大雄的話

最新的大雄的話

仲有2日又過一年，今年數香港十大新聞，真係數埋腳趾廿件都唔多夠。

網務上本來打算今年將幾個唔同性質的網頁大融合，減少呢邊更新多，果一邊又成日無更新的問題，可惜太忙，所以限期到喇，都係郁都未郁。

好在，今年攪了個66人的聚會，仲有去了日本關西同九州12天，增加左日遊經驗值。但講到呢方面，勞大少同阿威的60天之旅就真係升level升到爆燈喇！

而係網站方面，好多網友都在今年建立左自己的網站，或者係大家相互影響下，將私人的網站做得更好同連結起來給大家分享。

講完舊史，講新一年又有咩打算喇！而家打算搵日將網站一齊由零開始，可惜呢個大計比大融合更大，所以講住先。其他呢，暫時未有空閒去諗住。

在此謹祝各日遊同好係2004年健健康康，常常去日本，時時買到心頭好，仲有就係繼續多多幫襯呢個無咩更新的網站，多謝大家！哈~~！^^/

刊出日期：

這是今日在玩具店一見鍾情的會搖頭的大雄，身長4吋，係我目前收藏之中最大的，又算是最靚仔的一個大雄。不知怎知，以前出的大雄總是又肥又矮，和漫畫中一點也不相像！

實在太開心了，今晚特地為他影了很多沙龍，哈哈哈~~~

今天是同學陳笨的牛一，15天後就是他的註冊結婚的日子，再6天就是擺酒的好日子，在此祝福他和阿chung白頭到老，順道奉勸一句：「咪太崇尚自然喇！地球有人口膨漲危機呀！」

不過，趕在前頭的明天，是另一同學鐵炮清的大好日子，我亦是兄弟團之一，亦借此祝福他和donny永結同心。喂！新郎哥，唔咁早起身出黎得唔得？

上一篇是相距三星期才更新的大雄的話，今次又破了個新紀錄，是接近四星期。真的不知何解，打從十月中去難得享受了一個十二天的日本假期，一回來後，就忙了接近個多兩個月，真係人都癲！

不知不覺的三星期、四星期的過去，當天同日出發的勞大少60天之旅已經完滿結束，勞大少亦已從日本制霸回港。據報，60天的制霸之旅成為了60天纖體之旅，足足瘦了20磅。無咩時間為佢慶祝一番，而家唯有派出小朋友數名，為勞大少雞手鴨腳打舊年榚出黎賀一賀佢！

轉個頭，又講返下網頁先，經過私營飲飲食食網上監察小組一眾的逼迫，近日發現無左的日遊經驗募集所已經用最快速度搵了個新的免費留言板頂上，希望大家會覺得好用(特別鳴謝貓骨第一時間搵個新的免費留言板比我去交差)。o拿，而家我整好，其他被審計過的兄弟姐妹，你地又點先？

聖誕又快到了，2003年又快完，今年有d計劃都仲未有時間做，睇怕都係要調入2004年的planning喇！各位又有幾多計劃係定左又未完成呢？

最後賀一賀勇者仁傑主持的講座成功，完滿結束，下次有時間我會黎捧場架！

三星期沒更新過網頁了！三星期正好是從日本旅行回來的三星期，精力和體力上都消耗得非常充實的三星期，而睡眠時間就此消彼長下，「比我訓多陣好唔好！」

究竟我忙咩？公司好忙，私事好忙，最近受上圖的東西影響，忙上加忙，至於係咩，唉~~一句講哂，好忙~~

至於十月的日本遊記，大家繼續耐心等候，我忙到連數碼相都未有時間去選邊d要去晒，而網上版本，睇過遲下可唔可以出個精華遊比大家當做聖誕禮物喇！

話說勞大少的電波之旅已經超過了一個月，有36日了，即係仲有24日就係回港之日了！如無記錯，呢個日子佢應該已經遊罷沖繩，至於去向呢，最後所知係佢11月7日曾經係日本自遊易的日遊討論區留過言，但又無提佢係邊喎！而根據隔離麵包台的駐大阪特約記者早前的報導，從片段所見兩位電波仔都仲好健康。如想睇片，唯有請各位去一去瑪姬電視麵包台睇睇。

而日本自遊易一班好兄弟姐妹亦已經籌備為勞大少來個歸港紀念聚會，格式將參照楊利偉神舟五號升空歸航紀念的儀式，遲下仲可能會要佢企係街唱返首男兒當自強，而佢著住返香港套衫同埋UA張飛機椅，同食剩的飛機餐，希望會有贊助商籌返幾百萬yen出黎幫補下拎黎展覽.......傻左，今次都係寫住咁多算喇~~~

話咁快就去左日本12日，噚晚返到。話說出發當日，即係10月5號，亦係勞大少的六十日貧乏之旅的啟程日。咁我有幸同日早上出發，梗係約好佢係機場直擊一下喇！

左邊招招積積同gel左個靚頭就梗係勞大少喇，右邊就係佢同行60日的伊籐喇！(唔好意思忘了佢大名，唯有暫用和昭仁同行的伊籐高史呢個名喇！)

話說我在日期間，勞大少最後的email是在函館發出，根據行程，10月5日會在東京著陸後，第二日才啟程去北海道，一於由北玩到南。10月9日已經去了日光、北海道的札幌、小樽、稚內同函館，跟住會在東北出沒。而剛過去的八日，佢地又去左邊呢？早前在山形有地震，希望佢地無事喇！而天氣方面，在大阪九州方面呢期約16/18至26-28度上下，天陰的日子不少，北海道已經係6至10零度喇！

講返自己，就去左京阪神的主要景點，例如京都車站、梅小路蒸氣機關車館、二條城、嵐山嵯峨野、梅田、心齋橋、大阪城、交通科學博物館、睇左御堂筋2003的parade、池田的instant noodle發明紀念館、寶塚、布引草藥園、布引之瀧、三之宮、神戶港、元町，仲有廣島、宮島、倉敷、博多同長崎咁。詳細遊記，哈，又係要搵日先喇！之前兩次遊記都爛尾中，請耐心等候喇各位！

刊出日期：2003年9月29日

921聚會已完滿結束，會後收到部份參與網友的評價，對是次聚會的場地、飲食、內容大致感到滿意。只是初段的時間，因為網友未熟落，今次的精美相簿比較少，又或者部份已看過，令到部份時間比較分散和沉悶。對於改善的辦法，已由熱心網友提供寶貴意見。所以，下一次聚會時，應該可以得到更全面的好評。無論如何，在此深深感謝所有為聚會出力的網友及賞面撥冗出席的網友。

聚會後一星期，就是香港國際旅遊展覽會。今次因SARS而延到九月底才舉行。與數網友同行，當然盡掃有禮品送贈的攤位，在日本各縣市的展區，更加積極參與，拎盡各類旅遊資料啦！

黎緊的黃金週，你有無計畫了去旅行？我會到西日本一行(各位想要買手信的好友，如係好友就請放過我一次，近來好窮呀！)而網友勞大少的60天全日本貧乏之旅亦會於10月5日啟程。在此預祝此行順順利利，好好享受這個60天的歡樂旅程。而剛好又係我出發之日，我會在香港國際機場直擊此次貧乏之旅的出發情形，請各位留意！

中秋已過，黎緊的九月十月又是旅遊的淡季，不過，亦是不少自遊行的網友出動的日子，大家又準備了去那裡。而家經濟雖則好轉(部份行業)，但今日在新聞組看到，已有旅行社推出了十二月的黃金檔期機票，那算是經濟好還是壞呢？不過話時話，如果你是打算報今年的日本語能力試驗(12月7日考試)的話，就唔好理經濟好壞，記得今個月30號前去報名喇！[詳情]仲有，提提大家，這個月的15和23號是日本的假期，10月的13號亦是，計劃行程時要留意喇！

籌備超過一個月的日遊聚會還有一星期就舉行了，報名人數很多，有50多人了，但暫仍與目標有少許距離，不過場地的容納量不算大，要報名的就快啊！

今天看了由幾米的繪本改篇的電影「向左走向右走」，很好看！看戲之前已看過繪本，當然一本數十頁的繪本跟近100分鐘的電影情節當然不可能完全相同，但感覺還是不錯。記得有網友說今次聚會不太想參加，原因是不熟悉其他網友或是這個網站，看完戲後，有感而發。實在是你我都走在日遊的網路上，每日你看那幾個網站，我又看那幾個，到頭來原來只隔一道牆。那道牆有多厚？很薄的吧！來一趟聚會玩玩就知道了！哈~~

颱風娟姐(即係日本稱謂的颱風13號)帶比大家半天假，不過快來快去，轉頭又話掛九號風球，轉頭又去返八號，跟住又話清晨就三號。

查實今日都唔係因為個颱風而賺得太多時間，早上一收到消息話快掛三號風球，已經加緊手腳趕起手上的工作，希望八號風球掛起前能如期完成，點知陣間就預告八號風球，攪到忙上加忙，好在大部份工作都在一點前能完成。之後做下d文件工作，都兩點先走人。

同事們說，很久沒在這邊講下公司壞話，今次寫多少吧！話說近幾個月，我給同事H在第三者面前屈了兩次。第一次是H向阿頭抵賴說因我收工前才將某文件交給他，令他當天不能弄好那份文件(那份文件是大老細自己的case)。好在當日下午飯後我是在阿頭面前將文件交給他的，咁都有得賴？仲要係阿頭講返比我知佢賴我喎！真係啤一聲囉！卒之以後我比野佢，我除了寫個日子仲寫埋時間，免得佢賴！

第二單較近期，有人自己安排自己工作，去了他最不熟悉的村屋(網友林小姐的保華哥住的那條村)派告票而不得其門而入後回來問我應怎辦？我只能答「等囉！」我又沒去過，無門口入的話除了等還能做甚麼？之後H兩次自己安排自己再去，卒之第三次(每次都說等了個幾鐘都無人出入)終於入到門口。幾日前，H向公司外的B說「阿邊個點我去等，累得佢去左幾次等左好多個鐘！」真係呀，你問我點辦，我只係講左「等囉！」就話我點佢？幾次都係佢老人家自己安排又關到我事？好在聽野的B係同我熟，仲有就係，話說B和同事Y在H去第一次的時候，因為有點順路的關係，已在差不多時間去過那村屋看過，仲自出自入上到天台都得，無門口入？佢黑仔定B同Y時運高？

又話說H上星期五要到金鐘高院存檔一份更換律師代表的通知書，順手要做到個檔案查冊(因為案件是4年前開始的)，睇返上一手律師做了甚麼，方便接手嘛！當日下午三點半又剛好有個交換文件的工作要到中環華懋二期的某律師行。H兩點九跑來說，還有東西要送到高院嗎？沒有，那我出去了！三點九左右，當我在公司內游盪的時候已見H回到公司，四點左右，H跟我說「唉~~果個檔案原來還在法庭，沒被送到法庭的倉，因為要趕三點半返回中環交換文件，今日沒時間做檔案查冊了。」我真係不知好嬲定好笑，法庭五點才收工，四點跟我說沒時間，還要三點九就見人仲要表現到自己好忙咁，而公司行去法庭咪十五分鐘就到，而且去法庭存檔的工作不花多少分鐘又不急，點解係要走到法庭做d唔趕的，又要趕返落中環咁笨"賊"？仲有成個鐘都話無時間？唔係呀化？卒之當天四點後H的工作是在玩接龍到收工。到了第二天收工前，H說今天去查冊那檔案，誰知法庭說檔案入了倉，要過幾天從倉拿回來再有得看，究竟，邊句真？

好喇，講住咁多先！而家都係集中精神攪好第八次聚會先，而家已經有43個網友參加，你又點呀？

第八次的日遊聚會已經開始報名了！雖然詳情只能公佈了大半(由於今次選了在一間地方較大的餐廳舉行，而佢又未比到正式的餐單我作確實)，所以一切只期望在未來幾日內落實。希望各位有意參加的網友多多支持。非常坦白的，每次攪聚會都係非牟利，純為平日只能在網上一聚的網友提供一次親身聚會的機會！主辦和協力的網友都係義務的，甚至出錢出力，真係要多多支持一下。

近日一連兩個電腦病毒橫掃全球，最新的sobig令我單日內就收到300個email係由這病毒從世界各地受感染的電腦發出。當中能看到美國、日本、台灣，甚至香港的政府部門、大機構、大學、公司的電郵帳戶發出的帶病毒電郵，實在影響深遠。各位對電腦不大熟悉的網友，記得有可疑的email千祈千祈千祈唔好打開，一見就刪除佢。就算係自己至愛親朋，如見到email的主旨係唔對路，都記住記住記住要刪除呢！

最近在報紙看到國內發表了一個名為「電腦失寫症」的現代病狀，因為人們用得電腦打中文多，令寫中文時執筆忘字，甚至不懂書寫。我自己十幾年前已學懂倉頡，之後一直利用速成打中文，現在都算速度不錯。可惜，長年累月以來，現在我寫中文全無心機寫那麼多筆畫，又時常執筆忘字，要多用相關字詞顯示才醒起怎樣寫，寫起字來又沒心機。看來，要買本習字簿來練習一下，「上大人、孔乙己...」、「人之初，性本善...」、「天地玄黃，宇宙洪荒...」這些小朋友開學前用作寫筆儀式的習字簿，說起來，大家有幾耐無見過？

接近一個月沒更新大雄的話了，悶倒了很多位朋友吧？最近發覺自己無咩動力整網，或許是腦力疲勞吧？要抽多d時間休息一下先得！

經過個多月的香港政治風波，暫時總算風平浪靜，不知大家對未來的期望又有否改變？

關於熱愛日遊的朋友，近數月都有吹風日本將會免港人簽證，不過多番消息，相信還是要寄望來年吧！

對上一次網站的聚會，已經是3月份，近月見到有網站、新聞組的網友都有攪一些網聚，而我亦有網友要求快快再攪個聚會。現在決定開催第八次聚會，時間預定為九月中旬，人數預計60-80人，但現正為場地而煩惱，各位有興趣參加的網友，不妨幫手找一找場地，有好消息請通知我，我會著手辦好聚會的了！

上一回的「大雄的話」寫於71凌晨，卒之歷史要記載的是50萬人冒著熾熱陽光走到街上反基本法廿三條立法之餘，還順道製造了很大的倒董聲音。

「意見接受，一切依舊。」是董伯伯的性格，誰知香港人的政治智慧突飛猛進，最後弄成臨急叫停廿三立法，還要董伯伯強顏當眾繼續說市民的聲音是聽到的，而繼後79的5萬和713的2萬名市民走到立法會外延續71的聲音。

根據2002年的人口統計，香港有679萬人，有50萬人出來，即是13.58人之中有1人不滿。你可以說，1人不滿比起12.58人滿意，就算是11人跑了去維園踢足球，還會有1.58人是滿意政府，人數還比不滿的多啊！可是，香港人不笨，政府今年投入610億給教育(政府資料)，難道會教出全市愚民來嗎？民智的日益發展，還打算沖耳不聞，下次弄個百萬市民上街，那就是6.79人之中有1人不滿，到了那天，足球不夠腳踢了，那班沒事幹的5.79人還有興趣挺董伯伯嗎？

71遊行當日在灣仔有人在外牆架了個廣告牌，一邊是董伯伯的樣子，迎面而行者見無不噓，但原來背面是個香港有希望的倒數鐘，於是人見人讚。回家後我也在網頁利用網絡資源的javascript弄了一個，有興趣的可在此下載，也弄個在自己的網頁吧！

1997年7月1日，黑色暴雨下香港回歸祖國。

1997年7月1日，董建華當了香港特首。

1997年10月23日，金融風暴。

2002年7月1日，董建華連任特首。

2003年7月1日，香港回歸六週年了。

...  ...  ...  ...  ...  ...  ...  ...  ...  ...  ...  ...

2003年7月9日，基本法第23條立法將進行二讀、三讀...

以上應算是香港的最近代史幾個將來應該拿來考試的題材。

我不反23條立法，因為立了惡法也該有惡人來執行，試問香港有那個惡人膽敢出來執這法？暴動有之。

搖擺不定、自以為事之人就數落都有唔少，你問我向誰負責嗎？我說向特首負責就是了；他不問我責就沒有東西是錯的。這是很好的長幼有序，嚴守紀律的教材，相信也將來應該成為香港人的道德典範。

要不是沒錢、沒工、沒信心，20世紀40、50、60、80年代的移民潮怎麼今次沒出現呢？從前戰亂、政治亂都可以向外跑的香港人，今次種種原因要留港消費，不知今天下午，大家會如何消費大家的怨氣呢？創造明天，還看今天呢！

相較之下，好像當個活在獅子、龍、帆船和冠冕下的愚民的日子還好過呢...

寫於2003年7月1日凌晨1時

返回大雄的日本世界首頁