最後在出發前四天才去問機票package(在此多謝A-plus Travel的Queenie，次次我都遲一遲才找機票，而次次佢都好快幫我攪得掂！)。卒之係20號確定機票package ($2,150+$396稅連附加費)，21號買個旅遊保險，22號買多本正文社出版的《台北旅遊全攻略》(7月書展時買了本星島出版的《下一站台北》，但最後只帶了《台北旅遊全攻略》隨團出發)。

第一次去旅行前遇上掛風球的日子，好在還是1號風球，但天文台已放風可能會掛上3號風球。於是天光前的05:00起身，望一望天，好在沒有下雨，梳洗後邊睇有後生的盧海鵬同莊文清演的民間傳奇，邊食點早餐，05:55出發到巴士站去。

去到巴士站等巴士，等的是和五月時去日本同一班E21號車，點知等等下落起細雨來，死喇！唔知係咪架車遲左，所以車上無位坐，要一直企到入機場。

07:06已到港龍的櫃位，今次兩人只帶了一個行李箱，再各自揹個細背囊就出發，所以好快就攪掂checkin的手續，仲破記錄地行李箱只有12.9kg重，比之前去日本，出發時兩人加埋已差不多20kg實在輕好多！

由於無咩世藝，買左份生果報就入閘去登機口睇下報紙等上機。今次坐的係港龍KA486，飛機的塗裝係港龍20周年版本的A330客機。08:30起飛，09:55就已經降落中正機場，外面的天氣正是藍天與白雲。

由於出發前一星期已利用網上申請入境簽證(https://nas.immigration.gov.tw/)，抽了點時間去金鐘的中華旅行社預先取證(去到都係15分鐘就已攪掂)，於是落機過海關前只係要去換錢就ok！到海關前的大堂，一邊係中國商銀的櫃位，另一邊有臺灣銀行，不過臺灣銀行無開，於是一條人龍就係中國商銀前出現，而佢又竟然只得一個人係度做兌換。卒之都排左成半個鐘先換到錢，是日匯率係4.145，另手續費NT20(即新台幣20蚊，下同)。換好錢，出海關只消幾分鐘，再 拎埋寄艙行李就正式踏足台灣。(如取落地簽證的朋友，位置在海關大堂的中間位置，但又要換錢又要申請落地簽證，咁都幾花時間下。)

一出海關，就係詢問櫃位，可以拎下地圖、單張，再向右行轉個彎就到機場巴士的位置，難得一入去就有個飛狗巴士的阿姐大大聲招呼，又半咸淡廣東話，於是決定坐浮 誇見稱的飛狗巴士到台北市，車費承惠NT135一位。11:00開車，12:00就已經在天成大飯店的正門落車，快靚正！

花了10分鐘checkin同埋放低行李，從此落黎就係台北之旅的開始喇！第一站係離酒店一個街口仔的捷運台北車站，一落去就已經有便利店、吉野家、YAMAZAKI Bakery、誠品書店等等，仲有書上介紹的捷運商品館。先入去睇睇，不過d商品唔係咁正，但好似d車箱型的餅乾，同日本那邊買到的都係咁o既樣。

再來就係買張悠遊卡，等同香港的"八達窿"，但佢只可以係捷運同部份巴士上用到，不過貪佢方面，都係買佢作為今次行程的主要交通付錢方法。走到去一d自動售票機， 每張悠遊咭要NT500，部機就入NT1000紙幣都得，點知佢竟然只找NT50的硬野，無軟野找贖，於是無端端個荷包多左10個NT50壓袋。手持兩張悠遊卡，好不容易一個入閘、上車、落車、出閘，幾分鐘內就由台北車站去到忠孝新生站(捷運車費利用悠遊卡會有八折，即係NT20的車費只扣NT16)。

去到忠孝新生站，找到台灣科大那邊的出口，第一站係光華商場。我2000年已去過，今次見到的和當年都無咩變化，一樣係電腦配件、舊書、日劇光碟，仲有"咸咸"o既一個商場。而睇到d電腦配件或組裝機的價錢同香港相差無幾(因出發前係香港剛好買了部新機，格過價)，而日劇就新舊都有，不過而家少時間睇，所以都無買。

逛完都成13:30，要食晏仔喇，附近繞了個圈，唔知行到邊，於是決定就近搵間就入去食。剛好行到間MOS BURGER，係日本咁多次真係一次都無幫襯過，點知第一次就竟係台灣食。叫左個燒肉珍珠堡set和有機米海洋堡set(NT270)，味道都ok，食飽之後d杯、盤之類係要自己分類丟到垃圾箱，香港方面要學下野喇！

14:00，行出MOS BURGER黎個伸手牌，打個的去今午預定的行程 - 袖珍博物館。去到一個商業大廈，付過NT85的士費，見門外的柱掛有袖珍博物館的banner，於是估下估下咁行入幢商業大廈，係左手面有一個小小的入口，仲係落地庫，真係唔係幾顯眼。落到去轉個彎就到入口處，先買票NT180一位，由於係網上預先印左coupon，可以免費獲得價值NT20的Passport(用來蓋印仔)。入到去有好多世界各地的娃娃屋，都行左成個幾鐘，當日仲有特別展係丁丁歷險記，即係我地常見的TIN TIN。行埋賣店就離開，今次用行路方法打算回捷連站去下一個預定行程 - 淡水。點知手上的書有夠精簡，卒之真係行錯方向，最後問過兩個師奶指點方向，原來係松江路上走錯相反的方向，唯有沿路再行。不過，行錯有行錯的得著，亦係自由行的特點，唔係又點會行過一個好似深水埗排檔的四平陽光商圈見識一下呢！

行左一大餐，終於回到見到光華商場和台灣科大的地方，哦！原來剛才食晏的MOS BURGER就係對面街角，唔係呀嘛！

16:55在忠孝新生站乘上捷連到淡水(要在台北車站轉車)，17:38終於到達(車費NT40)，一落車係月台剛好趕及日落的光景，拿拿聲影返幾張相先！

影飽淡水的日落光景，就回到靠近車站的位置睇下d假日攤檔，有人彈豎琴，又有唔少幫人畫漫畫造型又或素描的檔口。跟住就往中正路方面行，隨即進入人頭湧湧的商店街(老街)，兩邊除了商舖仲有d檔攤，簡直又係夜市一個。途中食左滬尾豆花的花生豆花(NT35)和芋圓豆花(NT40)，仲有公明鹽酥菇(綜合/NT50)，魚翅阿給(NT30)，魚丸湯(NT25)，仲食埋巧克力+香草天霸王霜淇淋(細/NT10)。繞了一個圈，係碼頭旁邊坐邊食霜淇淋期間，仲見到對面海同埋碼頭邊有人放煙花添！

飲飽食醉，見碼頭原來有船去漁人碼頭，於是買過船票(NT40)就上船，係船上又大風，又大浪，又開得快，加上大家都唔多願係船艙內，企哂係船尾吹風，真係吹到頭都甩，唔使好耐就到達漁人碼頭喇！落船整理一下個"巢"散o既頭髮同埋抹下蓋滿水花的眼鏡片，就四圍行下。

但似乎d舖頭來來去去都係賣相類的東西，攤檔又係，除了有個剪紙阿叔的攤檔較有睇頭，行過條橋去到漁人碼頭就更加有點削，最終行了個圈就坐紅26號巴士(NT15)回淡水捷運站，再行多次老街。今次食左阿香鳥蛋(NT20)和飲左阿媽的酸梅湯(小/NT25)。22:15乘興回捷運站乘車回台北車站(NT40)，終於23:00回到天成大飯店，入住820號房。