天氣：香港 - 天陰；東京 - 陰晴

「久違了！東京」：5年沒踏足東京都區內地方(去年到東北只在東京車站轉車，所以不算)，但今日因為是加班早機，而全程的大致行程在凌晨3時才趕及完成，所以成朝都是"與二氧化碳同行"，放蚊不斷。

是日行程，除了到東橫Inn大塚外，只去了六本木山和汐留Caretta逛逛。

相片：左上 - 出發前剛準備好的行程；右上：大塚東橫，打開房窗可從走廊伸入黎；六本木的TV Asahi與多拉A夢合照；右下- 大塚Starbucks的Cocoa(左)和抹茶Latte(右)，抹茶Latte飲後感 - 四個字：「認真頂癮」！

追加：噚晚係NHK總合睇到「大長今」，正宗日文"吹替"版，去年5月係青森因為酒店電視無NHK bs台，所以睇唔到，點知成年後，都仲有得播！噚晚剛講到成為最高尚宮的韓尚宮同長今相認，點知去到就黎要攬住的感動位....下集預告！頂！

天氣：東京方面 - 陰晴間中有雨 新潟方面 - 天陰

「花見初體驗」： 行程第2日，今日有中學同學Y一同遊玩，早上先到池袋東橫會合，出發到我計劃的琦玉東所澤站步行20分鐘的新井Farm食士多啤梨。點知...問錯路，去錯方向，好在有"伸手牌"，司機叔叔call返台問o岩地址，1000yen就去到。

點知...因為紅色已熟的士多啤梨不多，Farm剛貼出告示話今日摘士多啤梨放題完結，只有販賣。好在語言不通，省下每人1200yen的任摘費用改為買左包500yen的即食，之前雞同鴨講的店只送多一杯即摘的"service"，還給我們偷偷地各摘1粒！總算滿足左呢個行程。

第2個行程本來想去立川的昭和公園，但同學Y昨晚匆匆去過新潟，說櫻花剛開好正！於是3個都有JR pass的情況，梗係話去就去，從東所澤回到大宮，守 上越新幹線到新潟。去到白山公園，剛好又有白山神社的例大祭，睇花之餘仲有野食，正！

第一次花見，就見到正好盛開的櫻花，大滿足！

左上起："現賣"與"現摘"的士多啤梨；有得睇無得摘的士多啤梨；同學Y的午餐便當；白山神社；小朋友一齊抬的神輿；白山公園的櫻花

題外話：大感動！名古屋Super Hotel的空調，仲有冷氣添！當以往去到5、6月都只有遇上出暖風的空調，呢個感動位簡直正到脾！

天氣：名古屋、彥根、長濱、金澤 - 天晴

「與萊同行」：今日同學Y與友人同行的最後一日行程，而我換成和網友R的一日行程，是日網友R亦會回程香港。早上在名古屋站太閤通口會合，就出發到滋賀縣的彥根，參觀彥根城。

今日天氣良好，而且又是星期一，遊人不算太多，來的都多是老人家多。逛了個多兩小時，就到隔鄰的夢京橋食那個近江牛午餐，各自點了一個是以扒上，一個以鍋上的午餐，食後感只屬一般。反而後來食了個只100yen的近江牛炸薯餅，以價比貨，的確超值。

回到車站轉戰長濱，十多分鐘車程就到。長濱城公園就正在車站背後，行出些少就是琵琶湖，很是方便。去到睇下d歷史資料，才醒起這就是豐臣秀吉的出生地，先前睇了一輪關於戰國時代的書，今次總算到此一遊。

下午四點幾，又係分手的時候，回到米原的locker取行李，我們就坐上往金澤的火車，而R就乘車回名古屋準備回港。

是夜金澤幾冷下，車站四圍都是酒店，可以一間咖啡店也沒有，吹脹！

題外話1：話說今午登上彥根城時，在1層上2層的樓梯上，竟然見到一張「我要見普選」的生果報送的貼紙被人張貼左係一個告示板上，如此失禮行為，真係影衰哂！

題外話2：今晚SMAP春之special，有Tamori(世界奇妙物話那個講故佬)，短劇有中居和稻吾加真人版小丸子兩姊姐力推明晚新播出的「櫻桃小丸子」真人版。末段唱出4.19發售的新碟「Dear Woman」。下集預告，Tamori由嘉賓換成SMAP bristo一員比賽，另有松隆子做嘉賓。

看相識花時間：左上起 - Super Hotel的早餐比東橫多款式很多，而且飲品旅擇亦多，還有"service"的多款熱咖啡、朱古力無料取用；一連4張彥根城的櫻花；近江牛steak set；長濱城；從長濱城天守影向琵琶湖

天氣：金澤、高岡 - 天晴

「金箔與金澤」：天晴的金澤早上，因為今晚夜車2215，所以最遲1000才checkout，計起都要hea足12個鐘。第一站先去左好近車站的金箔館睇睇，付過入場費，先黎杯有金箔的茶再加d乾果子，然後參觀的東西就不算多。之後回車站目送架古董外殼的觀光巴士，唯有轉搭普通巴士去兼六園。到香林坊下車步行至兼六園沿途都有櫻花，至於兼六園，遊人眾多，而且不只櫻花，古松、梅花亦很有看頭。

一路花見未見盡頭，兼六園鄰接金澤城公園，雖無天守閣參觀，但風光亦很有看頭。逛完才覺肚餓，途經近江町市場買盒士多啤梨頂住先，見有時間，在臨上車前黎個立食拉麵，就趕車到高岡。1515去到高岡，在觀光案內所拎個地圖就行人。目的地係高岡古城公園。

雖然又係無哂天守係度o既城，但係意景一流，比金澤城更過之而無不及。內裡仲有個細細地的動物園睇下。之後兼遊高岡大佛，屬日本三大佛之一，就回車站回程金澤晚飯。

回程金澤還只是六點幾，在車站的金澤百番街閒逛，在唱片舖搵左一輪終於搵到之前睇"一公升的眼淚"的主題曲Only Human，主唱者K，唔係日本人而係韓國人喎。另外仲買左隻2004年出的JR 12000km行走的DVD，另有剛出版無耐的JR 2000km的DVD，但3隻秋篇加埋成萬yen，都係咪喇。另外見到有來自北國的DVD，12隻原電視劇另外多年的special，但無最後一隻"遺言"賣，事關買全套十幾隻DVD實在太貴喇，買隻大結局應該會係最化算。而貓骨竟然買左兩本日文的小說，講到"竟然"，因為佢一d日文都唔識嘛！咁事出意外，呢兩本就係"一公升的眼淚"的原著，包括原著主角的媽媽的手記，另外就係主角本人的58封信。另外原著的日記就賣哂囉。

逛完一大輪，終於行到八點幾，去左東橫隔離一間餐廳食完晚飯，回東橫取行李就到車站，好快就坐上急行能登回東京上野。當晚同卡車都有另外3、4人，因為車廂內熱，所以都唔算訓得太好，半夢半醒知道架車曾經經過高岡、長岡、越後湯等，最後經高崎、大宮去到上野。

題外話：去到高岡見到有架有高岡開出的列車，有忍者小靈精塗裝，本來想搭個站過下癮都好，點知時間不合，好在臨走時見到佢係對面月台出現，即刻殺佢幾張相先！

另外，上夜車前，原來急行能登係左面那款都幾舊款的車，點知隔離停正架寢台特急，真係相型見拙。

相片由上起：有金箔的茶、梅花係兼六園仲有架、呢度就梅花(前)加櫻花(後)、兼六園近金澤城那邊的商店，櫻花+遊人+商店絕景、一連3張，金澤城公園、近町市場的生果檔、後2張，高岡古城公園，靚！

天氣：上野、熊谷、黑谷、御花畑、上田 - 天陰

「士多啤梨大作戰」：0605急行能登到達上野，下車後去訂票坐0638的車走回頭路到熊谷。如果唔走回頭路，早上五點已經身處熊谷，真係唔知做咩好。去到熊谷站，第一時間去lock行李，之後食個Saint Etoile早餐就照前一晚係金澤東橫印的資料，先去熊谷的堤岸邊看"熊谷櫻堤"，好在只係行幾分鐘，去到堤岸係好靚的風景，但櫻花已經落哂地下喇。

回到車站先坐秩父鐵道到黑谷站，出站行幾分鐘就到和銅農場，任食士多啤梨30分鐘1000yen，今次真係一次食過夠，每人應該食左幾十粒，食到未來幾日都無打算再食士多啤梨。

黑谷之後就到御花畑站，目的地係羊山公園的芝櫻之丘。剛好先一晚無得check email，唔係的話，可能會遲些少先去芝櫻之丘，事關之後係上田東橫Inn一睇同學Y的email，原來17號佢最後一日的行程就從芝櫻之丘和立川昭和公園選左前者，如果睇到真係會遲d先去。不過去到外面有不少的櫻花，入到去見到開到5分o既實際情況，都可以收貨o既！先兩日與萊同行時和cityphone家族聯絡過，佢地亦會同日黎睇芝櫻，可惜佢有手提我無，所以當我地行到差不多走時都無電話可以聯絡到，不過就係呢個時間熟悉的cityphone家族三人身影出現，而他們就剛剛到，影個相再說三道四再交換一輪情報，就各自繼續行程。

離開芝櫻之丘，通過漫天櫻花瓣飄落的路，去到停車場剛好有西武的無料shuttle bus到秩父，雖然有點塞車，但比步行到秩父應該舒服一點。仲要一落車就叫你去抽獎，一人一份永不落空，不過都係一d陶公仔的東西。逛完秩父祭典館，食埋個午飯，就坐秩父鐵道走回頭路到羽生，因為單張說那邊20號起有藤祭。點知架車去到熊谷站，竟然壞車要調車再繼續，去到羽生已經係差不多四點半。跟著地圖趕路去藤祭的大白天公園，點知...藤樹就有，藤花就仲未開。失望而回，坐車回熊谷站取行李，坐1904的車到上田。

去到上田，先到東橫Inn放下行李，就立即到上田城公園睇夜櫻Light Up。5分鐘左右路程就到達上田城，景色....正！再加埋沿路好多屋台賣野食，晚餐就決定掃街吧！邊食邊影相，謀殺左唔少ram，返到酒店都已經係2250喇！大滿足！

題外話：今日係書店買埋JR 2000KM那本書，DVD一套太貴，但家下1500yen就有一樣ｏ既野睇，抵呀！另外貓骨亦終於買埋”一公升的眼淚”，一套三本全齊。

看圖識相時間：左上起：熊谷櫻堤、和銅農場士多啤梨2張、羊山公園芝櫻之丘土產市、芝櫻之丘2張、羽生大白天公園、上田城夜櫻3張

天氣：上田 - 雨；松本、淺間溫泉 - 晴

「溫泉初體驗」：早上打算重遊上田城，睇睇日間的櫻花又如何，點知係lobby食飯團時已見外面下雨。到寄存行李在酒店再外出時，雨越下越大，在接近公園時見前景可觀，點知相機突然出現"格式化、完全格式化"的menu！大鑊！好在只係今朝影左東橫的早餐相兩張，逼於無奈，唯有按下"格式化"博一博睇下張Ram咭係咪真係出左事！好在最後只係唔見兩張相，之後操作正常。既然黎到城前，落住雨都入去睇睇，雨中的上田城真係兩個樣，噚晚正，而家就唔多有睇頭喇，匆匆影左幾張相，就冒雨繞個圈才急急腳離開上田向松本進發。

途中先到長野轉車，趁有時間出閘望望，點知外面還在下雨。坐上Super Wide View Shinano，車頭同車尾都好有睇頭，最衰今次尾行先，自由席煙車那邊無咁好風光，但今次的車尾Green Car的觀望車窗真係視野廣闊。

去到松本，天空放晴，找locker寄存好行李就坐100yen的觀光巴士去松本城。這邊櫻花不多，但景緻一流，感覺良好！先跟d背著長短伙的師傅拍返幾張靚景，循例入城內天守參觀一番，再到城邊再繞城一周影多幾張才出外找午飯吃。去到一條Rawate通商台街，那裡有很多青蛙像，還有青蛙神社，最終找到間食烏冬的小店，剛坐下落order，還來了一個洋人和女仔，初初以為係洋人與日本妹，點知個女仔識廣東話，而洋人就在拿出電話簿厚的Busy Japanese係度搵個餐牌的解釋。原來他們是來自澳洲作10日旅行，去過大阪、奈良、廣島，睇過高山祭，今天剛從東京專程坐車來松本參觀，明日就離開日本。而那個女仔，原來是個馬來西亞人，但外貌真的十足日本人。

食飽飽再回松本城方面，因為入城費用包括城前的市立博物館，睇完都時候不早，已比預定的時間遲了成個鐘。於是趕緊返回松本JR站取行李，就乘巴士往淺間溫泉出發。只15分鐘巴士就到達中淺間的玉之湯旁，即是今晚的住宿地。入到去拿出行程表給工作人員看那個予約番號，期間有人招呼去偏廳坐低，仲有茶和果子招待。點知出事喇！工作人員話我個booking唔係今日喎！仲印左Jalan個資料出黎應該係21號才入住。好在今晚都有book果間房，於是稍後半刻，待女將問明今晚食咩晚餐，選好菜色，仲有早餐又幾點食同埋食咩款式，就帶到最高一層的603號房。如果間房打通，簡直比香港的還大，加上"半露天風呂付"呢樣野，雖然天氣不大好，望不清那個北阿爾卑斯，但打開窗，寒風入戶，但身浸溫泉水中，真係一番感受。浸完一次溫泉落樓食晚餐，新裝修的餐廳，仲有一陣裝修"徐"(之前玉之湯局部改裝，今日才完全重開)，晚餐精緻，逐碟逐碟上都食到飽一飽，仲食足個半鐘添。

飯後無聊，先到1階的賣店睇睇，之後參加酒店的live concert，2045-2200有音樂表演，今晚有笛、小提琴加鋼琴的合奏表演，同日到酒店的一班歐吉桑和歐巴桑剛浸過溫泉也來列席觀賞，不過有兩三個名叔都係飲到"貓貓地"，有個仲"sir"左係度訓埋。到九點幾，大部份的阿叔名嬸拉大隊閃左，剩下一個歐巴桑一齊係度聽演奏，係女將要求下，仲點左首古老大鐘(平井堅都有唱的那首)，最後由社長出來唱返首旅館的image song作收場。之後回房整下速報再浸多次溫泉才訓，真爽！

題外話：晚餐有幾正，睇下個頭盤先喇！

正當台上三人在投入演奏，台下的阿叔就係度攤住訓，"貓"左！

睇相：由左上起，大雨下的上田城2張、98年長野冬季奧運個裝飾仲係度、Shinano號的觀望車窗、松本城3張、玉之湯外貌、房間內貌和那個半露天風呂

天氣：淺間溫泉 - 天陰有雪、松本 - 天陰、野邊山 - 天晴中有雪

「雪見」：早上才浸埋第3次才去食早餐，早餐雖然無晚餐咁豪華，但都係賣相精美，食到飽。食完執好行李就出外走一轉，淺間溫泉查實都幾細，由中淺間去到上淺間都繞回酒店都係幾個字貨仔，途中都無特別的東西看，只有兩間土產店睇睇。不過，這時以為天空下雨，點知睇真d係細細粒的飄雪，去咁多次旅行，我都係第一次"雪見"咋！

返到酒店的賣店再看一次，卒之買左噚晚社長獻唱的image song single，原來係先前一齣電視劇曾經在玉之湯拍攝，而首歌就係劇集的歌曲。當工作人員收錢，剛好女將行過，工作人員趕忙通知女將我買左社長唱那首歌的single，登時大家相視而笑。

付過住宿費，回房取回行李走人，點知剛出到門口，女將就出來送上3份小禮物，或者因為我夠賞面社長的歌吧！哈！坐巴士回到松本，站前的廣告牌寫著氣溫只有7度。匆匆行入車站訂好到小淵澤的車票，就到相鄰的商場逛逛。

去到小淵澤，風好大，真係算得上凍到入心。轉上小海線的列車到今晚的住宿地野邊山。當列車去到甲斐大泉時，外面開始飄下雪花來，下一站的清里，外面的雪花如雨下，再一站就到野邊山，外面依然飄著雪花。黎到JR最高站的車站，雖則車站四周都有建築物，而站前剛好有鋪停車場的工程，真有點大剎風景，繞過工地去到觀光案內所，點知人都無隻，先彈自唱取了些旅遊單張，就步行到住宿地黑岩莊。沿途除了車和油站外，就人影都唔多隻。

到達黑岩莊時間太早，於是放下行李就外出找午餐吃。在黑岩莊問過，點知回覆係最近係行10分鐘去7仔搵野食！果時真係啤一聲，之後行回站前的土產店，入面有野食，點了兩個野菜天婦羅烏冬，點知cool到震的老細點完個暖爐就走開左，攪左幾個字，終於弄了個吃得飽保得暖的烏冬來。食飽就行人喇，搵唔到出租單車，於是用走的到黎野邊山目的，去JR全國最高的地點(1375米高)的地碑，行左接近半小時，終於到達！但做緊工程，就住就住咁影左幾張相買下手信就回程。經由國道141又行左半個鐘，途中係間牛乳製品的店買的檸檬芝士蛋糕，好味到極！

之後專程行過籠去到7仔買左d零食，就返回黑岩莊checkin。呢頭放低行李又係時候食晚飯(6時開飯)，今晚雖無噚晚咁精緻，但各有千秋，好食！飯後逛下lobby，原來老細個老豆拎左好多日本的勳章，呢度仲多次有天皇到訪添，有相為證架！

題外話(1)：總有一間係左近，真係香港先做到，呢度要行2KM先能夠搵到，香港人真幸福。

題外話(2)： 劉華去左日本？唔係，係edison，佢又拍鈴木杏拍劇，呢個節目係一連兩星期佢同鈴木杏去拍個特攝，英文加簡單日文，再加話要做個好男人好爸爸，真係"lum"死日本師奶！之不過edison未"lum"到d師奶震哂o既同時，電視打出伊豆方面有地震呢！

睇相：左上起 - 小海線列車、清里站時好大的飄雪呀！、野邊山站、行唔盡o既路、JR鐵道最高地點碑、路牌、途中想去的SL Land點知冬期休園，26號才重開、食飽晚飯回房，外面已經黑天哂 ！

天氣：野邊山、輕井澤、山形  - 晴

「輕井澤漫步」：凌晨夜未眠，剛弄好噚日o既速報，記起這裡除了八之岳外，就係一片星空最有名。冒寒打開窗一望，嘩！光害少，果然漫天星空，多到數唔哂。可惜相機係snap shot機，所以影唔到呢個景色。

清晨5點，再次起身，原來已經日光了，但這個時候的八之岳又係靚絕，一點雲都唔有。轉頭再訓，起來已是8點。食過早餐，就checkout到車站，這時車站的溫度計都只是8度零，我想噚晚都應該有零度或以下都唔定。

坐左個幾鐘小海線，一連兩天差不多坐了80%的路段，到佐久平換上長野新幹線到一站之隔的輕井澤。Lock好行李後選擇步行，從車站到舊輕井澤一來一回差不多行了3個鐘，在舊輕那邊，勁多台灣團友，那一帶聽得最多的似乎是閩南話多於日文。

回到車站一邊，再行埋Prince Outlet，因時間關係，只行了East Wing和New East Wing就走人。我想這之是最無買野的oulet，事關無咩野睇得入眼。

時候不早，已是5點幾，乘上長野新幹線到大宮，再換山形新幹線到山形，去到已是9點鐘。由於係車上已食了便當，於是落車就去checkin。反而係上房之後再出去對面的Aeon Maxvalu行下，24小時營業，內貌和香港的吉之島超市一樣，買左d士多啤梨和益力多，回房睇電視去也！

題多話：不經不覺一星期，又係時候睇大長今！今日係NHK總合播出第25號，就係韓尚宮和長今相認，皇上去浸溫泉，剛講到整硫磺 鴨....今晚電視又有地震報告，地點係岩手方面。

相片左起：星空 - 請睇真，有d星影到下，唔係你個LCD有死點呀，睇真d喇、早上5點的八之岳、野邊山車站的溫度計、舊輕井澤3張、輕井澤站後的outlet、在大宮方面剛好係日落西山、在山形新幹線上做問卷，賺了枝JR East的鉛芯筆、山形東櫻對面的Aeon Maxvalu，24小時營業

天氣：山形 - 晴、天童 - 風和日麗

「最高！天童人間將棋！」：遠道黎到山形，今日就係重點節目，天童櫻祭．人間將棋。從山形去天童一個新幹線站就到，10分鐘都唔使。一出車站仲要有無料穿越巴士送到去舞鶴山山頂的會場。10點半去到未算人頭湧湧，但那個無料拉麵，仲有100yen的北海道鄂霍次克帆立貝就已經有人龍出現。

搵到差不多係觀眾坐席方面的前座位，一路真係坐到差不多3點。期間有天童花駒舞、太鼓等表演，去到1點鐘，主菜上場，就係人間將棋。一棋將棋四段對七段，最終都係7段嬴左，但成個幾兩個鐘的對局，仲有見到d參觀者好比心機咁睇那個永世十段的解說人，氣氛良好。

睇完坐返無料穿梭巴士又返到車站。逛下土產店後就坐車回山形。回到去山形行下百貨公司，再回酒店放低些少行裝，抄下相就再次出發。今次去近地方山形城(霞城公園)，遊人亦眾多，但感覺無上田城夜櫻咁正。但總算已經睇左佢算。

由南門入去到大打門(東門)，剛好見到風流花見流，點知繞了成個大圈，又係回到南門那邊。睇完都無咩意欲再返入去，加上已經無左天守，剛好成個工地係正中間，雖則城濠那邊d櫻花又粗壯又開得靚，但人多好難影，加上最正的，應是去天童時見到班攝影發燒友爬到火車路那邊的城濠影最正，但已經成7點幾，都係收隊食晚飯吧！

相片左上起：天童花駒踊、天童人間將棋的小姐選舉的出線者、城樓上有人打鼓做聲郊、抬神輿、從半山上望下的人間將棋、祭典例：抄麵、隻棋會宦郁動架！、解說人與歡樂小姐、會後和扮棋的兩母女合照，媽媽來自新西蘭，女在日本教英文、玩完影張全家福、山形霞城公園風流花見流

天氣：山形 - 雨後陰天；東京 - 晴

「大出血」：黎到尾二一日的行程，原定到山寺一遊。但當7點鐘起身睇睇天氣，外面落雨，所以取消山寺之行，訓多個鐘先起身去食早餐，之後打道回東京去。

約下午一點幾從山形回到東京，即轉到品川東橫放低行李，再立即search d想去的地方印張地圖再係ekikara check下大概坐車時間就出發！

第一站去左松戶，但去到品川站，山手線全停，好在對日本坐車有d研究，唔理山手線咩事，即上京濱東北線去上野，再常磐線去松戶。呢度係睇Bandai Museum，因時間關係，唔入去d有料展館，只係係買野。點知齋買都差不多用左成個鐘。

第二站去柴又，距離不遠，用上京成線列車，無耐就到，可惜時間不早，去到寅次郎紀念館已經過左入場時間，趁仲未閉館，轉去賣店睇下有無野買，點知都係買左兩張postcard了事。回到帝釋天參道，d商舖一過五點就已經關門，準時收工去了！

跟住第三站，利用京成線去船橋競馬場站，地點係有多啦A夢店那個Vivit Square，地方好似唔細，但入到去多拉A夢店就原來幾細兼無咩好買，好在有其他精品睇，買手信夠方便，係度再花左成個鐘。之後本打算回東京轉去新宿，點知隔條街就有間Lalaport，好大間的mall，雖然無買到野，但都行個大圈都花好多時間。去到JR南船橋站已經攪到八點。

坐京葉線到回東京，再次行過間Uniqlo細店，不過都掃左d野，之後係另一邊的運動精品店又買埋手信，攪一攪，已經九點半。算吧喇，新宿呀，下次先黎探你喇。乘山手線回到品川找晚飯吃，點知有間好大的shop係車站內，叫做ecute，行兩行佢又夠鐘收工喇，咁食飯吧！沿到東橫的路上看了一看，最後都係行返去Wing B1階的天婦羅Tsuna八，特上天丼d蝦竟然係新鮮整的，認真滋味，抵佢賣2300幾yen。返到酒店，剛好SMAPxSMAP做完，真係行到唔記得左添！

題外話(1)：幾次黎日本都想買，最後都無買，就係日版的Monopoly，今次見只售2800幾yen，而行李位仲放得落，終於買左喇！哈哈！不過同時見到一款多拉A夢人生gameDX，係電視版，即係唔係棋盤，係插AV線入電視買共玩，但要6800幾yen，另有一款多拉A夢人生game+，紙上遊戲，賣相似桃太郎電鐵，紙板一面係全日本地圖，一面係世界地圖，賣3千幾yen，仲有新版本的多拉A夢人生gameDX紙版遊戲，但新版多拉A夢，興趣不大。

題外話(2)：山手線全停，到1600才重開，京濱東北線都有受到影響。係品川站已見有電視台黎拍，夜晚睇新聞，原來係高田馬場那邊有工程影響左路軌，湘南Line仲全日停添。

睇相時間：左上起 -山形上午有雨、Bandai Museum內的天地雙龍，好懷念啊！、七星俠原係係名譽店長喎、係柴又某店外，竟然有dd似似地樣的藤花，本來今日有諗話去JR富田的Ajikaga Flower Park睇藤花，所惜仲未成氣候、寅次郎紀念碑的賣店、Vivit Square的多拉A夢賣店、Lalaport、品川站內的ecute

天氣：東京 - 時晴時雨

「最後一擊」：噚晚臨訓search左一輪，本來打算早上先去築地食一轉壽司，點知一醒已經7點半有多，於是決定再訓左陣。

行程最後一天，享用左東橫Inn品川高輪口的西式早餐，食完就即拎行李落lobby寄存，立即出發到上野。剛才返多左陣，就係為左避一避通勤列車，點知去到品川站都好多上好多人落，但去到東京就架車"吉吉"如也。去到上野都仲係九點幾，先去Yodobashi巡左一圈，去到阿美橫丁好多舖都仲未開，包括想去行o既ABAB內的Uniglo。於是去左二木之果子掃左d食o既手信，轉頭再去Uniglo，去到已經開左舖，但剛好樓上有間HMV，於是分頭行事，我閃一閃去HMV睇睇DVD同CD，終於搵到隻《來自北國》的終章，2002年的「遺言」，但要成8000幾yen，都係袋袋平安吧喇！回到Uniglo再掃左d野，已經快11點，要回品川喇。

在預定時間回到品川，塞埋剛買的手信入背囊，揹住個令我矮左幾吋的背囊乘NEX到成田空港，checkin完先去食野，食完仲再shop多round，攪到過關後趕到死，仲要第一次在預定登機關閘時間後才到閘口，好在仲有唔少人入緊，而飛機竟然延了半小時才起身，返到香港剛好7點半鐘。

題外話：朝早新聞訪問JR西日本一年的尼崎脫軌事件的生還者和死者家屬，唔覺唔覺又一年了，仲要噚日攪出個事故來(東日本)。

題外話特別篇：今日坐港龍KA361時，真不好彩後面坐了兩條麻甩佬(真係氣憤難平，難免係稱呼得粗鄙d)，我都係第一次遇著兩個男人可以講唔得幾粒鐘(相信90%時間以上係度傾計，大概似係閩南話，但空姐派餐佢地又以一時廣東話，一時普通話應對，臨落機仲彈左日文出黎。佢地o既嘈法，令我地前面的日本叔叔都成日擰鈉轉睇去睇，男人如此長氣又嘈吵，真係頂佢！

好快完成左11日遊記的速報版本，今次順利完成，真係好事一件。2005年東北之旅，本想日日即做遊記，點知爛尾到家下都未完成。寫好速報版本，日後會改寫成正式的遊記，而因為速報版記錄左唔少當日發生的事的細節，所以到時遊記可以更加完整。

說回今次的行程，出發前本來打算只去8日，避了復活節假期的貴機票，但最後都覺得可能會因為只得8日變成唔多夠喉，卒之都係去左11日。今次都算遊左唔少地方， 仲有和三個人/組合在途上會合一齊玩，包括同學Y、網友R夫婦及網友C一家三口。

雖然今次已經係我第8次日遊，不過有唔少的第一次，例如第一次睇櫻花，仲要一睇就睇左好多個地方的櫻花，可將今次行程歸入追櫻之旅；第一次雪見，生平未試過去落雪的地方，今次坐小海線去JR全國最高海拔的地方野邊山，早上在淺間溫泉已小嘗雪花落下的感覺，怎知去到小海線的清里和野邊山飄起 漫天的雪花來；第一次浸溫泉，之前去日本從無踏足溫泉，因不甚好浸溫泉，不過今次豪花4萬幾yen入住了淺間溫泉的玉之湯，還有就係book錯日期矇豬豬咁去到先知book錯，但個室付露天風呂與夕朝兩餐，真的回味無窮；仲有第一次去果園任食士多啤梨；第一次 去到日本連一本旅遊指南書也沒買，靠出發前當日凌晨才編好的行程表行事，中間加設睇天氣做人，有靈感就係東橫d電腦即check車程、地點等；第一次和同學Y同遊日本，雖則時間短，但總算到過....好多的第一次呢！

如講到開心位，第一位應該是風和日麗的天童櫻祭．人間將棋，暴曬5個半小時睇足全程；第二位野邊山，雖則當日行餐矇去到JR全國最高路段個碑，竟然係做緊工程，所以 除左那個碑，碑底到四周都大剎風景，不過當晚成為Resort Inn黑岩莊的唯一客人，晚上冒寒(相信可能得零度都唔奇)打開窗睇星星，那個漫天星光(好說眼前閒閒地千粒星星)，加上客室望八之岳的風景，心曠神怡；第三位應該算是去左唔少的城/公園，賞櫻好，睇城好，合正心水，正！...如果再數，實在不能盡錄！

大雄
寫於2006年4月26日家中