|
大雄的話 |
|
|
過去六日的WTO，香港人真的受影響的不少，星期六晚的混亂仲攪到半夜手機都會收到呼籲勿到灣仔和銅鑼灣的SMS消息(左下圖)，認真大陣象！究竟香港人是否從中能得益，真係天知曉，好在香港係係比較健忘，明日大家又要繼續努力返工搵錢，一切將會回復如昔。 今晚花了44個半買了三枝500ml的可樂，為的是換那個retro款的扭計蛇，但那個年輕的7仔店員妹妹仔就係度游說話新款紅黑的比較好睇，但我都係堅持換了個紅白色的(右上圖)，之後扭兩扭，仲好熟手地扭返眼鏡蛇和球型的款式，仲有邊個記得有咩其他款式可以扭呢？不妨話過我知喇！ 唔覺唔覺又到聖誕，之後又係一年將盡，老喇老喇！
大雄 |
|
|
懶了接近一個月，又係時間update一下。過去一個月，公私兩忙再加上掛住打機(PS2的GTA VICE CITY，係就係舊左d，但玩左成年囉 )，所以真真無時候update。 回歸正題，過去的一個月，閒時試過一條友無端端行左去西九龍海濱長廊睇睇，不過著實無野好睇，都不如睇完用行的從佐敦行到返荔枝角的家般多野睇。 上月底，和識了最多已經係22年最少都17年的同班中學同學，拖男帶女(暫未有人要拖埋仔女)去左兩日一夜澳門。雖則大家識咁耐，但對於能夠咁多人一齊離開香港，今趟還是首次，雖未能盡如人意所有人都去得成，但人生難得，大家都大個左，好難約架囉！好珍惜呢！不過兩日一夜食到頂唔住想早d走的經驗，真係頂唔住的難忘！ 12月1號，同事Amanda新婚之喜，恭喜恭喜！ 12月2號，不同班的中學同學阿Joe新婚之喜，恭喜之餘，仲同日係去飲途中撞到另一個好多年無見的中學同學，難得難得！(阿Joe，咪飲咁多酒喇，春宵一刻呀！) 12月4日，鋒鋒生日派對，雖則主人翁大部份時間處於眼訓狀態頭沖沖，但有一班咁大個仔/女都未試過參加麥當當生日會的uncle/auntie，都幾興奮。會後去左轉剛正式開幕的創藝坊，之後又行左uniqlo，同埋睇左維港的燈光匯演，超充實的一天。 有樣野好奇特，我和貓骨算盡手指，身邊認識叫做Mandy的朋友共有三個，都不約而同的在11月產下子/女，有兩個只相差一天，計落共二仔一女，恭喜。而貓骨的中學同學Christine亦在12月2號生下乖女一名，恭喜哂！ 另外，有舊同學、舊同事、朋友的同事打算來年1月去日本的東京和北海道，正要為他們寫個行程，包括東京和北海道，邊位有咩好料請醒d過黎比我喇！唔該！ 以上係平淡中帶點喜慶的日子，查實係呢個期間，有同學的爸爸突然因惡病入院、有朋友的爸爸因病難世、亦有相識的律師因病復發而過身，亦有另一律師又係因病再次入院，另外一位在加拿大的中學同學忽爾寫個email來說覺得很大壓力但又唔知佢咩野事，而一位在美國的中學同學又說因家庭其他成員的問題令他有點不快... 人生苦短，凡事睇開d會好d o既！
大雄 |
|
|
話說上月初看了《電車男》的電影版，感覺不錯，當時對於早前已有得賣的《電車男》小說版都還沒甚興趣，誰知貓骨和我都一時間沉浸在電車之中。由我買了本《電車男》小說回來給貓骨看開始，佢不停追看，好快就睇完。再而到Nel chan的Benoist事件，還有由他提供的《電車男》TV版，小說和TV版在這兩、三星期都佔據了我最多的閒暇時間，搖身變成"毒男"乎？ 今晚已將TV版煲完，小說還欠它幾十頁就刨完，《電車男》狂熱即將告終。不過，由《電車男》而帶起的，例如久違了的高達、Haro、秋葉原、鐵道....好像很多東西都曾是我熱愛的，還有我愛揹背囊！去黃金商場！睇動畫.....嘩....莫非...我本身就係"毒男"！ ｷﾀ━━━━━━(ﾟ∀ﾟ)━━━━━━ !!
報告します：《千年京都》和《陰陽師千年特集》都已經睇完，"台北之旅"第3日亦寫了一半，不過，先等我從"毒男"中逃出來再寫寫吧！而家先睇住萊少和小妹的遊記吧！
大雄 |
|
|
近來真係睇唔少日本古代的東西，最近睇緊本以陰陽師為主線的書，叫《千年京都》(查實係講遊京都的書)，原來陰陽師安倍晴明除了係小說人物、電影人物，仲係歷史人物，係京都有很多關於他的神社、景點等。未睇呢本書之前，只知行書局見到有陰陽師系列的小說，早幾年有電影叫陰陽師，而家睇本書先知多d，剛過去的9月26號，原來係呢位安倍晴明的一千年死忌添，京都當地仲舉行左個晴明千年祭添。 可惜，當我睇呢本書o既時候，我今年o既年假已經放哂，加上已經成為過去，唔知出年有無 一千零一年祭呢？有機會去八卦下都好喎！哈！
大雄 追加@17.10.2005：噚晚一路寫，竟漏了講已經睇左「電車男」的電影版，而呢件事係今朝返工期間才醒起。本來不寫出來大家又唔會知，但係返到公司竟然發生左一件事令我不寫不得！ 話說同事Nel chan(日文稱呼)今朝竟收到一份從日本而來的手信，就係Benoist的茶葉，可惜送的人係麻甩友人一名而唔係美女伊東或大姐姐中谷，不過唔緊要喇，kanbare！Densha Nel！__|￣|O …..都係講返電影版，不悶的一齣小品，值得一看，而片尾一幕有弦外之音，毒男們都係繼續發下夢，或者將d時間拎黎睇《空想科學讀本》吧！ |
|
|
上月底去了一趟台北4天之旅，今次無5月去日本東北時勤力得每晚寫遊記(不過暫時都爛尾中)，但今次短短四日的行程都有帶備notebook作抄相之用，都有每日即日執定做遊記的相，所以家下先行發放"大雄與貓骨 2005台北之旅"遊記第一天！其實本想一次過寫好才發放，但見d隔離鄰舍神速地張貼出"小妹與阿比：歐洲夢飛行"(1-8日已推出)同埋"零五中秋快閃遊"，所以我都不甘後人，黎喇，睇下邊個會爛尾！ 10.1國慶日坐巴士從柴灣過海去尖咀與一班中學同學飯聚，途中巴士行經銅鑼灣避風塘，雖見明日當空，奈何漫天煙霞，遠景模糊，與前幾日在台灣淡水看亮麗日落，同一個太陽，為何有兩個樣呢？
大雄 |
|
|
自大長今起，繼而醫道，再來個妙手仁心III，一連多月的醫學、飲食、男女關係大兜亂劇集，終於可以黎個唔同劇種的日劇「大奧」。對於呢齣時代劇，睇左兩集，個人覺得幾正(但SAS唱的日英文歌詞pop版結尾曲除外)。唔知大家會唔會對呢齣日本稱為「時代劇」，即係歷史劇有咩觀感呢？因為自去年起一連看了多個關於戰國時代的漫畫、人物的論述書本，仲有就係對於用左黎做背景的姬路城的一份鍾愛，所以對於呢齣劇的時代背景都算ok熟，除了不會睇到一頭冒水的人物關係外，角色間的錯綜複雜關係亦算了解，所以睇得幾easy！ 唔知大家對於片中的幕府將軍家的德川家康、秀忠、家光，阿江與夫人的阿娘阿市同埋佢舅父織田信長，春日局阿爹個老細明智光秀，仲有江戶城、駿府城、二條城、關原之戰、天皇、幕府、武士、竹千代呢個名等等有多了解？在此介紹大家一些我睇過的書比大家參考下，如易博士出版的《圖解日本史》、喜讀文化出版的《德川家康》、《豐臣秀吉》、《織田信長》，武陵出版的《 織田信長》，玉皇朝出版池上遼一作畫的《信長》(1-8集完)，文傳出版椎名高志作畫的漫畫《瀛男》(1-8集完)，玉皇朝出版原哲夫作畫的漫畫《影武者德川家康》(1-3集已出版)等等....
大雄 |
|
|
|
|
|
話說離8月28號到香港迪士尼已有半個月，今日就已經係正式開張之日，不過而家呢篇「大雄的話」正寫在零時，10零個鐘後係咩世界呢，希望係個美好的夢幻世界，因為呢兩星期新聞都唔少，仲有就係原來我時運高，28號當日都有食過雞籃和薯條，但好在無事！
都係唔講咁多迪士尼喇，正式開幕後，從此有錢就幾時都入到去， 大雄
|
|
|
上星期有幸去了香港迪士尼樂園的總綵排，總結幾個字出來，就係「快」、「焗」、「熱」同埋「細」。「快」，唔係排隊玩得快，而係排好鬼耐，但玩就一陣攪掂，仲有係幾個場合，比d演藝人員催促要「快」；「焗」在於排隊往往排到埋門，點知就係最無空氣流動的地方，焗一餐先入到場玩，反而係隊尾就通爽好多；「熱」在當時只係30度，但都熱到身水身汗，好味道；「細」，迪士尼都有歌仔唱-世界真細小小小....不過，說到底，香港人，總要支持下香港迪士尼...事關我有份交稅架！ 說了幾年為版面更新，之前因事有匆忙，所以草草了事了一大段時間，而家坐定定，又稍為改一改，唔知大家又有咩意見呢？同時，亦將網名稍作更改，由大家叫慣口的「大雄的日本世界」改成「本．日遊」，事關日遊o既興趣不變，但好多位仁兄仁姐近年去日本多過我不知多少次，要講日遊的事，佢地仲熟，而近來我又睇書比較多，所以將會係網上為大家多點在談日之餘，說說書。 大雄
|
|
|
特大與超短 繼上次夏期特大號的大雄的話，今次寫個超短的。就係今日加左吳偉明教授的blog「知日部屋」連結、應承好耐都未加連結的poohhome.com連結，仲有醉人景緻久未更新，有比左d相我成大半個月先動手整的fujiB新相片5張。
大雄 |
|
 2005年7月都快要完了，睇返轉頭，好在月頭最算寫過了一篇大雄的話，否則就變了月記了！呢個月都幾懶下，早前公司比較少野做，都有帶部notebook返公司偷空打一點遊記，可總是未能完成多一天，如是者，爛尾遊記暫時又增加一個。之不過，同時我又痕痕地想攪攪新的網頁版面，可是整左幾個新banner出來都總是未能滿意，版面的設計亦然，畢竟弄了網頁前後都有八年，技術不見進步的情況下，莫非江郎才盡乎？於是轉個目標，埋首玩樂，久違了的PS2，忽爾又開機玩玩，先打爆了個「義經英雄傳」，算係為早前的東北之旅做點歷史資料補習，再玩玩「鋼之煉金術師」。電腦方面又尋回simcity玩玩，無聊聊的玩完個細版圖又玩下中size，還有那些網上小遊戲。除此以外，亦不停睇書，每日恆例的生果日報，還有每週一本的電腦市場、舊假期和突然一周；書本方面，就睇完「現在，很想見你」(市川拓司著．王蘊潔譯)、「風花說日」(陳南祿著)、「流離的王妃」(愛新覺羅浩著．鄭雅云譯)、「影武者德川家康1」(原作隆慶一郎．漫畫原哲夫．劇本會川昇)、「潮起潮落」(韓小思著)、「如何移動富士山」(龐士東著．諶悠文譯)，還有睇緊「日本民間傳說選」。計一計，過去的個多月都睇左唔少書呢！
到先幾日回沙田"郎"家食飯，剛好阿媽在執屋，於是執左d陳年極品，終於我又同呢班"老朋友"再次見面，有d仲係已經以為掉左，呢世都見唔返架喇！等我黎介紹一下喇，左上圖，一部made in japan的「PUCK MONSTER」(Gakken出品)的食鬼遊戲機，當年經常蓋實棉皮黎玩，因為黑漆漆中玩呢類發光的遊戲機最正，而旁邊係兩部係卡西歐1984年出品的「Western Bar」和「Kungfu」遊戲機，兩部2A電就玩得，而家開返仲係中氣十足(夠大聲)！而右上圖係星加坡TOMY廠出品的遊戲，中文名稱不記得了，只記得當日某某兒童節目都有拎過黎比賽。
至於左下圖，係一大堆麥記得玩具，都唔記得係我換返黎，定係我阿妹換的，不過唔理三七廿一，拎左先，全部都係90年代產物黎架。到右下圖，有左邊的小太陽出品的連環棋，經典的飛馬商標的飛行棋和象棋，迷你波子棋，扭左好多年都未扭返原型的扭計骰，華星出品的杜德偉拼圖板，仲有一份係叫做「大家樂歌聲處處聞」的書仔，入面有12首歌的歌譜，仲有個迷你的電子琴，雖然琴聲已因年代久遠而變質，但d歌譜就有一首「大家樂」，歌詞係「能天天相親，難得真關心加點勁，勉力創新做滿分.......」，仲 有忍者小靈精、阿信的故事、世界真細小等等，最緊要係書背係有正大家樂的logo，真係年代不詳，要極品收藏喇！(邊位記得係幾時出的，請通知聲)
回到網頁，新加了講了很久也未加(哈，或者係無心加，billy大佬請見諒)的旅遊人生連結，仲有Grace的東北夏之旅遊記。另外，仲欠緊fujiB月頭已比左我的靚相分享數幅未整。今次一口氣寫住咁多先，相信已經等於某d網站的周記內容多好多喇！阿邊個、邊個，好耐無update喇喂！ 最後，恭喜大佬Roy考獲車牌！
大雄 |
|
|
陽光
在過去六星期，回來後工作不停，到現在總算舒緩了一些，聚會亦完滿完成了，而小妹和abby亦在聚會完成後的一星期踏足她們的歐洲之旅，勞大少和阿威的貧友遊記亦多添了4天的內容，似乎各有各忙，我有我懶，哈！真係直到今日，才有空趁個星期天去外出走走。 話說噚日星期天入左馬鞍山，坐下馬鐵，行下商場，但烈日當空，行完商場再遊一下馬鞍山公園，但30幾度的天氣，汗水直流，難得有人有閒情係海邊釣下魚，我都拍個照就頂唔順閃返入陰頂，最後仲決定搵車打道回府算了。 網頁的改版還是在思考中，在frontpage做了多次的試作，亦用flash試製了多個新banner，但總是不滿意，點好呢？ 今日係7月4日，一年前正是我的老同學兼伴郎Steven的大婚日子，但可惜新郎新娘現分隔異地，一個在美國一個在澳洲，暫時未能團聚一起，在一周年的日子，預祝佢地早日團聚，開開心心。
大雄 |
|
繼續係喜事頻頻的日子，上星期去拜訪Mandy和Tony剛滿月的囝囝，他叫樂晞(左上圖)，當日並順道到將於2006年結婚的中學同學的新居一遊。跟住又係剛過去的星期六和貓骨到她的中學同學Christine和Kelvin家睇BB囡(右下圖)，她剛出世半月。兩個小朋友都好趣緻，BB囡仲係睡夢中被裝成伸開雙手接收賀禮的模樣同拍照以作證明，認真合作！
估不到繼《大奧》
之後，係一段追電車的日子！
繼續係睇《大奧》
的日子，不過齋兩篇都已經睇過六個將軍的出現，故事性上，好似係《第一章》講春日局的比較好，但講到鬥爭，好似係《明治篇》勁d。由於江戶城已經無左，今次搵左張2003年去京都時影的二條城相出黎亮一亮相先！
《大奧第一章》都睇左12集，亦已做到《第一章》的special，《明治篇》都就黎黎料，相信大家已經會比較明白德川幕府時代的背景吧！今日大家應該知道到邊位係家綱，阿樂夫人個仔呀，最新一篇閱讀中就同佢有關連喇！睇野喇！
中秋剛過，不知大家去過邊度玩呢？我就去過大坑的舊居看過舞火龍和維園的中秋晚會，兩者都幾好睇。
這是改版後的第二回「大雄的話」，上次第一回斗膽用了金色字，還加了個窗景做底圖，結果令已達眼力不太好年紀的朋友睇完xyz#@*。但換個角度諗，唔係咁樣，又豈能夠令到d潛水已久的朋友蒲個頭來留個言，講真又幾用心良苦呀我。另外，收到多個關於新版面的建議，「係！完全收到！」，不過呢期公司多野做，收工d心機又拎左部份去打機(剛打爆了PS2的Genji)，麻煩各位要繼續等了又等喇！
咪以為我只顧睇書就變左書呆子，都有出下街架！例如早排去馬鞍山行千色百貨，就趁日本食品展買左幾包sapporo一番的即食麵，有札幌味噌和名古屋鹽味，仲有另一隻細size
d o既東京拉麵。前兩者計起上黎成5蚊包，同有補腦DHA的日版丁麵咁價錢，而係日本買的話，記得都係幾十yen有找，不過久唔久食返包，人家從麵的粗幼，湯底的味道，簡直係無話可說！
另外，五月份時的東北之旅期間，在郡山東橫Inn申請的國際會員證已經收到，掛號寄來的，500yen的入會費計落真係抵到爛，希望佢開多d分店，咁去日本就真係唔使煩任何的住宿問題，有機票有錢在手，想去邊就邊喇！
上星期初熱到爆炸，正值同事放假，於是執起久違的外勤工作，雖則工作量不多，但天氣熱得一出街就身水身汗，而家嘆慣冷氣，果幾日等到收工，已經成身好味道，汗味呀！不過，到了星期中後期，閃電雷雨日日黎，某日正在睇緊狄娜姐姐的節目，外面不停閃電，真係閃過不停，於是舉機勁影，連環快拍左成200幾張相(反正數碼相o者)，卒之都有幾張見得下人，影到條閃電架！
上星期六去了書展，趁佢開埋夜書市，於是立志入去搏殺一番。下午收工和貓骨食完飯，約2點幾就入場，當時都算多人，行完Hall
1已經成6點有多，再掃埋Grand Hall、Hall 2 和
5，到收隊時已經差不多11點。不過人實在太多，好多書攤都只得「得其門而過而不入」，因為不少攤位細細，佢地工作人員又多，客仔又多，根本入不得！而當日亦有不少作者到場，例如見到有劉細良、蔡子強、黃毓民、周麗淇、陳嘉容、陳齊平，仲有寇鴻平和梁延鏘兩夫婦咁，仲有位高瘦的寫日本遊記式書的女作者，但抱歉名字忘記了！抬住堆書回家一算，我共買了12本，貓骨6本。我的有東立出版的「X挑戰者」漫畫4本、「翹首振翅-香港機師手記II」、「歷史幾狼都有-十大帝王」(仲有毓民即場簽左名)、商周出版的「Hello
Kitty」(係講Sanrio公司唔係只講Kitty的)、劉細良的「日本痴漢」等等，仲有本當年要2100yen，家下賣40蚊的角川出品「Super
Robot Generation Sunrise 1977-1987」，抵到爛呀！之但係拎左成日重書，人都矮左幾吋，卒之大覺訓左12個鐘先知醒！
呢頭回氣，星期日晚上出街食飯，目的係一次過買入家鄉雞最新多拉A夢精品，一套五款之餘仲要加多兩條頸繩同埋塊時光機又斬多人30蚊的組合(但又送返個靚靚紙袋比你順返條氣)。雖說今次呢set以對講機為主，加埋各樣的小功能係唔錯，不過今次以先行可買一套又或一係第二日每期一隻的買法，係選了費事個個星期去食雞換野，卒之要一次過大拿拿拎成500幾蚊出黎換野，又的確幾難決定。不過，最後都係忍唔到手，選擇左呢個為消委會垢病的預繳套票方式將呢套多拉A夢入手！
呢頭書展，下星期尾就到漫畫展，今次有友好何故的作品兩本推出，都是新城廣播劇的原著本，包括「愛有一點藍」和「凌晨時份的初吻」。有興趣的朋友請捧一下場！
至從5月22日完成一周年東北之旅回港，也有六星期了。數一數，在日本爛尾的即時遊記，也只補上了一天，好在6月18日的聚會，總算對得住網友對得住自己，在一眾核心網友的合作下，再一次弄了個大家都高興的聚會。