  |
紀之國旅館210室 05:30醒來，外面陰天，趕快梳洗後，06:00準時到達稚內。先lock下行李，乘上在站前06:05出發的Ferry Terminal巴士，幾分鐘後抵達碼頭。買了船票，就登上往利尻島的Feelease Soya號。06:30開船，坐上二等(@1880yen)，原來係榻榻米，而因為遲上船，好多歐吉桑和歐巴桑已霸了靠邊有得依傍的位置。開船不久，原來好多人都會攤埋係榻榻米度訓覺。於是趁有多少位置，蝦米就蝦米，伸唔直腳都好，訓多覺先。訓了差不多一個鐘，骨頭麻痺，口水都流埋之後就醒左。約15分鐘後，即係08:10船就到達利尻島的鴛泊港了。下船後，那班歐吉桑和歐巴桑好快就消失左，原來佢地係報左旅行團，呢頭落船果頭上車，幾個旅遊巴已經就緒車佢地去遊覽了。而只有少許準備的我倆，先遊了碼頭一圈就去找個早飯吃。 在碼頭後的一列商店，繞了一圈，最後選定在靠邊的Sadou食堂。外面下起微雨，兩人進入室內，全店只得婆婆一人把關。點了麵食就早飯，食飽婆婆過來添水，於是傾起計來，原來婆婆生於利尻，行年80！但她很健康，仲講起一番有錢無健康，有健康但無錢，如是者健康還是最重要的對話。期間還拿一個已用了33年的茶煲來添一添水，個茶煲d花紋，好正！吹完水就睇時間回到碼頭，待觀光巴士的櫃位開檔。09:20買入稱為A Course的觀光巴士券(@3300yen)，突然婆婆出現碼頭(嘩，舖頭都唔理)，手上拿來一小包的利尻昆布給我們做手信，阿里阿多呢！見附近有遊人，一於搵婆婆拍個合照留念先！別過婆婆，09:30準時登上觀光巴士。09:48到達第一站姬沼。那是觀看利尻富士山和倒影的好地方。可惜細雨紛飛，唯有跟指示繞沼一圈。同場仲有幾車日本遊客，窄小的木板路，唯有慢車(雙腳)開行。10:15再出發，第二站Otadomari沼，不及姬沼靚，但地方較大，又有商店。但雨越下越大，唯有縮入商店食個雪榚先。食完雪榚，雨越落越大，不過夠鐘上車去下一站喇！ 11:12到達仙法志御崎海岸公園，四圍有幾間老舖，應該都是賣土產昆布的(利尻名物)，可惜落住雨，唯有見人行去邊就邊，大家行到海邊，係間商店旁有個天然得黎 又幾人造的池座落在海邊，裡面有貌似海狗的物體。心想點解呢度有呢幾隻動物，原來隔離間商店有d一碗仔約兩條細魚開半，即共四舊魚，承惠100yen，係比人用黎餵海狗，你開心時，海狗有得食，老細又賺錢的一個循環。作為精明的香港人梗係無買魚，但就企係度睇人餵，又沿個池邊行了一圈，都幾驚險，因為海中都幾大浪，不停打埋池邊。又過一陣，又係時候閃去下一站，就係利尻町立博物館(明明係旅遊資料話月休架？)不過可能為左服務遊客，休息都照開。內裡不大，多數都係一d北海道出現的動物標本，有d展示採昆布的小模型，仲有個屋展示漁民生活咁。屋後查實有個花園種植左d利尻島上植物，可惜風大雨大，無心出去睇。於是蓋個紀錄印，順道照顧一個原來係有柏金遜的伯伯上返旅遊車(之前掛住玩無發現，係進入博物館前才發現導遊小姐打著傘送伯伯入博物館，才知伯伯身體有點問題)。做完好事，人都醒d，12:05從博物館離開，已經是行程最後一站，剩下的是回程到碼頭前車窗見學的寢熊之岩和人面岩，可惜濛查查的車窗玻璃和旅遊車行過只是慢駛唔係停低，閃眼即逝就見學完畢了！ 12:35回到碼頭，拿著觀光巴士上派發的Tororo昆布禮品包，找來導遊小姐合個照就完滿結束了利尻島的行程了。這邊下車，那邊就要趕入碼頭買入13:15前往禮文島的船票(@730yen)。這是一班剛完成觀光巴士之旅的團友，大部份都係繼續來個禮文之旅買個船票又去玩。此時和一位獨行的日本人溝通起上來，那是岩田英希先生(住東京川崎，此行是一人的火車之旅，從東京到北海道道央再乘火車到道北和道東之旅)。準時坐上Prince Soya號出發到禮文島，13:58就到達了。一大班同行的利尻之旅團友，又一起湧到觀光巴士的櫃位，買下C course的觀光票(@3100yen)。14:12又趕上觀光巴士出發，外面還是下著雨。利尻禮文正踏入花期，可惜下著雨，山邊的花就算旅遊車停下來都看不清楚，拍起照來都是濛濛的。14:38到達名為禮文Atsumorinu群生地，那是一個小山坡，有一個環形的步道可繞上一圈，山坡上有幾種當季得令的禮文島之花，其中一種就是Atsumorinu，白白之花有個兜咁，幾正架！踏過泥濘的山坡步道，上面下著雨，下面踩著泥，又要照顧手中的數碼相機，一番狼狽終於回到旅遊車上。 15:08抵達Sukodon岬，那是在禮文島北端的海岬，幾間商店就在旅遊車停車處旁，前行有樓才梯行落些少，就到一個平台。前望一片大海汪洋，雨中無甚睇頭。反而旁邊有告示警告勿踢石仔落山，原來山下一旁有間旅館，咁都有o既？回到商店，逛個圈，幫襯埋後面寫著最北之Toilet(連廁所都要爭我係最北？)，回到旅遊車，從北面去到南面的桃台貓台參觀。穿過一條很短的隧道，一出就是很窄的單程下山斜路，車前望出就是山坡和遠海(感覺就如大嶼山東涌道下坡到貝澳長沙，在最高點落下時的感覺)。來到桃台貓台，雨細起來，後來遮都不用開，算係上天都比返多少薄面，成幾千yen的觀光之旅，一路落雨點影靚相。走上附近的觀望台，依據指示看板，原來不只得桃台貓台兩個東西看，還有另一個觀光物。桃台貓台其實是指一舊叫桃岩的大石，因為似個桃而命名；貓台同理，即是似貓的貓岩；剩下的就是地藏岩。在觀景台的後方，就是巨大的桃岩，不過雲太低，岩頂沒入雲霧中，總之就係見到一舊好大的岩石。貓岩就在觀光台左前方的海中，很像從後看到一隻貓的背，還有雙耳仔。地藏岩呢，應該在右後方，但雲霧太大，睇唔到。20分鐘歡樂的時光又過去了，回程到達碼頭，逛個碼頭後的商台街，買埋船票就要排隊上船去了。 因為是回程到稚內，又已經是黃昏的關係，乘船的旅行團很多，這是又下起大雨來。正當一大班等上船的人擠滿碼頭旁一字排開的石簷下看著船泊岸，但剛巧下船的遊客中，有一班是行動不便的長者，下船的人花了很多時間，令碼頭旁人的有點不耐煩，但當大家望在下船用的連接樓梯，最後下船的坐輪椅伯伯，用盡氣力，憑自己力量扶著兩旁扶手，背向碼頭一步一步的慢慢向後移動，當伯伯成功著地坐回輪椅上，一眾不耐煩的歡呼起來，以示對伯伯的堅毅作出鼓勵(又或者係阻了大家上船時間的一種表達？)乘上Queen Soya號回程稚內，和岩田先生一起找到個角落坐下，交換下食物互相品嚐，又簡單英文日文溝通一番，1920船回到稚內的碼頭，一起步行回車站，岩田先生先取道到南稚內晚飯，再行乘夜車返札幌繼續他一人的鐵道之道，而我倆就在Locker取回行李，拿著在網上訂房時印出的小地圖找到紀之國旅館。進入旅館的玄關，除下波鞋，大聲呼喊「Sumemasen」，旅館老細出來，請先填個字登記下。問過老細，英文登記ok？老細回答「Dame」再送個交叉死光過來，連不懂日文的貓骨都明白意思。再問過老細「漢字wa」，今次又得喎，Dozo！登記完後，編配上2階的210房。但因為晚飯最遲是8點，於是19:50房都不上就趕到膳食間吃晚飯。 二人的料理餐放得滿枱一碟二碟，飯、湯、燒魚、漬物、大八爪魚鬚Sabusabu等等。食完臨上房，從後面樓梯上房，途經男女別的風呂間，貓骨順手開門去睇睇風呂間如何，誰知有個女住客正赤條條企左係門後(呢個時候大飽眼福的只有貓骨，無我份)。查實，男女風呂間都係有兩部份，一部份係更衣間，有膠籃可以盛衣物，之後就赤條條進入另一部份的沐浴間，先到兩旁的花洒洗頭洗身，洗完可以跳入側邊的大浴池浸下熱水。不過，始終唔習慣，當晚都選在夜一點的時間，睇完無人沖緊先拿拿林去沖，而大浴池也因為衛生程度唔知有幾高，都係免了！再加上本身風呂間都有番皂、洗頭水提供，但又係唔知有咩人用過，番皂呢d咁貼身野，都係咪攪囉！沖完哂涼返回好應聲的房間，執下行李，copy埋d數碼相，23:30訓覺去了！ |
  |
|
|
早餐：利尻島Sadou食堂(鹽味拉麵x2) |
|
