫你
燒埋條鰻魚佢)，就經祗園、運河廣場一面步行回酒店。
返到東橫Inn已經成22:00，但仲未食晚餐，於是坐左一陣又放低d野，就出去搵食。在不遠的Meshiya丼買左野菜沙律(@100yen)和豬扒飯(@580yen)，再轉物去am/pm便利店買飲品同零食返酒店開餐。食飽飽都成12點，沖埋涼又係執野時間喇，因為聽日又係移動大本營的日子呢！
早餐：於酒店內
午餐：宮島表參道食御味燒(一個普通御味燒、一個蠔御味燒)
小吃：宮島楓葉饅頭+便利店零食
晚餐：Meshiya丼野菜沙律、豬扒飯+am/pm零食
博多口東橫Inn
713室(第二夜)
潮退後的水中鳥居最令人懷念，我們見很多日本人或遊客在附近等，一見水退便下海，我們跟隨別人也行了下去；我很興奮，因為可以很近距離行到本應在水中的鳥居，感覺很奇妙呢！最令我印象深刻的便是日落的宮島，那些餘暉透過紅紅的鳥居，照射到海面上，變得橙紅色，真的很美、很美！根本不是可以用攝影機所拍下的影像！