已經去到第三日喇，今日會去較遠離台北的地方，於是07:30就起身，食飽早餐，09:00正式出發。

由於已探路，09:17已經到達國道客運台北總站，買了到金青的巴士車票(@NT80)，09:30發車。這是一班不用轉車就能到野柳的巴士，沿途先經忠孝東路一直走，中途站越來越多人上車，司機大佬仲開大大聲收音機係度聽，好似去郊遊咁。

巴士越駛越遠，一路遠離台北市...Z..ZZ.......

坐左個幾鐘巴士，生理時鐘自動啟動起身程序，立即掃視窗外景象，睇睇去左邊先，四圍出現萬里鄉的東西。斷估未有坐過籠o既，到了10:54終於黎到野柳喇。司機叔叔好好人，臨落車可能見我地兩個戇戇居，斷估係遊客，於是指埋路話後面轉落去斜路再行就係喇，真係唔該哂！

一路沿斜路下坡，人影唔多，旁邊有d幾鄉下o既士多舖頭咁，再來就係漁港feel，但真正時候"不早"，船都係泊哂係度而無哂人係度。行多兩行，好快就到達野柳風景區入口(約10分鐘路程，仲係計邊影邊行)。那裡一邊好似去左西貢通記那頭咁，係一列的海鮮食肆，前面空地係車場，再來係幾列的檔攤，賣下咸魚、小吃等，再前就係個外表都幾舊下的海洋世界，睇書 介紹時見到本來想入去一下，但現實中的賣相就.....，再加埋入場費要NT350....，搵日有機會先幫襯喇！

入返正題，就係頭先那一堆東西的旁邊就係野柳風景區入口的售票處和洗手間。入場費只NT50一位，買票後就可以行到後面，一旁有間遊客中心，它對住的一條路就係入口收票的地方，和前往參觀的路。沿路行不遠，漸漸離開兩邊都有樹包圍的地方，風越來越大，有些木造的看台在路邊，不遠處就係那些蕈狀石的自然景觀。遊人都算不少，一路有人進入，亦有迎面離開的。邊行邊影，睇完燭台石，又到壺穴，之後又薑石、仙女鞋.......而風就唔理你係度睇緊野，不留情面咁連同咸咸的海水打埋黎，行左幾行，已感到成身咸味。

終於見到此行最大的目標物，就係女王頭喇，影左d公式post，再行多兩步，咦，真係得果個位係咁，一行多兩步就已經唔再似樣喇！如是者睇埋豆腐岩、瑪伶鳥石、海蝕洞等，唉，出事喇！話說入口已有說明風景台內無洗手間，要去請早，點知行行下，肚子痛呀陰公，係一直堅持再堅持的情況下，大部份要睇的都睇左，去到人生交叉點，仲有要行到好出的珠石和二十四孝石未睇，點呢？唔得喇，頂住、頂住、頂住......終於行返到出口，書 度話呢度係手信街，應該有救喇，點知係一列封了的排檔，頂到回原點的入口售票處旁的洗手間，總算解決左一件大事！

在攤檔和海洋世界的商場繞了一圈，無咩吸引，於是回到巴士站到基隆去。途中有d帶左頂草帽再包個毛巾的阿嬸起勢問食唔食飯，呢d都係沿途的海鮮飯店的阿嬸。

沿路回到巴士站，無耐就有基隆客運的車到，見前面有兩個女仔都係想上車，於是問句係咪去「枝籠」，點知無反應o既！原來係日本人，好在車上有位阿姐樂意回答我o者。點知上車無足夠的散紙，又無找贖，於是NT88蚊(@NT44)的車費，變成入左NT100蚊，蝕左NT12蚊添！

約35分鐘車程就到達基隆火車站前的總站。

在基隆本打算食個午飯，畢竟已經係13:30，先過天橋到基隆火車站睇睇有咩火車回台北，因為本打算去完九份，就再回基隆到廟口夜市晚飯才回台北。入到火車站，好落後下 咁喎，無電子指示板，只有細細個掛起的小牌組成的火車班次同埋途經路線的車站牌，好在科技發達，唔使抄低，影低佢就得喇。好~~食飯去！在基隆的街上行了一小圈，硬係無咩o岩口味，於是決定回到巴士站，繼續幫襯基隆客運到九份去。在接近巴士站的時候，本想到附近的義美買d野食先等車，點知剛好有車到(@NT44)，於是頂住肚餓先，一於到九份先食野，而原來的計劃，亦決定更改，今晚都係唔黎基隆喇，因為實在有點不吸引的感覺。

48分鐘的車程，先經過了瑞芳，之後就是上斜路，14:42終於到達九份的舊道口落車，旁邊就係一個觀海亭，好多人霸哂位係度睇風景。前行幾步，有間七仔，果度就係舊道口的入口，遊人好多，跟大隊行就ok喇！

入到去兩邊都係店舖，十足遊客feel，賣紀念品的、賣食物的、賣土產品的，再加上遊人眾多，都幾熱鬧下。但剛才係基隆skip左食午飯，係度首先都係食d野先。行到去一間掛住九份古早丸，唔知咩係古早，但見好多款魚丸，就入去喇！一坐低睇睇，原來店內都係阿老闆娘o既相，播緊o既電視，原來係錄左影的節目，原來又係老闆娘o既，不過理唔到咁多，叫野食先。點了五味綜合丸湯(NT50)和魯肉飯(NT20)，好食！打左底就輪到食第二味，行前無遠，賴阿婆芋圓，又好似幾正咁，一於會一會佢，NT35一大兜，有幾款唔同味的芋圓， 再加上一堆紅豆、綠豆仲有冰，都幾好食。不經不覺就行到觀海亭(另一個)，旅遊書都有介紹坐下係佢地o既露台嘆杯野睇下九份的風景，好，就入去飲杯野先，芋香奶茶+胚芽奶茶(各NT70)，坐下睇下天陰陰的風景，查實都唔算好爽，不過好夠悠閒，都算係咁。

橫向行完再走回交匯點，來個縱向，點知向上行 到盡到達九份國小，都無野好睇，除了有間賣芋圓的舖頭就無野喇。於是又到向下行，往昇平戲院方向行，就到左例影的樓梯，即係悲情城市果個例景。落哂樓梯，左邊就係只得個殼的昇平戲院，影個 相留念，就回頭上樓梯喇。呢個角度好多人係度取景，所以都好繁忙下。

睇下個錶，已經時候不早了，於是走回程路，順道買埋手信，買了幾包杏仁肉干(@NT120，好脆口)，李儀的鳳梨酥(@NT15一件)，10件一個禮盒，夠慳位的包裝，另外仲有如咖哩酥，但無買，只係買了幾盒鳳梨酥，都夠重了。

約5點三個字回到巴士站(往瑞芳、基隆方向)，遠望見未有車又有人等車，於是慢步到巴士站，點知正好有個的士司機係度兜客，開價NT150，無人騷佢，但佢又好夠informative，順口講埋幾點會有火車係瑞芳車站返台北，又而家上車會趕到，ok！咁pro，一於幫襯，仲要加上比旅遊書所講要NT200都平左NT50添！點知行左唔夠幾步，見到 佢大大聲叫出隔離舖內一個師奶(禮貌點應稱呼為太太，話哂坐過同一架車)。原來有人搭埋變成泥鯭的，司機大佬再開個價話多左一位，可以少比NT30，即係NT120就得，心算一番，雖則似蝕又似賺，算喇，程的士計落都係30蚊港紙，豪比佢喇！

3個字車就到達瑞芳車站，架的士仲停到正火車站門外，NT120抵比喇！即入車站大堂睇睇時刻表，45分係有車喎，買飛先！點知，賣票阿叔話full哂囉！算喇，咁後一班車喇，1056班自強號(@NT80)往台北，都係18:14開出，行陣就夠鐘喇。買過票，就出站外繞過圈，不過無甚特別，站前對正入 一條街有個美食街，點知入去一睇，充滿油煙的市場+食肆，速逃！

選擇回到車站，上月台坐坐，都好日本火車站月台feel喎，影下車，無耐就夠鐘火車到站喇(好似遲左幾分鐘，呢part唔似日本喇！)，車內好多人，車廂都幾殘，由於對號座位分別在兩個車廂，於是上車各自就座，約半個鐘多d的車程，車廂廣播傳來好似閩南話得黎又好似阿媽叫仔的女聲：「台北站喲、台北站囉！」真頂癮！

回到台北車站，只係18:56，都係先返酒店放底幾廿斤重的鳳梨酥先再去街。19:20再次出動，19:35已經到達捷運的龍山寺站(@NT16)。去龍山寺，唔係打算去龍山寺夜市，而係去附近的李錦利買有名的八仙果(@NT120，香港永安百貨和廣良興約賣40幾至50蚊一包)。 

第二次到李錦利，相距5年，已經由一個細到似後巷舖的小舖變成一間商店(不過店內燈光好鬼暗)。二話不說，8包八仙果入手，送禮自用都適宜，另買了2包花生糖(@NT100)。呢頭放低鳳梨酥，果頭又入手信塞到個背囊滿一滿囉！ 

手信買夠喇，又係時候開飯食晚餐。用腳走去到西門町，四圍行一行。剛巧食晚飯時間，街景都好多人，行到阿宗麵線，而家個舖面又係比五年前靚左好多，一人幫襯一碗(小，@NT35)，好味道！食飽又繼續行，黎返個甜品先，今次食左果一間叫"冰淇部"(舖入面係賣衫的)的雪榚三文治，包括薄荷朱古力+奇異果同埋瑞士朱古力+芒果(@NT40)，又係幾好味。行足一日，腳仔軟，臨尾掃多個蘋果養樂多先坐返捷運返台北車站(@NT16)。 

返到酒店都10點幾，散哂！不過都要執下野，事關聽日就回程喇。