15.10.2003(水) / 晴

第十一天

07:45又起身，食過早餐，執拾下，09:15就checkout，拎住行李去搭車。連續第二天坐Rail Star 354號了，當然又舒舒服服小睡一下喇！岡山的路途比去廣島遠，約2個鐘的車程，11:28才到達岡山。落車第一時間唔係出閘，而係係幾大的車站內搵locker放下行李先。睇過列車時刻表，仲有時間剩，先逛下岡山車站的賣店，都幾多野賣架，仲有唔少桃太郎和桃的東西賣。

正午12:00，坐上山陽本線的列車，目的地直指倉敷。查實從博多過來，最近的是倉敷，然後才是岡山，但因為坐新幹線快得多，而坐本地線就慢幾倍，於是先取快路到岡山，寧坐回頭車計來還得化算。於是，短短14分鐘又從岡山來到倉敷。

步出JR倉敷站，繞過天橋，步經惠比壽通，兩旁的商店都幾古舊下。之後去到本町通、倉敷川，沿路風光不錯，有垂楊柳樹，又有天鵝，又有古式商店和地攤，仲有美術館。時間13:31，終於去到此行的目的地，就係I Love Candy Museum。Candy，當然呢間唔係賣糖果的博物館，而係一間都算係藏於民間的展館，展出之物，就係漫畫家五十嵐優美子的作品，就係20代以上的人應該熟悉的小甜甜的繪畫者的作品展館。

幾層高的展館，地下除了受付處外，仲有個小小的café和賣店，而入場後(入場料@600yen)，入面仲有個場景可供影相，旁邊仲有好多陳年的玩具精品展示。買本蓋印仔的簿的話，就可以靚靚咁蓋勻全展館內的印仔，不過唔買佢本簿都一樣可以"吸"得印仔，梗係慳返多少喇。步上2階，在樓梯位就有小甜甜漫畫末段的經典場面展示出來。再上去，除了畫廊式的原畫展示，仲有一d活動設施咁。直到天台，樓梯口都放左唔少陳年精品係度。而天台上就好似香港d村屋天台咁，無咩特別，只係有個特別位，大家可以企係度影下相，而個位好似仲可以比人係度攪婚禮影相果d功能。

影左好多相，離開前係賣店睇睇，記念品就無咩特別，事關而家推出的唔再係小甜甜的商品，而係近期五十嵐先生以倉敷戚背景舞台的"倉敷物語"的商品。最後，貓骨只買了個記念章，和原來期望會好有多小甜甜的商品賣相差幾遠下。

目的達成，就擺道回"車站"，沿路順便買埋手信，因為都到尾二一日，都係時間豪一下喇！15:20回到JR倉敷站，今次坐上山陽本線快速Sun Liner回岡山，又係話咁快就到，15:37又身處岡山。未去倉敷前，見到琳瑯滿目的手信賣店都仲要係採助守勢，而家回程喇，一於「攻呀攻，快搶攻….」，於是手上又多左幾盒手信。

下午茶時間3點3都過埋，而家先醒起未食晏，於是買左個站弁，在16:37乘上Hikari 370號往新大阪。不出一個鐘，就到達新大阪了。先提住行李去酒店checkin，今晚會住東橫Inn的新大阪中央口。

 6時幾鐘，天都黑哂，放下行李係酒店，拎住張手信清單又係再出發的時間。新大阪方面無咩睇無咩買，於是坐返JR出梅田，反正無料嘛！係梅田Yodabashi買左指定的手信，再行下梅田地下街，例如阪急地下街、ACTY Osaka等等，仲夾過公仔(今個行程第一次咋)，就去搵飯食。最後在地下街的印度屋食豬扒蛋咖哩飯定食同埋洋蔥定食（有炸蝦同炸雞）。 

22:00才從大阪站乘車回新大阪，逛多轉便利店，再一次買返包好味道牛奶飲下先。返到酒店，走唔甩要執行李喇，聽日就要離開日本喇。係咁情況下，當然唔少得要將d戰利品晒一下冷先！咦，點解數勻，我自己只係得一盒Tomica灣岸署車仔係屬於我此行的戰利品架咋？ 

早餐：於酒店內

午餐：新幹線上吃弁當 (唔知做咩鬼野？點解無影底相，無寫底食左咩弁當，又唔記得食左咩，剩係寫低左食左個670yen的岡山站弁當o既？邪呀！)

晚餐：地下街印度屋食豬扒蛋咖哩飯和洋蔥咖哩飯

新大阪中央口東橫Inn 1003室 (宿泊料@9,000yen)

岡山市

倉敷市

I Love Candy Museum