    |
|
||
|
食飽就跟今日行程出發喇！但之前想先去搵搵星期一早上去野柳o既車先，依書直行，點知上下落落，穿過10點幾原來都仲未肯開燈(莫講話開舖)的台北車站前地下街，終於去到個巴士站，之但係...「咩話，搬左！頂佢呀！」點解咁激動，就係書可以係錯o既，但地下街一路d固定告示都係咁點你去架喎！之後死死氣行返地下街再去應該要去的地方，細心留意下， 發現d告示仲係連國光都仲寫緊台汽o既情況下，唯有自嘆倒霉！ 終於回到地面，原來多線台北對外巴士都集中係新的國道客運台北總站，入面冷氣開放，搵o岩個counter睇左聽日要幾點坐車，幾多錢車費，ok，正式出發！下一站 - 中正紀念堂。 |
    |
||
 |
用捷運話咁快就到，因為只兩站車程(NT16)，出口轉個彎就已經係國家戲劇院喇。但行多兩步，哎！出事喇，攪咩係個廣場度有工程架！諗真再睇真，應該係過兩個星期雙 十的活動o既準備卦？咁算喇，拍幾張以"大中至正"做背景o既相，就向紀念堂方向邊影邊行。花左唔知幾多分鐘，行到上去紀念堂旁邊，做咩圍起左咁多人o既，哦，原來時間剛剛好，11:00的衛兵換班儀式黎料。又影相又拍片，嚴肅到鴉雀無聲的儀式一 結束，好快大家又立即散水各自遊覽。咁我地都順勢落返下面睇紀念堂的展覽部份喇。由於都有幾團遊客黎到，於是採用左迂迴觀覽路線，你呢團人企哂係東咩，我繞左去睇西先，費事同佢地"質"埋一齊，一來個導遊係度講解嘈嘈閉，二來各位團友又企到頂住d順路，咁我地唔趕時間，就下佢地喇！
|
||
|
不經不覺又12:15，閃喇，大孝門，咦，唔o岩路o既？要行另一邊喎，大忠門至真！ 出到路口，一條直路唔知向左走定向右走好，剛好有得過馬路，過完向個途人問個路：「錢溫，先姨佬依端齋乸依慌尚？」(廣東話譯：請問，信義路二段在那一方向？)，點知佢原來係外省人，唔係台北人，但佢又好肯定話相信就係果一邊！okay！good！ 就係果一邊，信你喇！ 行左約20分鐘，終於到達目的地，就係信義路二段和永康街交界的鼎泰豐。離遠已經見人頭湧湧，不過一心一意而黎，拎返張飛先，19號，而家顯示板係50幾號，咦，即係仲要等多個轉先到，於是閃開行下先。係正呢間鼎泰豐隔離就係金石堂書店，隔個街口就係屈臣氏，再行過兩間舖就有間義美，入去買返罐野補補水先，可樂一罐盛惠NT18(4個幾港紙，又幾平喎！) 吹完成罐汽水再行返去都只係去到60幾70號籌，留意下身邊，除了台灣人，就係日本人，仲有好多係團黎添。見有時間，就入去金石堂涼下冷氣先。黎到台灣，都係第一次正式入書店，睇左一輪，日文書籍的確計落有少少平左，但台版書，點計都同香港差不多，於是掃下有咩新書，最後只買左本新井一二三的《東京上流》，買都係因為剛出版貪佢夠新o者。睇多兩睇，咦，咩突然又咁快，10幾號喇，要出返去等。「19號，請準備！」，嘩原來就到時係叫定你先，等你落定order快d上菜，佢又快d做多轉枱。 前後共等左50分鐘就上到2/F，呢頭沖完個茶，無耐d食物就到，時間仲夾得幾好，半小時食完走人，貓骨幫趁過個洗水間，話每有人一出，門口個阿姐就會飛身入內先清潔先再輪到第二個，如此服務， 真係大酒店都未必有呢d service！ 落到樓下結賬，趁住果少少時間，影返張廚房相先！(廚房佔左樓下半邊舖面，有大玻璃可以睇住入面架)。 |
  餐單 蟹粉小籠包(NT290) 鮮肉大包(NT35) 菜肉餛飩麵(NT120) 豆沙小包(NT140) 埋單：NT585 |
     |
|
    |
食飽決定走回頭路，順道消化一下。回到中正紀念堂捷運站，坐捷運到士林(NT20)。去到士林見時候不早，決定打的去今日o既重點故宮博物院。坐左NT110的士去到目的地，路途感覺上都幾遠下咁，不過時間關係，唔理咁多，快快步去睇野先，因為怕唔夠時間睇。跟著人潮，向左上一截樓梯就見到孔子像，先拍個照，阿Johnny對住o既就係博物院入口。付過入場費(@NT100)，入到去有兩邊，睇左好多朝代的文物，包括清代那舊肥豬肉和白菜(玉石)，再睇埋隔離o既法象威儀展(有成300幾個佛像，睇極都睇唔完咁)，再睇返小冊子，原來呢度只係特展室，仲有主菜架？！(據入場劵上所示，可憑劵係2006年12月31日前再免費參觀一次) 不覺已經4點半，趕快去到展覽區，先上三樓睇左皇帝的印章，仲有珍玩、玉器等展覽，再趁最後幾分鐘入去地下的賣店睇睇，唉，睇少左二樓的四庫全書，蝕左！ |
||
|
睇單張話可以憑當日票到隔離的花園至善園參觀，點知去到有部閘機，要投個NT10蚊先入到，真搵笨！於是去了坐巴士紅30(NT15)到劍潭，今晚晚飯之地。坐左半個鐘，總站到總站，幾方便。 已經係差不多六點鐘，天都開始黑喇，先去文林路那邊的夜市逛逛，由於已去過淡水夜市，今晚再行夜市查實無甚特別，最多人排隊o既係大炸雞排，而行到一半，竟落起雨黎，仲幾大粒添！於是擔住傘繞埋個圈回到劍潭捷運前的士林觀光市場，即係先前在基河路那邊的夜市排檔搬過來的部份。 這邊還是第一次來，比舊的秩序的確好很多，通風都ok，不過十足香港食環署果d街市熟食檔，行左兩行，見鐵板燒都幾多人幫襯，好喇，就佢喇！坐低點左兩個套餐，一份雞排+花枝蝦球，一份鱈魚+香菇，另可樂一罐，點知黎左罐唔係可樂，而係黑松沙士，得個甜味，都唔夠氣o既！ 每份餐都仲有跟個白飯、湯同炒菜，即席鐵板的確夠火候！幾味菜都好好味，埋單計數都係NT520，但已經食到飽飽。食完再繞圈，玩過夾公仔機，但係台灣幾日，花幾幾百台幣都未夾到過一個，激氣！見外面仲係落大雨，繞多個圈，見有釣龜、釣蝦，仲有撈金魚，蝦仲係即刻可以比佢燒埋食添。睇多兩睇，因為行左成日腳仔攰，都係要走人喇，臨尾飲多杯芒果汁就 較腳喇。 回到捷運台北車站(NT16)，好快又返到最近酒店的出口，今晚行下車站內的誠品書店，買左本小王子(NT99)，不到9點半就已經返酒店房休息喇！ |
        |
||
|
另外，好在酒店房有NHK，仲有佢o既BS2台睇，晚間新聞睇到報導世博2200萬人入場的閉幕場面呢！ |
|||
黎到第二日，因為個package包早餐，咁梗係唔蝕底，事關係日本東橫Inn飯團早餐食少
日都惹黎部份熱情的網友話我浪費，好！早d起身咪早d囉！08:00起身喇，之後落到位處3階的地方食早餐。咦？咩係酒樓黎o既，咩解同香港果d
"頸靚"、"石窟"(自己諗諗係邊間酒樓名)咁樣o既？入去坐低真係沖杯中國茶過你，但係食呢？中西日式俱全。有粉有麵有沙律有麵包有蛋角有點心，仲有白飯靚仔泡菜漬物麵豉湯，正一聯合國buffet早餐。
