|
|
|
|
大雄的話 |
|
|
刊出日期：2001年12月31日
|
|
|
刊出日期：2001年12月25日
呢兩星期都病，雖然都好返好多，但都未完全好返。噚晚平安夜去左尖沙咀趁熱鬧，不過個氣氛真係好唔掂，又話咩推廣旅遊業，又會點粉飾，點知果d燈飾實在"削"得可憐，卒之全程都係體現左香港人特性，就係有咩都去趁墟，人逼人行完都唔知做咩。途中好似個小花市咁，賣螢光棒的十蚊十枝、十蚊十五枝、十蚊廿枝咁一路比人感受經濟唔好一味要鬥平的境況，又或者尖東的永x廣場同香x里拉酒店外牆的燈飾咁，完全體現左死魚死水一潭和慳到不如唔好整的香港經濟。香港使咁多錢都攪到咁，真係要學下日本，人地無假放，都係民間慶祝活動都可以咁有氣氛，而家日元咁平，香港再唔攪攪佢，我諗香港人就算唔北上渡假都會飛左唔少人去日本渡假啦！香港的旅遊業...唉...o徙氣！ |
|
|
刊出日期：2001年12月16日
一星期好快就過去，下星期又到聖誕節了！可惜香港只得兩天的假期，也沒有甚麼地方好去呢！雖然很多網友都會去日本渡假，但我就只能在香港過了！很窮、很窮呢！無論金錢和健康兩方面都窮，剛過去的一星期就病到死去活來，本來初步完成了「和風商店」後可以抽多點時間整理一下被遺忘了的網頁，但星期初工作忙得不得了，星期末就病得不得了呢！唉~~ 昨日看了初上畫的「千與千尋」，強烈建議先看一下各大雜誌的影片介紹才去看，因為在某程度上都很難用娛樂的心去提摸片中深藏的喻意，除非你以小朋友的心去看，就是看完一齣好卡通片開開心心走出戲院就算！ 看了一篇在週末出版的雜誌「唔好摸」的廣告，是世界盃的電話繩廣告，標價比我「和風商店」貴差不多一倍，仲只預告月底才有售，大家不如幫襯我買喇，我早佢個半月就有得賣，仲平成半喎！哈哈！ |
|
|
刊出日期：2001年12月9日
今日舉行了第三次的網友聚會，又食又傾，好好玩！黎緊o既一月，應該有另一次聚會，地點同日子將會於幾日內公佈。其實聚會係一件幾好玩的事，其實出到黎唔使咁怕羞，只要一傾到日本旅行的事，哈哈，大家就傾到好似識左好耐的朋友一樣！未出過黎聚會的朋友，下個月又有機會喇！ 和風商店已進入最後核對資料階段，大家多多幫襯，唔係我無錢去入第二次o既貨架喇！ 當和風商店開始運作後，哈日病院、大雄的香港世界同大雄的日本世界積存左好耐o既料將相約出繼出爐，敬請留意喇！ |
|
|
刊出日期：2001年12月8日
經過一番搏鬥，「和風商店」的設立已進入測試階段，大家而家可以入黎睇下有咩貨賣(大約3/4貨已post出)，順便比下意見，不過買賣係唔會進行住，要落order請留意正式開設時的通知。(想睇野，按上面banner喇！) 明日就係第三次網友聚會，今次的負責人係Linda，先多謝佢負責做左今次的攪手，唔係我真係無咩時間攪。今次因座位約只得15個，所以好易就full左囉！向隅的網友，就要留意下一次的聚會通告喇！暫時可以預告一下，來年的1月7-10日，可能會抽一晚舉行聚會，目的是....哈哈！ 多謝我閉關的一段時間各位依舊捧場，各老友兼老手網友仲幫我答左唔少新黎的網友問題，真多謝！不過呢幾日仲要大家頂住先，你頂得住嗎？ 上次大雄的話的電腦問題係大細機間唔同操作系統所造成的問題，而家無事喇！我無發脾四架，大家唔使開解我喎！哈哈！ |
|
|
刊出日期：2001年12月5日
閉關中 並給Windows ME 和Windows 2000 玩到想死的大雄... |
|
|
刊出日期：2001年12月1日
不到一個半月，又多左一萬人次喇！真係要多謝大家賞面，因為就算係我去左東京幾日，人次下降近半額，但都可以咁快過萬，利害！ 明早就係考一年只得一次的日文試，但剛做過兩份past paper，但好似唔係好掂，事緣停左半年無讀日文，好多野都唔記得，特別係文法方面添！不過唔緊要，考呢個試都係想測試下個人日文程度，考成點都唔緊要，去到日本玩時頂得住就ok喇！哈哈！在此預祝各位都係考試的網友，不論級數都合格而回喇！ 近兩日工作好像回復到比較正常的程度，早前就真係做到命都無，所以，期望完成日文試後，全力砌網！ |
|
|
刊出日期：2001年11月26日
噚日講完好忙，今日點知係勁忙！朝九點半晚十點半，食晏三個字麥當當一號餐攪掂，晚飯十一點開飯...唉... 點知返到屋企，收到電郵通知都有唔少留言，但係...兩個留言冊都死鬼左，好鬼邪呀！所以，本來倦到無力寫大雄的話，都變左要借呢度寫兩句回應下大家的留言。 師傅：你係得o既！ |
|
|
刊出日期：2001年11月25日
好忙、好忙！忙左一個星期，但黎緊一星期應該都一樣好忙！同事放假、日文考試都會係呢黎o既一星期出現呢！和風商店的建設又未做，唉... 呢個星期少左好多瀏覽人次，留言亦少得可憐，唔知大家去左邊呢？好在其間都有不少朋友來"貓"，say個hello又有，報料又有，可惜真係好鬼忙，無咩時間整網頁。 十二月二日就係考日文試的日子，雖則只係考三級，但今日一做舊的考試題目，點知...哈哈！唔係好掂添！今個星期要係工作好忙之下都要認真d攪攪佢先得喇！ |
|
|
刊出日期：2001年11月19日
返左黎香港幾日，點知係十幾廿度的天氣下仲病左，又凍到蓋好多被，但幾日前係東京，都係室內著短袖(無開暖氣架！)，外出都係一件短袖T-Shirt加衛衣一件，早晚加件薄外套咋！仲有，係日本我o既鼻敏感都無咩事，拎張紙巾出黎都係抹咀，都唔似係香港咁大包雲吞！真懷念！ 但一返到公司就排山倒海咁鬼死咁多野做，條瘟神又呢期久不久埋黎拎d無謂野黎做，真係唔得佢死！ 病病地，都係訓喇，仲有好多野未做呀！而和風商店的推出日期或會因為工作忙而受影響，請大家見諒，買返黎o既好野先放多幾日係我屋企先囉！哈哈！ |
|
|
刊出日期：2001年11月15日
大家點呀？我返左黎喇！你地都好唔比面喎，我唔係香港時hit count少左咁多o既？ 係日本的六日，都幾倦下，因為出發前一晚都要係公司做到好夜，去到日本又要四出掃貨，每一日都行到腳仔軟，襪都著穿幾對呀！今次買左超過二百件好野返黎，我會儘快放在新的「和風商店」供大家選購。因為第一次辦貨，有咩買漏而大家想買的，請比下意見，將來再做好d。好鬼倦，半夜返到第二朝又返工，訓覺喇！ 寫於成田特急25號4號車5A上的大雄的話 (對面位個鬼佬好鬼煩，懶係勁咁教同行個日本妹英文，又話自己係咩banker，但放件行李都蠢過人，講野又無sense，落車係邊落又唔知，仲要我教埋佢同埋佢個同行日本妹，真係頂佢唔順！) |
|
|
刊出日期：2001年11月10日
去日本前的一日，已經連續幾次係遇上突如其來的大量工作，今次亦不例外，早上去過觀塘、新蒲岡、大埔、上水、粉嶺再返到公司，諗住做到七點零都走得，點知一來就十點半。不過，已比以前的幾次好，那幾次凌晨兩點幾才能完成工作閃返屋企執行李。 今日將會係舟車勞動日，到達成田後就要去板橋，今次住的酒店所在地。放下行李又要起行，因為幾天的晚飯，都有杏子安排好了，今晚的行程會去一個叫三茶軒屋站的地方，好在有鐵路圖係手，原來係涉谷搭東急田園都市線兩個站就到呢！ 今次去日本無咩特別心情，因為去做私幹，所以無咩去玩感覺，加上活動是探朋友、同台日港朋友吃飯，去到仲要寫下稿(因為一返到就到期交了)。不過，這趟會帶埋notebook同digicam去，咁我去影多d好野大家睇喇！呢幾日，大家繼續支持下我網站喎！ |
|
|
刊出日期：2001年11月7日
估唔到一講我去日本，就有唔少朋友/網友搵我，買野無問題，不過千祈唔好比太大壓力我，因為今次目的係去掃貨返黎係網上賣搵銀呢！今次去到，係住係一間唔在山手線上的商務酒店；去的地方，亦唔會係大家旅遊必去的幾個景點，希望從中搵到正野返黎比大家。有時間的話，或者會來一個大雄版的「途中下車」呢！今次去到，仲有探人，例如在日本的香港友人、工作中的哈日杏子、原智子、三浦天使.......好多好多...... 今日拎機票，順便招攬到我特別企劃五的第一個banner廣告。這個agent係我同我朋友們搵開的，值得推介。 但係唔知點解，次次去旅行都係好多工作死出黎要做，希望今次唔使好似之前幾次旅行咁，做野做到半夜二點先收到工，返屋企先執行李，執完就夠鐘去機場囉！ |
|
|
刊出日期：2001年11月6日
呢幾日真係比個alxbook留言冊激死，我前後共有7個留言冊係同佢地申請o既，而家好多個都有問題，再加上呢排連日本自遊易的論壇都出埋事，真邪！於是把心一橫，換住個似似地樣的先，大家有咩意見或者仲有更好的提供，唔該通知聲！可能慣左大家係留言冊日日溝通，無左佢真唔掂！ 特別報告，大雄今個星期六出發東京六天，作探朋友兼掃貨兼影相之旅，大家邊個要訂三鷹市的宮崎駿館的網友，想幫手睇下有無得預先買到飛，就唔該出聲。當然先銀後貨，唔係買左返黎無人要好大鑊！今次出征，由買機票、簽證都唔夠一星期時間，目的係掃一d正野返黎賣，大家拭目以待吧！手信嘛，好鬼窮，唔好問我好喎~~哈哈！此外，因為飛左，網頁的更新又要大家伸長條頸等下喇！ |
|
|
刊出日期：2001年11月4日
難得又星期日，不過又係勁訓覺中渡過，因為真係好眼睏。 一覺醒來，先睇星期六晚的星星旅遊北海道特輯的第二集，北海道真係正呢！之後就睇今朝播出的迪士尼渡假區廣告雜誌(今朝唔記得睇唔緊要，下星期同樣時間都應該有得播)。聞名不如見面，新的海浪世界的確麻麻，好多地方去歐洲睇下風景仲有情調，最抵死就係有中菜同港式飲茶，咁我地去到真係得啖笑。 近幾日無論我這邊的日遊經驗募集所和日本自遊易的日遊論壇都出了問題，真激氣！ 繁忙的一週即將開始，週末更有大攪作，遲下大家就知道喇！ |
|
|
刊出日期：2001年11月2日
轉眼又一星期將過了。這幾日異常潛水，係因為朝朝早起，係公司又無咩時間上網。瘟神的那單官司，連法官都要叫佢停，因為已超出預算的堂期十幾天了。於是，連日來好似大家睇電視或新聞前一排阿小甜甜爭家產咁，見到d人好似返大陸咁拖住架車拉住一大堆的files上court去也！朝早拎去，散庭拎走，正宗日托夜托，所以這星期日日做了咕哩，跟本做不了甚麼本身的工作。 今日拿了一天年假，去了做台灣玩具書的採訪，因為平日去採訪比較方便，下午遊人都比較少，影相都方便d。不過，有一樣就係，當越寫越多，形容香港的玩具店的詞語都差不多用盡了。事關香港很多玩具都大同小異，太特色的實在少得可憐呢！不知何時有人開間特色d的玩具店呢？前陣子看過日本的KIDDY LAND的franchise費用是54,000,000yen，有人打算係香港開返間嗎？ 下星期更加忙，因為同事放假，於是一人兩職。仲有，下星期應該會去實踐重大的企劃，大家到時睇下就知咩喇！呵呵~~ |
|
|
刊出日期：2001年10月28日
下午訓醒，睇左手塚治蟲的原著改編而成的日本電影VCD「玻璃之腦」，故事勁簡單，睡公主、王子、五日、錫錫...但又幾好睇喎！一代日本動漫畫大師，正宗的醫學博士，係自己的作品經常都有和醫學有關的內容，真係幾吸引！唔知大家又鍾意睇手塚大師的那個作品呢？ 因為「電子商務化」的企劃，上星期差不多行哂成個旺角區的大小商場，發覺所賣的商品類別，很多都是很接近的。而最近流行的韓風商品「mashimaru」，原來行遠少少去福榮街(即黃金電腦中心行落少少)就有好多間玩具批發有得賣，價錢仲.....哈哈！梗係平唔少喇！ 收到台灣的編輯的消息，原來台灣很多人都留意香港的玩具和玩具店，所以，我又快要變身成記者大雄去抓台幣囉！哈哈！如果你地有相熟的玩具店想介紹，通知我一聲喇！有好野，梗係益自己友先喇！呵呵~~ |
|
|
刊出日期：2001年10月25日
今日放假，點知用得最多時間的就係訓覺，唔知大家又做左咩呢？睇「小妹的東京訪友行」遊記？ 很高興寫完「大雄的話」，不時都有網友回應又或是問候，最近更多了些網友提供資料，就如今日就收到網友Tommy Yeung的JR北海道資料，還要是官方的回函資料呢！另外，還有網友Andy提供的精彩照片呢！ 剛推出了特別企劃五和六，誰不知又想到新的企劃案，很忙很忙呢！這次的企劃對個人來說應該最艱鉅的，因為涉及金錢、時間和機遇的問題呢！「nobitaworld.com電子商務化」的成敗就看大家的意見和支持了！快來給我意見吧！因為預計最早實行的日子，只有餘下兩星期的時間，至於為何這麼急，下一次的「大雄的話」為大家說說因由！ |
|
|
刊出日期：2001年10月24日
近日公司真的很清閒，尤其是我比較多接觸的老細分別去了旅行或開會，還有瘟神快將要再續一單打左唔知幾多日的官司，還要是審得連法官都厭條瘟神麻煩的官司。可惜，他代表原告，嬴梗的，只欠將來判賠多少吧了！ 因為清閒，所以在公司差不多博覽群書，每周的東Touch、PC Market、茶杯、蘋果日報，還有不時從書店新買入的小說及書本等。當然，亦有善用辦公時間久不久上網答下留言，又或是弄一下網頁。 可惜，"諗頭"實在多得恐怖！如果一日有48小時就好了！剛完成了網友xx的遊記，現只欠她批改一下就可以公開，還她一個名份了！哈哈！不過，做完這個遊記，我想內容方面會暫緩更新，會變為主力推行特別企劃五，希望為大家謀點福利，又會我帶來點收入吧！錢呀~~錢呀~~哈哈哈！ |
|
|
刊出日期：2001年10月19日
七萬人次了，得到多個網友在留言道賀，真的很高興。這裡由開始的三千多人次到現在的六千多人次一個月，能看到有明顯的進步，令保持更新網頁的心得到無形的鼓勵。不過，七萬不是一個終結，反而我更訂立了更多的目標，現在只是在起步點上呢！ 我所說的目標有好幾個。特別企劃之五「日本商店」的目的是為了將喜歡日遊的大家和在日本經營的商號架上更緊密的溝通。由現在開始我會發電郵給一些在日本和我們旅遊時有關連的商號，包括商店、住宿、交通等，希望為它們架設「無料的公式中國語化」連結，同時提供位置刊出即將舉行的活動，例如優惠、減價、祭典等消息的中文化訊息，以方便將到日本旅行的網友到日本時能玩得更盡心。不過，這個計劃和花旗國總統的反恐怖戰爭一樣，不是短期能完成的，還要大家的支持呢！因為一人之力，這個目標的確"玩大左唔少"！ 特別企劃之六名為「謎之特別企劃」，這是一個和文字有關的企劃。概念在半年前已經湧了出來，但要實踐還有一條很長的路。現在只能說：「大家等著瞧吧！哈哈！」 另外，說了多時的旅遊用簡易日文欄目，今天在公司蛇王中已開始製作了，不過寫起來原來有很多很多的要寫，想起也怕怕。而網友xx的遊記，已給我拖了一個月了，預定這幾天完成！ 今天收到台北的貞子大姐從東京帶回台北，再寄到香港來的禮物，那是哈日杏子給的。和果子和月曆都很美，月曆其中一頁是我一直都覺得很吸引的青森nebuta祭人形燈籠呢！在此多謝杏子和貞子呢！
|
|
|
刊出日期：2001年10月17日
70,000人次囉！多謝！
|
|
|
刊出日期：2001年10月15日
轉眼組織了個多月的聚會就完成了，今天共有15人出席，大家還很好傾添！大家仲約緊下次去邊一度可以傾耐一點，傾得舒服一點呢！ 下一次的聚會，可能是BBQ，而負責人應可能會轉為精明食家、旅遊家兼命理家Linda負責，請各位留意日後的公佈！ 最近在網上認識了一位在港大就讀日本研究的網友，她將會進行一個關於為何香港人多次去日本旅行的研究。有關研究的訪問現希望獲得各位網友的幫助，如有興趣幫助的話，請先行給我電郵報名。 |
|
|
刊出日期：2001年10月14日
還有兩小時就是第二次聚會的時間了，為了補償未能完成想給出席的網友的資料，今天用最快的速度完成了「往北海道的快與慢方法(利用飛機與船的方法)」和「北海道定期觀光巴士介紹」。 誰不知那個「北海道定期觀光巴士介紹」因為突然hang機就無左喇！而初步打好的word檔案最快都要明天回公司先可以搵到！激死喇~~~ 係時候要準備一下，今晚再為大家講述聚會的情況！ |
|
|
刊出日期：2001年10月13日
好快就到了10月13號，距離第二次聚會仲有一日，但聚會地點仲未解決。其實一直未能解決的原因是人數的問題一直未能落實。或許是網上的媒體始終給人一種隔膜，加上香港人還是不太習慣網聚這個風氣。在日本和台灣，同好的網聚經常性地舉行的呢！ 聚會方面，雖未致有重重困難，但一人之力，有時都會變得灰心，但再睇返就算有一個網友出現，都表示有人會支持我一人獨撐大局的聚會，加上已共有14人確定了出席，那就即時"元氣"起來了！本來打算為各出席的網友準備一份資料關於「冬。日遊」(標題都想了呢！)，不過因為病倒了和時間的關係，已肯定未能如期製作完成。但我已打算在聚會後儘快完成及將有用的資料在網上發放！今次失信，真對不起呢！m/(O)\m 網友Alvis及manman，失左蹤？再唔出現，聚會預唔到你地喇！另外，多謝剛相識的中學師姐捧場！妳無論日文、韓文、日遊、台灣遊、韓國遊、動畫、漫畫......都好掂呀！師弟等妳照住呀！ 關於瘟神的問題，現已超越科學範圍，現正依循非科學化方面去解構，包括起壇、作法、爆粗口(？)....等等。雖則經濟唔好o者，都無理由風水命理旺個勁高學歷但無料到的老細發達，而多名關連的員工身體健康嚴重受影響架！容咩易賺到佢錢都無命使架！再係咁就要去搵下李卓人議員係立法會提出將因風水命理相剋而導致病痛的僱員納入僱員工傷補償或職業病的範圍內喇！~~ |
|
|
刊出日期：2001年10月9日
唔知點解，呢幾日都收到不同的網友的來貓，問下各類的問題(類別都好鬼廣泛添架！)。問問題當然無任歡迎，但唔知點解大家唔多喜歡利用下「日遊經驗募集所」呢？呢個留言冊，可以大家睇，集思廣益一下嘛！不過，多謝大家對我的信任，所以回覆中如有發現"老點"，請多見諒！因為而家你地去日本多過我，我係網上/書上旅遊架咋！幾慳家呀！哈哈！ 星期日就係聚會喇，我會趁呢幾日搵d好料比出席的網友，不過唔好期望咁大，因為一人之力，加上呢幾日公司鬼死咁多野做，個鼻又失禁，不停打噴嚏同流鼻水。九成九因為瘟神個秘書放假，條友仔行埋黎擅用坐我隔離o既令一個老細的秘書打信，可能就係咁出事喇！唉...邪呀.....邪呀..... 另外，網友shan同manman，見字請貓我，我想確定妳地去唔去聚會呢！事關shan個貓曾打回頭，manman連貓都無留呀，陰公！暫時已有14人報名，而日本自遊易網主sandy會亦事不能來，唔知有無人因為咁唔黎呢？ |
|
|
刊出日期：2001年10月8日 中秋節好快又過左！想再放假就要等有咩拜山先講的重陽節假期喇！
聚會將於今個星期日舉行，唔知仲有無人有興趣參加呢？因為唔多人積極參與，聚會的地點或者會改為自助餐比較方便，因為原意去PC GAME ROOM人少就唔方便喇！唔知已報名的網友又有咩意見呢？更改的詳情請留意網頁的聚會通告部份。 致網友xx：唔好意思，放假多反而無時間整網頁，你個遊記只整左兩日，仲有幾日未得呀！唔好意思！ |
|
|
刊出日期：2001年9月30日
明天就係八月十五喇！各位中秋節快樂！仲有，今次加埋係國慶日一齊，另外又有好多朋友會乘機去日本，咁大家玩得開心d呀o下！ 呢幾日係公司無咩做，準備左北海道市場大介紹和北海道定期觀光巴士介紹，點知....唔記得將已打好的檔案貓返屋企，加上公眾假期後幾日又拎左大假，所以最快要下星期六才返工將檔案貓返屋企做網頁，所以先預告一下！(今次因為比較資料性，所以以抄書為主咋！) 聚會真係好似無咩人捧場，係咪真係欠缺左少少明確主題呢？咁喇，大家比下意見喇！我或者提議聚會以網友經驗交流另加一個專題的方式舉行。是次聚會，以北海道遊來做主題好嗎？或者有另一些意見嗎？做左方便我去搵場地，我提議最後召集日期為10月9號，所以大家唔好遲喇！ |
|
|
刊出日期：2001年9月28日
好快就到中秋節了，日日行過街上的舖頭都係一盒盒的月餅，見到都飽喇！ 星期初去了報日本語文能力試，今次只挑戰三級，因為自問技不如人，有點削。不過，亦有網友從四級後直接挑戰二級。最衰係一年考得一次，唔係就得閒考下都好！事關報一次都係250蚊(三/四級)和280蚊(一/`二級)。今個星期六就截止喇，未報的快報！ 聚會的目的解釋完後都無咩人參加，呢個係"非茂利"的活動，又會咁冷清o既？未報名的快d搵我喇，過多個星期唔等大家我去搵位架喇！或者大家比d意見，例如想有咩主題的聚會呢？ |
|
|
刊出日期：2001年9月24日
好一個星期日，係訓完又食，食完又訓的情況下又過左添！轉眼又到月底，再下星期就是國慶加中秋假期，真羨慕到時會放假遊日的網友們！各位記得到時有咩好料上黎講下呀！ 十月中的聚會人數，現在約有十人。人數不多的原因原來是我無好明確的說明主題，因為有幾位網友已經反映左。主題嘛！其實一早就有，定期給網友聚會就係目的，而各位有見到會選PC GAME ROOM嗎？就是因為想利用那些上網設備，當然不是叫大家去打機比賽，但大家仲記得大家點識嗎？咪就係上網睇網頁囉！所以選PC GAME ROOM就係方便大家一路聚會一路可以上網睇下大家的遊記，又或者講到邊就可以即時按去有關網頁睇下。加上果種地方又有提供簡單的飲食，咁大家就可以一路食一路傾計，又可以走動下。至於未能決定地點就係因為人數未定，少人的，可去搵間唔大的GAME ROOM問下包場，咁大家玩得開心d，多人就搵大間d的咁解！所以呢，想黎參加聚會的朋友，快d報名喇！起碼比d時間我去搵地方呀！ |
|
|
刊出日期：2001年9月18日
幾日無咩更新，不過背後除了去左玩，仲有做下野o既！工作上一時多野做，一時又無咩野做！好似今日就整下個壞的電話制，不過最後都整唔到！另外，都唔明呢個咩世界，話說公司個瘟神老細，一連兩星期有四宗意外受傷的賠償案件開庭，但有三單己和解了，還有一宗明天審，由於是原訴，所以都只是等判賠多少錢！咁於是一個無料的律師又搵到四筆律師費了！咁無天理o既！ 繼Sky之後，又有網友的遊記在蘊釀中！我睇左一日的行程喇，佢完成後第一時間整好送上！阿網友xx，唔使驚我比壓力妳喎！放心，慢慢寫好個遊記，妳的經歷很不同呢！另外，網友提議的旅遊日文，現正搜集資料中，不日推出呢！ 講下聚會的事，近日無人有興趣參加，係咪聚會好唔吸引呢？比d意見我呀！ |
|
|
刊出日期：2001年9月13日
一連兩日，全城以至全世界的話題都仍然在於美國被襲的恐怖活動事件中，生還的陸續被救出，死者亦陸續被發現得以安息，只是那些策動的"粉腸"仍逍遙法外，真希望那些"粉腸"能早日吃到送他們到地獄的子彈和導彈吧！反正做左咁樣的陰質事，都絕子絕孫，任何一個真主都唔會保祐呢類人，咁不如早死早著喇！ 剛睇新聞，有人支持重建世貿中心，這個提議不錯，因為失而復得是代表一種不屈不朽的精神，美國人一向想法比較天真，所以精神的支持是很重要的。 SKY的遊記推出了，可惜因為SKY嫂不希望"綺麗"的北海道烹飪導師Mieko的靚樣暴光，所以全程都無佢照片出現的。另外，SKY去左幾間高檔酒店食野，通常自遊行的人都唔會入去，呢個經驗的確係好野！ |
|
|
刊出日期：2001年9月11日
剛在打大雄的話，正在講緊今日遇到的工作上法理與橫蠻的問題，點知美國就發生恐怖襲擊，由九點睇有線新聞、CNN、CNBC、BBC、無線的FOX NEWS，到現在的十一點多，八十多層的紐約世貿大廈就成為左歷史，五角大廈、國務院又受襲，所有華盛頓的人都要疏散，全美飛機要降落、機場停開、正往美國的飛機都要改到加拿大，簡直是滿目瘡痍！希望死者能早登極樂，而發動襲擊者就快些去死吧！ 另外，朋友的家隔鄰的大廈下午亦發生火警，幸好一家平安，只有平台因救火時被水浸。 至於今日原定所寫的大雄的話，請轉到翻看以往的大雄的話部份..... |
|
|
刊出日期：2001年9月11日
昨日同事處理一宗銀主收回物業案件，和法庭的執達主任和鎖匠去了新界東某地收回一個廠廈單位。這件事最後要勞動警察，事緣銀主收回的物業，欠繳按揭的業主於某年某月租了給一個租客，奈何經過大半年的法律程序，單是派原訟傳票、上庭通知、法庭通知等不下數次到有關單位張貼法庭的告示，那個所謂的租客都從不出現。直到昨日經法庭開啟物業大門，那個原來就租用隔鄰單位的所謂租客才出現，雖聲稱是租客及物業內的物品是他所有，但又未能出示有效證明，於是勞動了警察到場。如是者，同事要工作到晚上九時才能收工。 今早，同事跟據昨日在警察調庭下的安排，在早於上班時間的九時到達現場讓那個所謂租客提取能證明他是物主身份的物品，誰知條友仔又係度扮哂野，到我完成了早上另一宗財物扣押封票後與同事會合，已是早上十一時許，即是過了兩小時果條友仔都不拿出單據證明去提取物品，令同事呆坐兩小時在無通風的悶熱工廈走廊。到了十二時左右，那人才拿出一張昨日在警察面前出示過，但相信經過修改的單據要求取回物件，一輪爭執，又要報警了！ 由於那人十分橫蠻，卒之一個一柴的資深警察花了個多小時的勸解都不得要領，那人依舊橫蠻，要搬貨物又不能出示單據，就是租客，又只能出示一張99年時由業主租給他六個月的租約，但租約是未簽妥、又無打厘印、又過了期兩年有多，果條友還說我們搶他貨物，要知道，那些物業內的貨物是昨日法庭收回物業時在單位內發現及紀錄在案的，如果沒有物主能證明貨物的擁有權，銀主是有責任看管，讓能出示證明的物主拿走。由於果條友死要企在物業內擋著不准關門，最後又要多了一個三柴的師姐和一個同僚上來，最後再來了四個警察，還要說到不出來便要用適當的武力將果條友拉出來然後關門，果條友才在朋友的勸解下回他在隔鄰的辦公室找一下可證明的單據。 要橫蠻是沒用的，我們是講法理和道理，最後果條友咪又找到幾張單據出來。由於快到四點換班的關係，七個警察見情況緩和下來便走了，換了下一更的兩個警察上來，其中一個便是有份處理昨晚的事情的同一人。因為已經處理過，於是上級命令那些警員就昨日的安排，即讓那人今天朝九晚五搬走自己的貨物，到五時正必須離開。於是在強迫下，雖然果條友橫蠻，但在朋友的協助下咪又找到多幾張單據。由於時間的關係，連我和同事及果條友的友人都不停幫手將單位內已能確認的貨物搬出。最後在五時正順利將單位的門再次關上。警察亦完成任務離去，剩下最後認收對證已搬出物品的事情讓我們解決。 寫了今天我的工作，不知會不會悶倒了大家？雖然我不是律師，但作為在法律界中打滾了十年多的小薯仔，不得不想分享一下工作的經驗給大家。有時，橫蠻是沒用的，法理有時都沒用，但要講法理人情，兩者都不可與橫蠻走在一起！記得幾年前，係大埔汀角道一個幾千尺的養雞場和一個在接近沙頭角的坪輋的十萬尺田地，那兩個阿伯都賴死唔肯走，卒之都分別來了一輛衝鋒車，由警察來勸解，最後都要用抬的將當事人帶離現場。另外，當時初入行在何文田的愛民村派離婚呈請書時，個女人好激動咁衝入在露台的廚房拿出菜刀想來威嚇我；舊年在西環卑路窄街給尺多長的開山刀在面前過與及兩年前有多的樓蟹王日日打十幾個電話黎公司講完粗口就收線，一開口就九句半粗口問候娘親剩下半句係無意義主題的說話(最後比李超人申請了禁制令不准接近長江大廈，最後因為攪到去超人屋企，招惹刑事官非)。以上幾個例子都係我十多年來比較印象深刻的工作經歷，所有都是遇上橫蠻的人，但最後都是法理與理性最能解決問題。 話雖如此，但法理有時又是不能完全解決問題的。經常有租客說業主無良收樓，但又幾何有人聽到業主比租客拖欠好多租金，最後物業還要給無良租客整壞了好多裝修同物件、整爛門、窗、喉管、水箱，有個成幅間隔牆都打爛添，仲要加上幾個月唔交水電煤，管理費就更加唔使諗！而家一般收樓都要半年至一年，遇上無良租客濫用法庭程序到中段就人間蒸發，業主除了遲左收樓仲要負擔一筆律師費。就以今日為例，果條友差不多橫蠻左十幾個鐘頭，浪費了兩個律師行職員的時間、九個到場警的時間、還有法庭的執達主任、警察傳呼員、在背後工作的警察指揮官、公司的同事，果條友的一點橫蠻，這個社會就浪費左咁多資源喇！你地話呢種人唔去死有咩用？ |
|
|
刊出日期：2001年9月9日
距離雨森始所面對的世界末日1999年9月9日0時9分9秒後的兩年，今天平平安安地共前後睡了十五個鐘頭，實在好"正"！(註：還記得千年女王和雨森始嗎？) 晚上終於有時間做一下網頁，可惜睇下電視，又ICQ一下，於是寫得不多。最近想通了一些網頁的點子，但始終沒時間實現出來，因為積下來想在網頁上發表的事實在太多了！ 多謝幾位常看大雄的話的網友，見到我話病，都前後來問候了！真的，我是潺仔大雄，又運動力不好、又身子弱、又頭髮薯嘜、又成日傷風感冒，唔係，我又點會因為覺得似叮噹入面的大雄而改個名叫大雄呢！現在身體康復了，多謝大家的關心和問候！ 十月初的放假高峰又快到了，要到日本的你，不知買好了機票和設計好行程沒有呢？ |
|
|
刊出日期：2001年9月6日 飲了兩日杰撻撻的粉黃藥水，腸胃炎已經好返，不過就輪到個鼻好似壞左水掣咁不停流鼻水，尤其係公司時情況最差！就以昨日的包雲吞量，我想足夠供應中環幾間出名的麵店做個午市囉！講起公司，夢+遊組合出擊中，好鬼煩呀佢地！ 剛收到網友SKY的遊記內容，現正整理中，這個遊記名為「大食遊東京北海道」，這幾天將會陸續推出的了！另外，終於收到港版松隆子的「日遊人間」內容，大家想一睹風采，那快去睇睇！ 而第二次網友聚會亦於昨晚和日本自遊易的網主Sandy決定了，只欠舉行的地點未落實，但已決定找一家現時流行的PC GAME ROOM舉行，如有二十多三十名網友出席的話，或許能包下一個細場呢！選這類場地的原因是價錢能控制，又有電腦上網，對於我們一眾在網上結識的，會比較方便，而有遊記的朋友亦可即向其他網友親身講解下心得，又或者平時上網看到有疑難，亦可即場找些高人解答，應該是不錯的啊！那快點報名參加吧！有興趣贊助下，又或者有PC GAME ROOM收到風想做我地生意的，亦歡迎比個貓我喎！ |
|
|
刊出日期：2001年9月3日
今日係好多學校放完暑假後開學日，點知一個可能落大雨就通通放多一日暑假！我今日都不甘後人，放左一日病假，不過代價就係要飲好杰的藥水，又頻頻幫襯家中的廁所！經醫生診斷係腸胃炎，不過我覺得係因為感冒影響腸，但總知呢幾日個肚B仔都唔舒服啊！ : < 今日除左應該係開學日，亦係東京迪士尼海洋的開幕日，唔知有幾多朋友會呢幾日就去玩個盡興呢？剛在YAHOO! JAPAN看新聞，就說今日4號同星期六8號的東京迪士尼海洋已經賣哂票喇！所以呢兩日都唔使諗去逼喇！另外，新聞亦有講今個暑假期間(7月20日-8月31日期間)，就有2,489,000人入迪士尼，最多一日係8月13日，單日就有81,000人。而過去最多人入園的是90年的2,850,000人呢！真係和路迪士尼都變和味迪士尼囉，一張pass是5,500日元，再乘以二百幾萬人....嘩...嘩....嘩...... 另外，在東京迪士尼渡假區網頁正有問卷調查，仲有機會獲獨家特製商品獎賞添！ |
|
|
刊出日期：2001年8月31日
這幾天工作都很忙，尤其又是瘟神纏身的日子，再加上少許感冒，真可憐呢！哈哈！ 上星期日的網友聚會，有關的花絮在昨日終於完成，並放了在哈日病院內介紹，想看的網友，請按此！經過今次聚會的成功，不知大家有否興趣再來一次呢？暫定於本年十月底，相信很多朋友在十月初至中旬都會去日本旅行了吧！那休息過後，大家出來聚聚吧！而今次聚會未能出席的朋友，亦可以有充足的時間安排好呢！有興趣的網友，請給我電郵，說明十月底那天可以出席，希望有甚麼樣的聚會形式等。 今日在報上看到動感之都的新一輪推廣活動，就是十八個景點的蓋紀念印活動，其實日本都攪左蓋印仔咁多年，香港而家先用，係咪老土左呢？ |
|
|
刊出日期：2001年8月28日
這幾天都背著數碼相機在身，為的是拍下杏子的行程和大家分享。突然發覺，如果逛街的時候能帶著相機，看到有趣的就拍下(當然是指數碼相機)，的確很有趣。就算走在每天都會走的路上，一路行一路拍，心情也像個遊客一樣，很輕鬆！ 很累了！過兩天就會弄一下 |
|
|
刊出日期：2001年8月27日
在炎熱的星期天，和杏子在旺角做了一天的採訪，雙腳很倦，成身都濕哂係汗呢！不過，謹此多謝各位給予拍照的玩具店店主和店員的比面！多多拍教呢！還有那個在西洋菜街兆x中心那個"食蕉"阿叔，要影相的話要人先去十幾多樓問管理處先，你做得好正確，但連抄下門口係街都睇到o既地下商場開放時間都話唔比，你蝦我記性差呀！就算一路記一路比你凶，我都無受你影響，唔寫唔拍低都仲記得架，星期一至五咩呀嘛，星期六、日、公眾假期咩咩呀嘛！哼！ 晚上回到灣仔的利景酒店舉行大雄的日本世界、哈日杏子和日本自遊易的聯合聚會。總共有十四人出席，其中有朋友特登帶來了杏子的書來給她簽名呢！因為無咩辦聚會的經驗，所以有咩不周到請多多包涵，並多謝出席的杏子、貞子、sandy、candy & eric、v v、怪物小王子 & 女友、大石和竟與他同公司但不太認識(聚會前)的samuel & friends，當然還有何故樣呢！聚會詳情，過幾天才弄吧！很倦！ |
|
|
刊出日期：2001年8月26日
台灣的杏子和貞子終於抵港了！晚上就去了名聞中外，但熱到飛起的女人街逛！ 今天在不同時段就遇到不同的人，分別係再次遇到的京都來的shigeki樣和kousuke樣、從東京來的hara樣、她的朋友wada樣、住在香港的日籍攝影師miyuki樣、剛演完舞台劇的一條小百合樣，再加上本地的何故樣、gigi樣和yuki樣，真是麗音台都不夠用。因為個別人士分別說日英語、國英語、國日語、日廣東話、英廣東話、純廣東話、純日文，係咁多完化的組合中，對於我各樣語言都懂少許，所以很頭痛呢！一時要跟這個說國語、那個說日語、那那個說廣東話，頭也出煙了呢！亦有某人對台灣人說國語，但最後是要麻煩隔鄰會說廣東話的日本人代為以日文向國語人翻譯...啊...很複雜呢！ 晚上就是聚會，希望到時大家都會玩得很開心呢！ |
|
|
刊出日期：2001年8月22日 大前天和到港的京都貴客shigeki樣同kousuke樣到了尖沙咀的新發茶餐廳吃晚飯，前天又和東京到港的原智子樣和wada樣在中環的正陽樓吃午飯，明天就是台灣來的杏子和貞子到港了，很熱鬧呢！而由今天起，我就變身成杏子和貞子的私人導遊，不知道香港旅協會否贊助我一下，表揚我推動香港旅業的發展呢？去食飯比下discount都好呀！亦因為做導遊，這幾天網站就靠各位支撐一下囉！ 星期天的聚會，將會有不少於15人出席，應該很熱鬧呢！如果成效不錯的話，以後再攪多一些聚會吧！今次都有不少於5位的網友因有約或工作關係來不到呢！ 昨天被瘟神傳召入佢房問佢d白痴私人電腦問題，卒之打破左幾星期以黎遠離佢個房的齋砵！出黎後仲精神爽利，點知...第二日朝早起身就流鼻水不停了，返工又多野做呢！晚上六時許，瘟神又給了個趕得x淋x瀨的工作，害我今晚終於從以往幾星期悠閒的工作中再次帶入工作的地獄，又去不到電影中心替利志達的畫展的第二個講座拍照，何故樣，對不起呢！爽約了！ 做瘟神的工作，特別麻煩，有些東西佢做左等於無做，因為我都要從頭再睇一次，十足好似初出道o既人咁，好多要提返佢轉頭！如果佢呃呃埋埋d錢轉頭落我袋就好囉！唉.... 卒之，今晚十一點半再次在旺角吃一人的寂寞晚飯！其實今次呢壇野，除左瘟神，仲有政府某善堂的高人帶脅，那個是比人感覺以為免費但其實是墊支吧了的善堂得道高人。另外，我公司還有夢+幻組合和夢+遊組合，遲下為大家介紹一下吧！ 三點幾囉，眼訓了！今天收工後還要為香港的旅遊業出一點力呢！六萬人次快到喇，大家多d黎谷到佢到喇！仲有，寫得太多，拉到個網頁好長呢！哈哈！ |
|
|
刊出日期：2001年8月22日
今日很高興認識了兩位在颱風11號吹襲期間，在22日凌晨二時抵港的京都來的貴客shigeki樣同kousuke樣。shigeki樣的廣東話很利害的啊！今日仲帶左佢兩位看無料的劉華演唱會呢！(不過我無睇喎！因為有野做呢！) 哈日旋風即將到港，星期六就吹到了！為了令杏子樣更多時間玩，所以為她做採訪的事先做了一點採訪前的資料搜集。於是，今天晚上去了旺角區的皆旺和先達兩個商場，原來單這兩個商場就有超過20間的玩具關連店舖，明天還會到信和一帶的做資料搜集呢！旺角咁豆腐"潤"地方原來可以有咁多玩具店架喎！ 說到星期日的聚會，明天截止的了！我會星期五就訂位，所以未報名的網友唔好再遲喇！唔係唔等你地架！而六萬人次的大關快到，雖則呢幾日會好忙，未必有時間更新網頁，仍請各位多多支持下啊！ |
|
|
刊出日期：2001年8月21日
又加上了一個遊記的連結了！今個暑假真熱鬧，一口氣多了五個新的網友遊記呢！還有「走訪日遊人間」亦引起了網友們的興趣，現在已有幾個網友留了位置，現只欠他們供給資料和相片就能刊出的了呢！ 今天在公司百無聊賴，於是又精研了一本買了很久但還未看的日文北海道旅遊書，這對於已翻譯好，但還在整理的北海道車票介紹很有用，遲一點還打算來個北海道市場大介紹呢！哈哈！很忙、很忙....哈哈！另外，今日得悉公司有些同事看了瘟神與鼻水的淵源那篇覺得很好笑，那我以後有空便寫多少關於瘟神和其他人事的東西吧！當然，家醜不宜外傳，一切所提及的人和事都會用假名或打格仔喇！慶幸，今天身子好，只是打了幾個噴嚏，還有不幸地在兩次出入洗手間時迎面碰到瘟神，但還好是事後才碰到，如果換成事前，或會去洗手間會去得不暢通呢！邪呀~~邪呀~~ 得日本自遊易網主sandy的幫助和出席，本星期日哈日杏子與讀者的聚會擴充成日本自遊易網站、大雄的日本世界及哈日杏子讀友會合辦的聚會，未報名的朋友快找我報名啦！ |
|
|
刊出日期：2001年8月17日
今晚去了在百老匯電影中心舉行的利志達「漫畫有暗格」展覽及座談會。由於是何故san主持的，我負責了一點拍照的工作，遲一點為大家報導一下。 這幾天在公司清閒，於是大約花了三天的蛇王時間，足足打了七頁紙，終於編譯好JR北海道網頁所提供的車票資料，工程浩大的「JR北海道車票總合大紹介」應可於這兩天化成網頁與大家見面，請留意！ 我正籌備哈日杏子到港的遊覽和採訪行程和讀者聚會，有網友未報名出席聚會嗎？那請快點報名吧！機會難逢呢！另外，好像這裡未玩過投票，不如來個cross-over吧！大家來投投喜愛的日本旅遊相關書本吧！現借來哈日病院的哈日投票站來投投票！按一下 |
|
|
刊出日期：2001年8月16日 這星期放了兩天大假，返了兩天工，好快就到星期五喇，真好！不過一返工，不思議事件又再發生喇！話說返工之日有多少鼻敏感流鼻水，由朝到晚都係左邊鼻流水，右邊塞左一日。到左六點零鐘，個瘟神老細一行埋黎，我右邊鼻即時暢通，仲滴埋鼻水出黎添！幾邪呀！呢個不思議事件仲已經唔係第一次，有臨床經驗支持架喇！仲有呀，佢秘書話放過三盆花出黎係位擗佢邪，放幾多死幾多呀！邪呀~~邪呀~~~ (給港版松隆子：果個瘟神唔係妳老友個老細呀，係佢隔離果個高學歷人士呀！) 「走訪日遊人間」和「遊記篇」近日都有不少更新，因為很多網友都有興趣加上自己的介紹成為日遊人間一份子，還有近日很多網友都開始編寫自己的第一個網頁，幾時又到你呢？ |
|
|
刊出日期：2001年8月14日
拿了兩天的年假，於是渡過了一個長週末。但時光飛逝，明早又要返工了，唉...唉...唉.... 近日好多網友去日本旅行，亦有不少開始寫遊記放到網上供大家分享。網上的社群越來越大，你又參加了沒有？ 剛推出數天的日遊人間，轉眼已刊載了五位朋友，另有兩位留了位，那你/妳又幾時出現呢？ 已登出哈日杏子到港的聚會通知，大家有何意見，會有人自願幫手嗎？不要再遲，快聯絡我啊！ |
|
|
刊出日期：2001年8月12日 先兩日比較忙，星期五去了玩具嘉年華/漫人墟做了採訪；星期六又一天內處理了很多不同的事。
哈日杏子月底來港，我攪讀者聚會呀！有人來嗎？有人會幫我嗎？或者對我大雄有興趣的都可以來啊！哈哈！ |
|
|
刊出日期：2001年8月9日
估不到兩個特別企劃一推出，就有幾個好的評價來了！其中「走訪日遊人間」更立即多了三位網友的介紹，先多謝貓骨和阿地兩位，還有霸了第8位的某人！(阿某人，唔該得閒就快手寫你個自我介紹比我！) 唔知點解今個星期一和三在公司差不多沒事可做，但二和四就很多工作！時也命也嗎？不過，今日雖比較多工作，但亦初步完成了「東京大阪夜行交通介紹」，說到初步，因為一路做一路發現原來不少寢台列車走行/行經東京至大阪之間。但既已初步完成，先將已寫的內容放到網上，容後再作增補吧！或許你有資料都可以給我！ 明天放大假一天，下午到玩具嘉年華/漫中墟做採訪，你又會出現嗎？又來一個貼士，如果看到個背橙色背囊，提著相機的傻佬，那或許是我呢！但我無獎給找著我的人喎！簽個名都仲可以，不過唔使寄望我簽個銀行提款單一樣的式樣給你喎！哈哈！ |
|
|
刊出日期：2001年8月8日 哈哈！今日終於完成了特別企左係度好耐都未做好的開站以來第三及第四個特別企劃-- 「日遊路路通」和「走訪日遊人間」！這兩個企劃其實亦很需要各位網友的幫忙，所以有個人意見、有錯漏要改正等，請出聲！尤其是「日遊路路通」的第一通：東京、橫濱，所以內容都在公司閒著時憑記憶打出來的，所以或會不盡不實、錯漏百出呢！煩請各高人出手提點啊！ 至於夜行巴士專題，亦在進行中，請耐心等候吧！ 另外，謎之特別企劃五亦講到出口但暗地裡進行中呢！ |
|
|
刊出日期：2001年8月7日
三天很快又過了！睡了一個星期日，在公司悠閒了一個星期一，但又忙了一個星期二！人生真是多變呢！咁我幾時會變得富有呢？哈哈！ 距離年末不足五個月，又是時候要想想十四天的大假應該如何處理。旅行嗎？沒閒錢可用！今年還是來個「我愛香港」，放假四處逛逛，在家中訓一大覺算了！這個八月呢，先拿它幾日大假，去抓點外快(不知有人會去這個星期五開幕的玩具嘉年華嗎？)。月底呢，又有一個節目要做攪手，不知大家有興趣幫手嗎？或者你/妳會有興趣的呢！詳情嗎？現在還是賣個關子，這幾天內公佈！ 趁在公司閒著的時間，已準備了公佈已久的「日遊路路通」和「走訪日遊日間」等企劃的內容，又搜集了JR北海道的車票和大阪、東京間的夜行巴士和鐵道資料，準備作一個專題的介紹。希望大家多點支持吧！ 難得密密寫網頁的網主上 |
|
|
刊出日期：2001年8月4日
又到星期六，今日無節目可以返屋企訓左個靚靚晏覺，之前仲食左腸粉、燒賣、凍豆腐花同兩溝碗仔翅，呢種日子自從做左野就好少有，正如收工的時間，都好耐無見過日落之時天空上的大咸蛋黃一樣！ 呢幾日公司越來越無野做，覺得自己好似一個下崗工人咁，有糧出但無野做！哈哈！有時仲得閒到拎部數碼相機影下用來擋剎的屎撈人，如果有個阿闊影下仲正！！不過無正常野做唔代表無野做，呢期做IT人多，幫幾個同事整電腦、幫太子爺整電腦，仲三不五時有朋友打黎問電腦問題，直頭係一個流動helpdesk！亦因為幾得閒，所以蔡瀾的「五談日本」廿四小時內看完，現在正刨緊新井一二三的「可愛日本人」，雖則內文以介紹日本文人為主，十個有九個都唔知邊個，但不悶呢！(註：三不五時，即類似廣東話的「周不時」，近日睇得多台灣書學返黎的！哈！) |
|
|
刊出日期：2001年8月1日
一連寫左四日「大雄的話」，但終於接唔住，因為呢幾日都去左玩！哈哈！呢兩日都從朋友和網友那裡得知，他們都頗喜歡看我的「大雄的話」，仲有人黎到都只看這裡，不看我新加的內容(雖則少得令人慚愧！) 咁真係要多謝各位比面喇！ 經過了週末，我說過的那個公司瘟神老細度假後回來，惡運又再纏過來了！經過多次臨床實驗，我一接觸他給的檔案又會打噴嚏、傷風感冒齊來，一旦遠離，身體又好轉了，真邪！ 近日公司生意淡薄，家下得閒係公司度下新橋，寫寫網頁內容，看看書和雜誌，如斯悠閒又糧照出的日子可以無限延長就好喇！哈哈！ |
|
|
刊出日期：2001年7月28日
慘喇！慘喇！今日又行左三間書店，又買了兩本書！一條紅衫魚換來了兩本期待的書，一本是曾說過的「可愛日本人」新井一二三作，另一本是「蔡瀾五談日本」蔡瀾作。書展過後，全城的閱讀風好像很盛行呢！ 今天己是連續第四天寫「大雄的話」，變得有點日記式了！會令大家看得厭嗎？ 行了一整天，暫且收筆(keyboard)先！但多謝一下何故桑送我利志達的SUPERBABY單行本一套！那就替你賣賣廣告吧！利志達作品「SUPERBABY」單行本1及2集已於漫畫節中發售，其中2000套連SUPERBABY公仔發售，有買襯手喇喂！ |
|
|
刊出日期：2001年7月27日
很利害！大雄的寫作動力在這幾天很旺盛，本來變了月記的「大雄的話」，暫時這三天變成了日記啊！哈哈！有追看開的朋友，近日可辛苦了！有排你地睇囉！ 今日在沙田的商務轉了一圈，轉眼又放低了百多元才能走出來，當然手上又多了兩本新書！然而，昨天提到的「第一次的親密接觸」才剛在下火車的一刻才看完，轉眼又買了痞子蔡的第二本著作來看了！各位想知道是啥吸引，可免費到痞子蔡的窩看看！因為那些文章，本就是網上發表的呢！ 另外，積存了很久的並好像已發了霉的新鮮情報又再次出爐了！快看！要不是我的新計劃又來，你們可看得很忙呢！哈哈！ |
|
|
刊出日期：2001年7月26日
昨天完成了Charles的遊記，雖只負責了製成網頁，但都有人讚下，實在開心！但竟然讚佢靚佬的仲多喎！v_v\`` 雖然電腦和日文的課程都完了，加上近日工作尚算清淡，又趕起了稿，但還是很忙！今次忙的是看書！經過上星期書展和書展後的餘波，現正以掃射的速度去消化手上的存貨，其中芝see菇bi的「記得 記得」、康子的「白之戀人」、謝立文的「樣衰阿闊 第一部半」都給刨完了！現在全速進行中的有成龍的「我是成龍I'm Jackie Chan My Life in Action」和蔡智恆的「第一次的親密接觸」(不是咸濕書，是台灣早幾年風行的網上小說)；正在排隊中的還有劉鳳鸞老師的「傻瓜黃Sir」、希沙良的「京阪神-關西吃喝玩樂大補帖」，其實還有新井一二三的第四本著作想看，可惜在書展和書店都還未找到呢！ 今日食晏同收工，共行了中環至銅鑼灣共九間書店(行路去的)，唔知各位有無見到個背著個大橙色背囊的傻佬係度行書店呢？係就唔好意思喇，你時運低見到我呢！哈哈！ 係咪好利害呢，連續寫了兩天的大雄的話呢！ |
|
|
刊出日期：2001年7月25日
不知它是否來自月宮，颱風玉兔送給了打工仔一天的假期，它還懂得時間的分配，在星期三到來，好讓工作辛苦的大家返兩日工又可以休息一下，然後才去苦幹多兩天等待星期六的來臨。 藉此機會，在半夜時份八號風球高懸下終於寫起了那篇玩具稿，還有空閒四處看看網頁，今晚呢！還完成了網友Charles的一家大細的東京遊記。這是我第三次替朋友/網友將遊記放到網上呢！實在多謝大家比面了！！ 下午看了北野武的「大逃殺」，殺呀~~殺呀~~，都唔知日本仔點解諗到條咁o既橋！好彩隻正版VCD唔貴o者，比去戲院睇平左，唔係就蝕囉！ |
|
|
刊出日期：2001年7月22日 終於完成了課程安排差到飛起網頁程式設計課程，在此多謝剛接手不久的訓練課程負責人梁先生，他一上任就剛好接到我寫的兩封共超過二千字的英文投訴信，而他亦很快改正前人剩下來的「蘇州x」！梁先生，加油呀！可惜，我不會介紹朋友到V記去報課程的啊！哈哈！ 自從去年認識了哈日杏子和跨媒體創作人何故先生，因為杏子和他的關係，我認識了不少港、台、日的媒體人士。繼去年在台北認識到貞子大姐和酋長編輯，又在香港和日本的小學館編輯三浦小姐、自由作家島村小姐及藝術家Omocha老師見面。接著更認識了香港不少傳媒人，湯姆網站的高人hide、net上痕的斌哥、生果報的豪哥、本地online game人米奇哥(仲原來係我自細第一期就睇的咩-club動漫雜誌第一代編輯，利害！)、電影人權哥和身兼數職的莫老闆(想知邊位，請看少林足球和王菲最新日劇，莫老闆有份出場呢！)，還有廣東話超級流利的日籍攝影師Miyuki小姐(最近作品-鄧x泓新碟封面)和壓軸的日本大電腦雜誌ASCII編輯遠籐先生和作家太太原智子(有看哈日病院的應該知道是誰了啊！) 另外，最近還認識了香港的兒童文學作家劉鳳鸞小姐，並有幸拜讀她的散文著作「天地拾零」呢！其後還陸續拜讀了幾本劉老師(她正職是小學老師呢！)的其他著作，如「學校裡的怪獸」、「老師與你」等！我還正在準備寫一個網頁來介紹一下呢！大家等一下吧！ 近來真的十分多攪作，最近就和幾個朋友籌備一個新的計劃，約今年末推出，到時大家多多捧場呢！ 經歷了一年的日X日語學校的高班課程共三期終於完成！在第三期的時間，因為工作關係和電腦課的關係，有幾天都沒上課！加上老師越來越興講講下書就離題，於是越上越無興趣！最後在上星期完成了考試！暫時還是休息一下吧！去年合格了日語的四級試，今年或許試一下挑戰三級吧！再報讀研究班的同學們，加油啊！ 最近都有朋友問我讀那間日語學校好，現在和大家說，其實無太大分別那一間好，最主要是遇上好的老師！好的老師嗎？我高班的那個也是啊！可惜，我都無時間睇各本地電視台的節目，完全是「搭不到爹」！所以，我上堂上得好鬼悶架！老師，妳知唔知？ 這個月來看的日本旅遊書都不少，MOOK的「日本鐵道之旅」、「北海道大體驗」，鄭家輝的「東京百貨」(已睇完一個月有多，但不知何解到書展才來大事宣傳？)、旅遊手帖「札幌、小樽、函館」(日文)和經常買的Tokyo Walker、Kansai Walker、 Kyushu Walker等！前三本都不過不失，「日本鐵道之旅」就好合自遊人睇了！「北海道大體驗」就無甚特別，鄭生那本嘛！幾有誠意架！介紹親的店舖都不時有佢肉照出現，起碼證明佢有親身到過，所以我好佩服佢這種橫掃東京入貨的熱誠，可惜我一向都唔多歡喜佢！哈哈！至於旅遊手帖那本日文書，好正！尤其去果三個地方的話，必看！鍾意食的就更加要看！齋睇相都好好食呢！Walker系列呢，本來想集合來個花火情報，可惜，好多花火祭都完了！想看我寫的，就要睇下我呢幾日發唔發到功先！一口氣寫完佢！ 又到交稿給台灣的玩具書了！可惜呢幾日因為病左(但主要係集中係公司時病)，所以都無心機去採訪，所以很對不起呢！酋長大人，稿很快就送上！今天已完成了八間玩具店的採訪，現在欠沖曬相片和文字了！寫玩具店的專訪看似很易，其實很難，因為好多間都是賣差不多的貨，所以採訪還可以，寫稿就傷腦筋了！還好很多間店都很合作地讓我採訪拍照，謹此多謝各店主！ 說到病，今次病得來的原因，我個人很相信是玄學方面可以解釋的！話說我公司有個一個高學歷的老闆，為人一向閃縮(雖則佢都有長處是令眾人信服的)，但為佢工作，絕對比替其他老闆工作得辛苦和谷氣！加上佢近來或許黑氣迫人，秘書都給他黑得病完又病，仲越病越大鑊，我呢！早一星期有幾天沒有工作替他做，一直都健康愉快地生活、上班和下班，但一接手他的東西呢！就百病齊來，真黑！仲要係返工時先病到仔仔下，收工就好返好多喇！激氣！好彩來緊幾天他都放假，希望黑氣走哂！就跟他走到南半球不回來就好了！ 剛去了今屆的書展，印象真的很差！收人廿蚊入場，但未到展場都已經有三個投訴喇！第一，我買三張入場券，因為身上多碎銀，於是比左兩張廿蚊，兩個五蚊，五個兩蚊，個賣飛姐姐仔就好「愁」咁，係度慢慢數d散銀，又好唔滿意我比左散銀！家下比散銀犯法咩！我個袋當時仲有好多一蚊同毫子，早知比佢數一餐！家下比散銀又唔使佢拎住走，真難為佢！第二個投訴就係入場搣飛，班有為青年工作人員，好「頹」咁坐係入口兩邊的椅上，開大聲公叫「唔該搣定飛入場」！家下搣飛真難為佢地囉！遲早佢地手腳都退化到條火柴咁囉！仲有一件，就係入會場前拎會場的地圖，得一個人將地圖放係卓前，要睇就唔該自便！人家唔使錢的旅遊展都好多人「隊」場刊你，呢度班有為青年就....唉...唉.......書展因遲去，只行了兩個小時，所以只買了幾本書！其中一本是天地圖書的「北海道之旅。白之戀人」(作者。康子)，等我看完向各位報導一下！ 今次的「大雄的話」經過成個月無寫，卒之變左月記，期間仲有不少網友投訴：「好耐無新的大雄的話喎！？」其實我一直都有寫，但這些日子很忙，所以寫少少又停左，又無新內容，所以一日復一日諗住遲一日先傳上網，點知一遲就一個月有多了！由於積了一個月的篇幅關係，所以今次「大雄的話」臨時轉至翻看以往的「大雄的話」的那版，請各位click多一下去喇！ 因為越整越多野，為了令連線速度慢的朋友都可以看快一點，首頁版面作了少許改版呢！如有意見，請指點一下！ |
|
明日就是2002年了，時間真是過的很快！經濟唔好，但日子好在過得快，今年亦總算去了一次日本旅行，雖只是幾日，還有目的是買貨多於旅行，不過倒算是坐過飛機，去過日本吧！其中探過友人阿榮的新生女兒杏里，實在很開心！
聖誕節囉！亦即係2001年好快又會過囉！唔知各位今年總結去左幾多次日本呢？又總共有幾多日？再過兩星期又到聚會時間，現在已有19人報名出席，到時一定好熱鬧，你又報左名未呢？
噚日幫人去新世界中心某活動睇檔，生意認真麻麻，人流少到唔識形容，就算有當時得令的奀妹簽名會支撐，但收入都係只夠頂到場租，而個場租兩日加埋其實都唔夠去對面間酒店食二人自助餐呀，真係好鬼差生意呢！新聞報導美國剛開始反擊戰攻打阿富汗，經濟有排唔好囉！
杏子和貞子的四天香港遊兼採訪工作終於完結了。這幾天和杏子去拍了過百間香港的玩具店，而「一個幫台灣的某出版採訪的四眼仔」這個名堂亦跑了出來！哈哈！我紅左喇！唔知以後買玩具有平嗎？
玩具嘉年華/漫人墟是我第一個做展覽的採訪，好彩有某富貴入門網站的hide兄照住，唔係實戇居居。原來做記者不易，原定三點的開幕式，點知要等齊嘉賓，攪到三點半先開始，於是在台前無端企了半個鐘。遲到的是涉嫌落台打人的樂隊，好在三點已經有大師Michael
Lau到場，唔係就悶死左！大師一到埸，記者都未擁去影相，已經好多fans拎住當日會場限量特別版比佢簽名，第一次感受到記者們平日在更多人的埸面為了影當事人而要左擠右擁去影相的苦況，原來幾辛苦架！至於漫人墟呢，燕瘦環肥，我年紀大唔識欣賞囉！